ତାମିଲନାଡୁକୁ ଭାରତଠାରୁ ଅଲଗା କରିବାକୁ ଚେଷ୍ଟା କରାଯାଉଛି… ଏପରି କାହିଁକି କହିଲେ ରାଜ୍ୟପାଳ ?

ଚେନ୍ନାଇ: ତାମିଲନାଡୁର ରାଜ୍ୟପାଳ ଆର.ଏନ୍ ରବି ଶୁକ୍ରବାର ରାଜ୍ୟ ସମ୍ପର୍କରେ ଏକ ବଡ଼ ବୟାନ ଦେଇଛନ୍ତି। ତାମିଲନାଡୁକୁ ଭାରତଠାରୁ ଅଲଗା କରିବା ପାଇଁ ଉଦ୍ୟମ କରାଯାଉଛି ଏବଂ ଏଭଳି ଉଦ୍ୟମ ସଫଳ ହେବ ନାହିଁ ବୋଲି ସେ କହିଛନ୍ତି। ସେ କହିଛନ୍ତି ଯେ ତାମିଲନାଡୁ ହେଉଛି ଦେଶର ଏକମାତ୍ର ରାଜ୍ୟ ଯିଏକି ଅନ୍ୟ ଭାରତୀୟ ଭାଷାକୁ ତିନି ଭାଷା ଫର୍ମୁଲାରେ ଅନ୍ତର୍ଭୁକ୍ତ କରିବାକୁ ବିରୋଧ କରୁଥିବାବେଳେ ଦେଶର ଅବଶିଷ୍ଟ ୨୭ଟି ରାଜ୍ୟ ଏହି ନୀତି ଆପଣାଇଛନ୍ତି।

ହିନ୍ଦୀ ମାସର ସମାପ୍ତ ସମାରୋହରେ ଆର.ଏନ୍ ରବି ରାଜ୍ୟରେ ରାଜନୈତିକ ଦଳ ଦ୍ୱାରା ଏହି ଭାଷାର ବିରୋଧ ବିଷୟରେ ଉଲ୍ଲେଖ କରି କହିଛନ୍ତି ଯେ ହିନ୍ଦୀ ଲାଗୁ ବିରୋଧରେ ଆଲୋଚନା ଏକ ବାହାନା ଅଟେ। ସେ ଆହୁରି ମଧ୍ୟ କହିଛନ୍ତି ଯେ ଆମ ଏକତାକୁ ଭାଙ୍ଗିଦେବାକୁ ଚେଷ୍ଟା କରାଯାଉଛି। ଏକ ବିଷାକ୍ତ ନୀତି ଏବଂ ବିଚ୍ଛିନ୍ନତାବାଦୀ ନୀତି ଭାରତର ଏକତାକୁ ଦୁର୍ବଳ କରିପାରିବ ନାହିଁ। ଏହା ସହିତ ସେ ଦେଶକୁ ବିଭକ୍ତ କରିଥିବା ଲୋକଙ୍କୁ ମଧ୍ୟ ତାଗିଦ କରିଥିଲେ।

ଭାରତ ବିଭାଜିତ ହୋଇପାରିବ ନାହିଁ-
ରବି କହିଛନ୍ତି ଯେ ତାମିଲନାଡୁକୁ ଅନ୍ୟ ଦେଶରୁ ଅଲଗା କରିବା ପାଇଁ ଉଦ୍ୟମ କରାଯାଉଛି। ଏହି ଦେଶ ଭାଙ୍ଗିବା ପାଇଁ ଏହି ବିଚ୍ଛିନ୍ନତାବାଦୀ ଏଜେଣ୍ଡା ଏବଂ ଯେଉଁମାନେ ଏହିପରି ଚିନ୍ତା କରୁଛନ୍ତି ସେମାନେ ମନେ ରଖିବା ଉଚିତ୍ ଯେ ଭାରତ ବିଭାଜିତ ହୋଇପାରିବ ନାହିଁ।

