Taliban Legalises Domestic Violence: ‘ଘରୋଇ ହିଂସା ନୁହେଁ ସ୍ତ୍ରୀ କିମ୍ୱା ମହିଳାଙ୍କୁ ମାଡ଼ ମାରିବା’

ନୂଆଦିଲ୍ଲୀ: ସବୁ ବର୍ବରତା ଟପିଗଲେ ତାଲିବାନ୍ ସରକାର

ଘରୋଇ ହିଂସାକୁ ଦେଲେ ଲାଇସେନ୍ସ

ଲାଗୁ କଲେ ନୂତନ ଆଇନ୍

“ସ୍ତ୍ରୀ ଏବଂ ମହିଳାଙ୍କୁ ମାଡ଼ ମାରିବା ଘରୋଇ ହିଂସା ନୁହେଁ…, ଯେପର୍ଯ୍ୟନ୍ତ ନ ଭାଙ୍ଗିଛି ହାଡ଼”

ଦିନକୁ ଦିନ ମହିଳାଙ୍କ ପ୍ରତି ନିଷ୍ଠୁର ହେବାରେ ଲାଗିଛି ତାଲିବାନ୍ ସରକାର। ତାଲିବାନ ପୁଣି ମହିଳାଙ୍କ ବିରୁଦ୍ଧରେ ଏକ ଅଜବ ଆଇନ ପ୍ରଣୟନ କରିଛି, ଯେଉଁଥିରେ ସ୍ତ୍ରୀମାନଙ୍କୁ ମାଡ଼ ମାରିବା ଘରୋଇ ହିଂସାରୁ ବାଦ ଦିଆଯାଇଛି। ତାଲିବାନ ସରକାରଙ୍କ କହିବା କଥା ଜଣେ ପୁରୁଷ ତାର ସ୍ତ୍ରୀ ଏବଂ କୌଣସି ମହିଳାଙ୍କୁ ମାଡ଼ ମାରିବା ସମ୍ପୂର୍ଣ୍ଣ ଠିକ୍, ଏହା ଏକ ଘରୋଇ ହିଂସା ନୁହେଁ, ଯେ ପର୍ଯ୍ୟନ୍ତ ମହିଳାଙ୍କ ହାଡ଼ ଭାଙ୍ଗିନାହିଁ। ଆଉ ତାଲିବାନ ମହିଳାଙ୍କ ବିରୁଦ୍ଧରେ ଏହି ଘରୋଇ ହିଂସାକୁ ଆଇନଗତ କରିବା ପାଇଁ ଏକ ଆଇନ ପ୍ରଚଳନ କରିଛି। ତାଲିବାନ ସରକାରଙ୍କ ଏହି ନୂତନ ଦଣ୍ଡ ସଂହିତା ମହିଳାଙ୍କ ବିରୁଦ୍ଧରେ ଘରୋଇ ହିଂସାକୁ ବୈଧ କରୁଛି

ଏହି ନୂତନ ଆଇନ ସ୍ୱାମୀମାନଙ୍କୁ ସେମାନଙ୍କର ସ୍ତ୍ରୀ ଏବଂ ପିଲାମାନଙ୍କୁ ଶାରୀରିକ ଭାବରେ ଦଣ୍ଡ ଦେବାକୁ ଅନୁମତି ଦେଇଛି। ଯେପର୍ଯ୍ୟନ୍ତ ମାଡ଼ ଦ୍ଵାରା ସେମାନଙ୍କ ହାଡ଼ ଭାଙ୍ଗି ନ ଥାଏ କିମ୍ବା କୌଣସି ବାହ୍ୟ ଆଘାତ ସୃଷ୍ଟି କରେ ନାହିଁ, ସେ ପର୍ଯ୍ୟନ୍ତ ଏହା ହିଂସା ଭାବରେ ଗ୍ରହଣ କରାଯିବ ନାହିଁ। ଇସଲାମିକ ଗୋଷ୍ଠୀର ସର୍ବୋଚ୍ଚ ନେତା ହିବାତୁଲ୍ଲାହ ଆଖୁନ୍ଦଜାଦାଙ୍କ ଦ୍ୱାରା ସ୍ୱାକ୍ଷରିତ ଏହି ଦଣ୍ଡ ସଂହିତା ଏକ ଜାତି ବ୍ୟବସ୍ଥା ସୃଷ୍ଟି କରେ, ଯେଉଁଥିରେ ଅପରାଧୀଙ୍କ “ସ୍ୱାଧୀନ” କିମ୍ବା “ଦାସ” ଭାବରେ ସ୍ଥିତି ଉପରେ ଆଧାରିତ ବିଭିନ୍ନ ସ୍ତରର ଦଣ୍ଡ ଥାଏ। ନୂତନ ଦଣ୍ଡ ସଂହିତା ଅନୁଯାୟୀ, ଯଦି ଜଣେ ସ୍ୱାମୀ ତାଙ୍କ ସ୍ତ୍ରୀଙ୍କୁ ମାଡ଼ ମାରି ତାଙ୍କ ହାଡ ଭାଙ୍ଗି ଦିଅନ୍ତି, କିମ୍ୱା ତାହା ଶରୀରରେ କୌଣସି ଦୃଶ୍ୟମାନ କ୍ଷତ ସୃଷ୍ଟି କରନ୍ତି, ତେବେ ସେ କେବଳ ୧୫ ଦିନ ଜେଲରେ ରହିପାରିବେ। ଏହା ବ୍ୟତୀତ, ପୁରୁଷଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ମହିଳାଙ୍କୁ କୋର୍ଟରେ ନିର୍ଯାତନା ପ୍ରମାଣ କରିବାକୁ ପଡିବ। ଏପରିକି ମହିଳାମାନେ ସେମାନଙ୍କର ଆଘାତ ବିଚାରପତିଙ୍କ ସମ୍ମୁଖରେ ପ୍ରକାଶ କରିବାକୁ ପଡିବ। ସେମାନଙ୍କ ସ୍ୱାମୀ କିମ୍ବା ପୁରୁଷ ସାଥୀ ମଧ୍ୟ କୋର୍ଟରେ ଉପସ୍ଥିତ ରହିବା ଆବଶ୍ୟକ। ତାଲିବାନ ସରକାରଙ୍କ ଏହି ଆଇନ ଏବେ ହଇଚଇ ସୃଷ୍ଟି କରିଛି।

