ଛାଡ଼ପତ୍ରକୁ ନେଇ ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି, ମହିଳାଙ୍କ ୧୨ କୋଟି ଟଙ୍କାର ଆଲିମୋନି ଦାବି ଖାରଜ

ନୂଆଦିଲ୍ଲୀ: ଏକ ହାଇ-ପ୍ରୋଫାଇଲ ବିବାହ ବିଚ୍ଛେଦ ମାମଲାରେ ସୁପ୍ରିମକୋର୍ଟ ବଡ଼ ରାୟ ଦେଇଛନ୍ତି। ଜଣେ ମହିଳାଙ୍କର ୧୨ କୋଟି ଟଙ୍କାର ଆଲିମୋନି ଦାବି ଖାରଜ ହୋଇଛି। କୋର୍ଟ ନ୍ୟାୟ ସୁନିଶ୍ଚିତ କରିବେ ବୋଲି କହିଛନ୍ତି। କିନ୍ତୁ ଏହା ସ୍ୱାମୀଙ୍କୁ ଆର୍ଥିକ ଭାବେ ଧ୍ୱଂସ କରିବ ନାହିଁ।

ଦମ୍ପତିଙ୍କ ବିବାହ ମାତ୍ର ଦେଢ଼ ବର୍ଷ ଚାଲିଥିଲା। ମହିଳା ଜଣେ ୧୨ କୋଟି ଟଙ୍କା ନଗଦ ଓ ମୁମ୍ବାଇରେ ଏକ ବଡ଼ ଆପାର୍ଟମେଣ୍ଟ ଦାବି କରିଥିଲେ। କୋର୍ଟ ସ୍ୱାମୀଙ୍କୁ ଆପାର୍ଟମେଣ୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। କିନ୍ତୁ ନଗଦ ଦାବିକୁ ଅତ୍ୟଧିକ ବୋଲି କହିଛନ୍ତି। ମହିଳାଙ୍କର ଇଞ୍ଜିନିୟରିଂ ଓ ବ୍ୟବସାୟ ଡିଗ୍ରୀ ଥାଇ ନିଜେ ଚାକିରି କରି ନିଜକୁ ସମ୍ଭାଳିବାକୁ ପରାମର୍ଶ ଦେଇଛନ୍ତି।

ମୁଖ୍ୟ ବିଚାରପତି ବି.ଆର. ଗଭାଇଙ୍କ ନେତୃତ୍ୱରେ ତିନି ବିଚାରପତିଙ୍କ ପ୍ୟାନେଲ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ୨୦୨୨ରେ ଦମ୍ପତି ଏକ ଚୁକ୍ତି କରିଥିଲେ। ଏଥିରେ ମହିଳାଙ୍କୁ ମୁମ୍ବାଇର କଲ୍ପତରୁ ସୋସାଇଟିରେ ଏକ ଆପାର୍ଟମେଣ୍ଟ ଓ ଦୁଇଟି ପାର୍କିଂ ସ୍ଥାନ ଦେବା ନେଇ ରାଜି ହୋଇଥିଲେ। ସେତେବେଳେ ସେ ୧୨ କୋଟି କିମ୍ବା ଅତିରିକ୍ତ ସହାୟତା ଦାବି କରି ନଥିଲେ।

ମହିଳାଙ୍କ ସ୍ୱାମୀ ପ୍ରତାରଣା କରିଥିବା ଅଭିଯୋଗକୁ କୋର୍ଟ ଖାରଜ କରିଛନ୍ତି। ଏହାର କୌଣସି ପ୍ରମାଣ ନାହିଁ ବୋଲି କୋର୍ଟ କହିଛନ୍ତି। ବିଚାରପତି କହିଛନ୍ତି, “ଆପଣଙ୍କ ପାଖରେ ଇଞ୍ଜିନିୟରିଂ ଓ ବ୍ୟବସାୟ ଡିଗ୍ରୀ ଅଛି। ଆପଣ ନିଶ୍ଚିତ ଭାବେ ଭଲ ଚାକିରି ପାଇପାରିବେ।”

କୋର୍ଟ ଜଣାଇଛନ୍ତି, ସ୍ୱାମୀ ଚୁକ୍ତି ଅନୁଯାୟୀ ଆପାର୍ଟମେଣ୍ଟ ଦେବାକୁ ରାଜି ହୋଇଛନ୍ତି। ବିବାହ ବିଚ୍ଛେଦ ପରେ ମହିଳା ଏଠାରେ ରହିପାରିବେ। ସ୍ୱାମୀ ଆପାର୍ଟମେଣ୍ଟର ୨୬ ଲକ୍ଷ ଟଙ୍କାର ପ୍ରୋପର୍ଟି ଫି’ ମଧ୍ୟ ଦେବାକୁ ରାଜି ହୋଇଛନ୍ତି।