ଆଉ ନାହାନ୍ତି ସଞ୍ଜୟ କପୂର: ମୃତ୍ୟୁର କେଇ ଘଣ୍ଟା ପୂର୍ବରୁ ଅହମ୍ମଦାବାଦ ବିମାନ ଦୁର୍ଘଟଣାକୁ ନେଇ…

ମୁମ୍ବାଇ: ବଲିଉଡ୍ ଅଭିନେତ୍ରୀ କରିସ୍ମା କପୁରଙ୍କ ପୂର୍ବତନ ସ୍ୱାମୀ ଏବଂ ବ୍ୟବସାୟୀ ସଞ୍ଜୟ କପୁରଙ୍କ ଦେହାନ୍ତ ହୋଇଛି । ଗୁରୁବାର ୫୩ ବର୍ଷ ବୟସରେ ହୃଦଘାତରେ ତାଙ୍କର ମୃତ୍ୟୁ ଘଟିଛି । ମୃତ୍ୟୁ ବେଳେ ସଞ୍ଜୟ ଇଂଲଣ୍ଡରେ ଥିଲେ ଏବଂ ଏକ କ୍ଲବରେ ପୋଲୋ ଖେଳୁଥିବା ବେଳେ ହଠାତ୍ ହୃଦଘାତରେ ତାଙ୍କର ପ୍ରାଣ ଯାଇଛି । ତେବେ ଗୁରୁବାର ତାଙ୍କ ମୃତ୍ୟୁର କିଛି ଘଣ୍ଟା ପୂର୍ବରୁ ଅହମ୍ମଦାବାଦ ବିମାନ ଦୁର୍ଘଟଣା ବିଷୟରେ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ପୋଷ୍ଟ କରି ଦୁଃଖ ପ୍ରକାଶ କରିଥିଲେ ।

ତେବେ ଇଂଲଣ୍ଡର ଏକ କ୍ଲବରେ ପୋଲୋ ଖେଳୁଥିବା ସମୟରେ ସେ ହଠାତ୍ ତଳେ ପଡ଼ିଯାଇଥିଲେ, ଯାହା ପରେ ତାଙ୍କୁ ତୁରନ୍ତ ହସ୍ପିଟାଲକୁ ନିଆଯାଇଥିଲା। କିନ୍ତୁ ତାଙ୍କୁ ବଞ୍ଚାଯାଇ ପାରିନଥିଲା । ମୃତ୍ୟୁର କେଇ ଘଣ୍ଟା ପୂର୍ବରୁ ସଞ୍ଜୟ ତାଙ୍କ ଇନଷ୍ଟାଗ୍ରାମ ପୋଷ୍ଟରେ ଲେଖିଥିଲେ, ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାର ଖବର ବହୁତ ଦୁଃଖଦ। ସେ ପ୍ରଭାବିତ ପରିବାର ପ୍ରତି ସମବେଦନା ମଧ୍ୟ ପ୍ରକାଶ କରିଥିଲେ । ହେଲେ କିଏ ଜାଣିଥିଲା ଏହା ପରର ମୂହୂର୍ତ୍ତ ତାଙ୍କର ଶେଷ ସମୟ । ତେବେ ତାଙ୍କ ବ୍ୟବସାୟ ପରାମର୍ଶଦାତା ସୁହେଲ ସେଠ୍ ହୃଦଘାତ ଯୋଗୁଁ ସଞ୍ଜୟଙ୍କ ମୃତ୍ୟୁ ଖବରକୁ ନିଶ୍ଚିତ କରିଛନ୍ତି । ସେ କହିଛନ୍ତି, ସେ ଘୋଡା ଚଢୁଥିବା ସମୟରେ ଏକ ମହୁମାଛି ତାଙ୍କ ପାଟିରେ ପଶିଯାଇଥିଲା, ଯାହା ହୃଦଘାତର କାରଣ ହୋଇଥିଲା । ପରେ ଶୀଘ୍ର ଡାକ୍ତରୀ ସହାୟତା ସତ୍ତ୍ୱେ ତାଙ୍କୁ ବଞ୍ଚାଯାଇ ପାରିନଥିଲା।