ସୂଚନା ଥାଉକି ଚେନ୍ନାଇସ୍ଥିତ ଦୂରଦର୍ଶନ କେନ୍ଦ୍ରର ସୁବର୍ଣ୍ଣ ଜୟନ୍ତୀ ଉତ୍ସବ ପାଳନ ବେଳେ କଣ୍ଠଶିଳ୍ପୀମାନେ ତାମିଲନାଡୁର ରାଜ୍ୟ ସଙ୍ଗୀତ ଗାନ ସମୟରେ ଏହାର କେତୋଟି ପଂକ୍ତି ଛାଡ଼ିଦେବାରୁ ବଡ଼ ବିବାଦ ମୁଣ୍ଡ ଟେକିଛି। ରାଜ୍ୟପାଳ ଆର୍‌. ଏନ୍‌. ରବିଙ୍କ ଅଧ୍ୟକ୍ଷତାରେ ଉତ୍ସବ ଅନୁଷ୍ଠିତ ହୋଇଥିବାରୁ ତାଙ୍କ ଇଙ୍ଗିତରେ ଜାଣିଶୁଣି ଏପରି କରାଯାଇଥିବା ମୁଖ୍ୟମନ୍ତ୍ରୀ ଏମ୍‌.କେ. ଷ୍ଟାଲିନ୍‌ ସମାଲୋଚନା କରିଛନ୍ତି। ଏହି ପ୍ରସଙ୍ଗରେ ଶୁକ୍ରବାର ମୁଖ୍ୟମନ୍ତ୍ରୀ ଓ ରାଜ୍ୟପାଳ ମୁହାଁମୁହିଁ ହୋଇଛନ୍ତି। ଇତିମଧ୍ୟରେ ଷ୍ଟାଲିନ୍‌ ଅଣହିନ୍ଦୁଭାଷୀ ରାଜ୍ୟଗୁଡ଼ିକ ଉପରେ ହିନ୍ଦୀ ଭାଷାକୁ ଲଦି ନ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି।

ଷ୍ଟାଲିନ୍‌ କହିଛନ୍ତି, କେନ୍ଦ୍ର ଯେଉଁ ରାଜ୍ୟରେ ଏପରି କାର୍ଯ୍ୟକ୍ରମର ଆୟୋଜନ କରୁଛି, ସେଠାକାର ଶାସ୍ତ୍ରୀୟ ଭାଷାକୁ ସମ୍ମାନ ଦେବା ଉଚିତ। ଏଭଳି କରାଗଲେ ସବୁ ସମ୍ପ୍ରଦାୟ ମଧ୍ୟରେ ସଦ୍‌ଭାବ ବୃଦ୍ଧି ପାଇବ ବୋଲି ଷ୍ଟାଲିନ୍‌ ଯୁକ୍ତି ବାଢ଼ିଛନ୍ତି। ସେହିପରି ଏଆଇଏଡିଏମ୍‌କେ ମୁଖ୍ୟ ଇ.କେ. ପାଲାନିସ୍ବାମୀ ମଧ୍ୟ ରାଜ୍ୟ ସଙ୍ଗୀତରୁ ପଂକ୍ତିକୁ ଛାଡ଼ିଦେବା ଘଟଣାକୁ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସମାଲୋଚନା କରିଛନ୍ତି। କଂଗ୍ରେସ ରାଜ୍ୟପାଳଙ୍କ ଭୂମିକାକୁ ନିନ୍ଦା କରିଛି। ରାଜ୍ୟପାଳ ରବି ଷ୍ଟାଲିନ୍‌ଙ୍କ ପ୍ରତିକ୍ରିୟାର ଜବାବ ଦେବାକୁ ଯାଇ କହିଛନ୍ତି, ମୁଖ୍ୟମନ୍ତ୍ରୀ ତାଙ୍କ ବିରୋଧରେ ମିଥ୍ୟା ଅଭିଯୋଗ ଆଣି ବର୍ଣ୍ଣ ଭେଦି ମନ୍ତବ୍ୟ ଦେଇଛନ୍ତି। ଏହା ଏକ ଶସ୍ତା ମନ୍ତବ୍ୟ ଯାହାକି ମୁଖ୍ୟମନ୍ତ୍ରୀ ଭଳି ସାମ୍ବିଧାନିକ ପଦବୀରେ ଥିବା ବ୍ୟକ୍ତିଙ୍କ ମର୍ଯ୍ୟାଦା ହାନି କରୁଛି। ଦୂରଦର୍ଶନ କେନ୍ଦ୍ର ଚେନ୍ନାଇ ପକ୍ଷରୁ ଏହି ଅନିଚ୍ଛାକୃତ ତ୍ରୁଟି ପାଇଁ କ୍ଷମା ମଗାଯାଇଛି। ତାମିଲ କିମ୍ବା ରାଜ୍ୟ ସଙ୍ଗୀତ ‘ତାମିଲ ଥାଇ ଭଲ୍‌ଥୁ’କୁ ଅସମ୍ମାନ କରିବା କଣ୍ଠଶିଳ୍ପୀମାନଙ୍କ ଉଦ୍ଦେଶ୍ୟ ନ ଥିଲା ବୋଲି ସ୍ପଷ୍ଟୀକରଣ ଦିଆଯାଇଛି।