ନୂଆଦିଲ୍ଲୀ: ସିଙ୍ଗାପୁରର ହାଇ କମିଶନର ସାଇମନ୍ ୱଙ୍ଗ ଗୁରୁଗ୍ରାମର ଏକ କାଫେରେ ତାଙ୍କୁ ଦିଆଯାଇଥିବା ଚା’କୁ ଅସ୍ୱାଦ ବୋଲି କରିଛନ୍ତି। ଇନଷ୍ଟାଗ୍ରାମରେ ପୋଷ୍ଟ କରି ସାଇମନ୍ ୱଙ୍ଗ କହିଛନ୍ତି ଯେ, ଏକ କପ୍ ଅସ୍ଵାଦ ଚା ପାଇଁ ସେ କାଫେ ମୋ ଠାରୁ ୧୬୯ ଟଙ୍କା ନେଇଛନ୍ତି । ସେ ଚା’ ପୁଣି ଏକ ମାଟି ପାତ୍ରରେ ଦିଆଯାଇଥିଲା । ସେହି ମାଟି ପାତ୍ର ଏବଂ କାଫେ ଭିତରର ଏକ ଫଟୋ ପୋଷ୍ଟ କରି ୱଙ୍ଗ ଲେଖିଛନ୍ତି ଯେ, ମୁଁ ଗୁରୁଗ୍ରାମରେ ଏକ କପ୍ ଅସ୍ୱାଦ ଚା’ ପିଇଥିଲି ।
ସାଇମନ୍ ୱଙ୍ଗଙ୍କ ଏହି ପୋଷ୍ଟକୁ ନେଇ ଅନେକ ଉପଭୋକ୍ତା ମନ୍ତବ୍ୟ ଦେଇଛନ୍ତି। ଜଣେ ଉପଭୋକ୍ତା କହିଛନ୍ତି, “ଆମ ଅଞ୍ଚଳକୁ ଆସନ୍ତୁ, ମୁଁ ଆପଣଙ୍କୁ ମାତ୍ର ୨୫ ଟଙ୍କାରେ ଶୁଦ୍ଧ ଦେଶୀ ଚା ପିଆଇବି। ତୁମେ ଏଠାକାର ପରିବେଶକୁ ମଧ୍ୟ ପସନ୍ଦ କରିବ। ଲୋକମାନେ ପାଶ୍ଚାତ୍ୟ ସେବା ପାଇଁ ଚାୟୋସ ପରି ସ୍ଥାନକୁ ଯାଆନ୍ତି, ସେଠାରେ ପରିବେଷିତ ଖାଦ୍ୟକୁ ଉପଭୋଗ କରିବା ପାଇଁ ନୁହେଁ।” ସେହିପରି ଅନ୍ୟ ଜଣେ ଉପଭୋକ୍ତା ଲେଖିଛନ୍ତି, ସାର୍, ଆପଣ ନିଶ୍ଚିତ ଭାବରେ ଏକ ସାଧାରଣ ରାସ୍ତା କଡ଼ରେ ଥିବା ଦୋକାନରୁ ଚା ପିଇବା ଉଚିତ୍ ।
ସାଇମନ୍ ୱଙ୍ଗ ଏହି ପୋଷ୍ଟ କରିବା ପରଠାରୁ ୬ଲକ୍ଷରୁ ଅଧିକ ଲୋକ ଦେଖିସାରିଲେଣି । ପୋଷ୍ଟରେ ଏଯାବତ୍ ୮ ହଜାରରୁ ଅଧିକ ଲୋକ ଲାଇକ୍ କରିଥିବା ବେଳେ ୭୫୦ ଥର ରିଟ୍ୱିଟ କରାଯାଇଛି। ଏହି ପୋଷ୍ଟଟି ଚାୟୋସର ସିଇଓ ନିତିନ ସାଲୁଜାଙ୍କ ଧ୍ୟାନ ମଧ୍ୟ କେନ୍ଦ୍ରିତ କରିଥିଲା । ପୋଷ୍ଟରେ ପ୍ରତିକ୍ରିୟା ପ୍ରକାଶ କରି ସାଲୁଜା କହିଛନ୍ତି, ” ଭାରତ-ସିଙ୍ଗାପୁର ମଧ୍ୟରେ ଥିବା ଗଭୀର ବନ୍ଧୁତା ନାଁରେ ମୁଁ ଆପଣଙ୍କୁ ଆମ ନିକଟସ୍ଥ ଚାୟୋସରେ ଏକ କପ୍ ଚା’ ପିଇବା ପାଇଁ ଆମନ୍ତ୍ରଣ କରୁଛି । ଯେତେବେଳେ ଆମେ ଏକାଠି ଚା’ ପିଇବା ସେତେବେଳେ ଆମେ ଆମର ସଠିକ ଭାବରେ ଚା’ ଦେବାର ପ୍ରଣାଳୀ କହିବିଠ ।
ଏହି ପୋଷ୍ଟ ପରେ ସାଇମନ୍ ୱଙ୍ଗ ଭାରତରେ ଘରେ ତିଆରି ଚାକୁ ପ୍ରଶଂସା କରିଥିଲେ। ସେ କହିଛନ୍ତି, “ମୁଁ ଚା ପିଇବାକୁ ଅନେକ ନିମନ୍ତ୍ରଣ ପାଇଛି, ଯାହା ମୋତେ ବହୁତ ଖୁସି କରେ। ମୁଁ ନମ୍ର ଭାବରେ ସମସ୍ତଙ୍କୁ ଧନ୍ୟବାଦ ଦେଉଛି।”