ସେପଟେ ଗୁରୁବାର ବିଳମ୍ବିତ ରାତିରେ, କରୀନା କପୁର ଏବଂ ତାଙ୍କ ସ୍ୱାମୀ ସୈଫ୍ ଅଲ୍ଲୀ ଖାନ ମୁମ୍ବାଇରେ କରିସ୍ମା କପୁରଙ୍କ ଘରେ ତାଙ୍କୁ ସମବେଦନା ଜଣାଇବାକୁ ପହଞ୍ଚିଥିବା ଦେଖାଯାଇଥିଲା । ଏହାବ୍ୟତୀତ, ମଲାଇକା ଆରୋରା ମଧ୍ୟ ତାଙ୍କ ଭଉଣୀ ଅମୃତା ଆରୋରାଙ୍କ ସ୍ୱାମୀ ଏବଂ ପୁଅ ସହିତ କରିସ୍ମାଙ୍କ ଘରକୁ ଯାଇଥିଲେ।

ସଞ୍ଜୟ କପୁର ଜଣେ ପ୍ରସିଦ୍ଧ ବ୍ୟବସାୟୀ ଥିଲେ। ସେ ୨୦୦୩ ମସିହାରେ ଅଭିନେତ୍ରୀ କରିସ୍ମା କପୁରଙ୍କୁ ବହୁତ ଧୁମଧାମରେ ​​ବିବାହ କରିଥିଲେ। ଏହା ତାଙ୍କର ଦ୍ୱିତୀୟ ବିବାହ ଥିଲା। ତଥାପି, ତାଙ୍କର ଏବଂ କରିସ୍ମାଙ୍କ ସମ୍ପର୍କ ଅଧିକ ସମୟ ପର୍ଯ୍ୟନ୍ତ ରହିପାରିଲା ନାହିଁ। ଉଭୟଙ୍କ ମଧ୍ୟରେ ବହୁତ ସମସ୍ୟା ଥିଲା। ଶେଷରେ, ୨୦୧୪ ମସିହାରେ ସଞ୍ଜୟ ଏବଂ କରିସ୍ମାଙ୍କ ଛାଡପତ୍ର ହୋଇଥିଲା। ସେମାନଙ୍କ ଛାଡପତ୍ରର ଘଟଣା ଗଣମାଧ୍ୟମରେ ବହୁତ ଶିରୋନାମା ପାଲଟିଥିଲା। ଉଭୟଙ୍କ ଦୁଇଟି ସନ୍ତାନ ସମାଇରା ଏବଂ କିୟାନ୍ କପୁର ଅଛନ୍ତି।

କରିସ୍ମାଙ୍କ ଠାରୁ ଛାଡପତ୍ର ପରେ, ସଞ୍ଜୟ କପୁର ପ୍ରିୟା ସଚଦେବଙ୍କୁ ବିବାହ କରିଥିଲେ। ସେମାନଙ୍କର ଏକ ସନ୍ତାନ ମଧ୍ୟ ଅଛି। ସଞ୍ଜୟ କପୁରଙ୍କ ମୃତ୍ୟୁ ଖବର ଶୁଣିବା ପରେ ଲୋକମାନେ ସୋସିଆଲ ମିଡିଆରେ ଦୁଃଖ ପ୍ରକାଶ କରୁଛନ୍ତି। ତଥାପି, ତାଙ୍କ ମୃତ୍ୟୁ ଉପରେ କରିସ୍ମାଙ୍କ ପକ୍ଷରୁ କୌଣସି ବୟାନ ଆସିନାହିଁ। କରିସ୍ମା ଏବଂ ସଞ୍ଜୟଙ୍କ ବିବାହ ବିଚ୍ଛେଦ ହୋଇଥାଇପାରେ କିନ୍ତୁ ସେମାନଙ୍କ ପିଲାମାନେ ପ୍ରାୟତଃ ସଞ୍ଜୟଙ୍କୁ ଭେଟୁଥିଲେ। ସଞ୍ଜୟ କପୁରଙ୍କ ପ୍ରଥମ ପତ୍ନୀ ନନ୍ଦିତା ମହତାନୀ, ଦ୍ୱିତୀୟ ପତ୍ନୀ କରିସ୍ମା କପୁର ଏବଂ ତୃତୀୟ ପତ୍ନୀ ପ୍ରିୟା ସଚଦେବ।