ତାଲିବାନ ଧାରା ୯ ଅନୁଯାୟୀ ଏହି ରାୟ ଜାରି କରିଛି। ଧାରା 9 ଆଫଗାନ ସମାଜକୁ ଚାରୋଟି ବର୍ଗରେ ବିଭକ୍ତ କରେ: ଧାର୍ମିକ ବିଦ୍ୱାନ (ଉଲାମା), ଅଭିଜିତ (ଅଶ୍ରଫ), ମଧ୍ୟବିତ୍ତ ବର୍ଗ ଏବଂ ନିମ୍ନ ବର୍ଗ। ଏହି ବ୍ୟବସ୍ଥା ଅନୁଯାୟୀ, ସମାନ ଅପରାଧ ପାଇଁ ଦଣ୍ଡ ମୁଖ୍ୟତଃ ଅଭିଯୁକ୍ତର ସାମାଜିକ ସ୍ଥିତି ଦ୍ୱାରା ନିର୍ଣ୍ଣୟ କରାଯାଏ, ଅପରାଧର ପ୍ରକୃତି କିମ୍ବା ଗମ୍ଭୀରତା ଦ୍ୱାରା ନୁହେଁ। ସଂହିତା ଅନୁଯାୟୀ, ଯଦି ଜଣେ ଇସଲାମିକ ଧାର୍ମିକ ବିଦ୍ୱାନ ଅପରାଧ କରନ୍ତି, ତେବେ କେବଳ ପରାମର୍ଶ ପ୍ରଦାନ କରାଯାଏ। ସମ୍ପ୍ରଦାୟର ଅପରାଧୀମାନଙ୍କୁ କୋର୍ଟକୁ ଡକାଯାଏ ଏବଂ ପରାମର୍ଶ ଦିଆଯାଏ। ମଧ୍ୟବିତ୍ତ ବର୍ଗ ଜେଲର ସମ୍ମୁଖୀନ ହୁଏ, ଯେତେବେଳେ “ନିମ୍ନ ବର୍ଗ”ର ଲୋକମାନେ ଜେଲଦଣ୍ଡ ଏବଂ ଶାରୀରିକ ଦଣ୍ଡର ସମ୍ମୁଖୀନ ହୋଇପାରନ୍ତି। ଆଉ ଗମ୍ଭୀର ଅପରାଧ ପାଇଁ ଶାରୀରିକ ଦଣ୍ଡ ସୁଧାର ସେବା ନୁହେଁ, ଇସଲାମିକ ଧର୍ମଗୁରୁଙ୍କ ଦ୍ୱାରା ପରିଚାଳିତ ହେବ।

ଏହା ବ୍ୟତୀତ ଯେଉଁ ମହିଳାମାନେ ସେମାନଙ୍କ ସ୍ୱାମୀଙ୍କୁ ନ ଜଣାଇ ସମ୍ପର୍କୀୟଙ୍କୁ ଭେଟିବାକୁ ଯାଆନ୍ତି ସେମାନଙ୍କୁ ବି ତିନିମାସ ପାଇଁ ଜେଲଦଣ୍ଡ ଦିଆଯିବ। ଆଉ ଯଦି ନୂତନ ସଂହିତା ବିଷୟରେ ଆଲୋଚନା ବି କରାଯାଏ ତେବେ ତାକୁ ମଧ୍ୟ ଏକ ଅପରାଧ ମଣାଯିବ।