ଲକ୍ଷ୍ନୌ: ପାକିସ୍ତାନ ପାଖରେ ଯଦି ପରମାଣୁ ବୋମା ଅଛି ତେବେ ଆମ ପାଖରେ ନରେନ୍ଦ୍ର ମୋଦି ଅଛନ୍ତି । ଏପରି କହି କଂଗ୍ରେସ ନେତା ମଣି ଶଙ୍କର ଆୟରଙ୍କ ଉପରେ ବର୍ଷିଛନ୍ତି ଭାରତୀୟ ଜନତା ଯୁବ ମୋର୍ଚ୍ଚା ସାଂସଦ ତେଜସ୍ୱୀ ସୂର୍ଯ୍ୟା । ଲୋକସଭା ନିର୍ବାଚନର ପ୍ରଚାର ପାଇଁ ଉତ୍ତରପ୍ରଦେଶରେ ପହଞ୍ଚିଥିବାବେଳେ, ଏକ ଜାତୀୟ ଗଣମାଧ୍ୟମ ସହ ସାକ୍ଷାତକାର ସମୟରେ ସେ ଏପରି କହିଛନ୍ତି ।
କିଛି ସମୟ ପୂର୍ବରୁ ମଣି ଶଙ୍କର ଆୟାରଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି ଯେଉଁଥିରେ ମଣି ଶଙ୍କର ତାଙ୍କର ଏକ ସାକ୍ଷାତକାରରେ କହିଛନ୍ତି ଯେ ପଡୋଶୀ ଦେଶରେ ପରମାଣୁ ବୋମା ଥିବାରୁ ଭାରତ ପାକିସ୍ତାନକୁ ସମ୍ମାନ ଦେବା ଉଚିତ୍ । ଯଦି ଭାରତ ପାକିସ୍ତାନକୁ ସମ୍ମାନ ଦେବ ନାହିଁ ତେବେ ସେମାନେ ଆମ ବିରୋଧରେ ପରମାଣୁ ବୋମା ବ୍ୟବହାର କରିବାକୁ ନିଷ୍ପତ୍ତି ନେଇପାରନ୍ତି । ପାକିସ୍ତାନକୁ ପ୍ରତ୍ୟାଖ୍ୟାନ କରିବା ଠିକ ନୁହେଁ ବୋଲି ଆୟର କହିଛନ୍ତି । ଏହି ସାକ୍ଷାତକାରରେ ଆୟର ପାକିସ୍ତାନକୁ ସମର୍ଥନ କରୁଥିବା ଦେଖିବାକୁ ମିଳିଛି ।
ତେବେ ତେଜସ୍ୱୀଙ୍କ ବ୍ୟତୀତ ଆହୁରି ଅନେକ ବିଜେପି ନେତା ଆୟରଙ୍କ ଉପରେ ବର୍ଷିଛନ୍ତି । ଶେହଜାଦ ପୁନାୱାଲା କହିଛନ୍ତି ଯେ, ପାକିସ୍ତାନ ପ୍ରତି କଂଗ୍ରେସର ପ୍ରେମ ବନ୍ଦ ହେବାର କୌଣସି ନା ଗନ୍ଧ ଦେଖିବାକୁ ମିଳୁନାହିଁ । କଂଗ୍ରେସ ତରଫରୁ ଆୟର ପାକିସ୍ତାନର ଶକ୍ତି ପ୍ରଦର୍ଶନ କରୁଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ଆୟର କହିଛନ୍ତି ପାକିସ୍ତାନକୁ ସମ୍ମାନ ଦିଆଯିବା ଉଚିତ୍, ସେହି ପାକିସ୍ତାନ ହିଁ ଆମ ଦେଶକୁ ଆତଙ୍କବାଦୀ ପଠାଉଛି ।
ସେହିପରି କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ମଧ୍ୟ ଏହି ବିବୃତ୍ତିରେ କହିଛନ୍ତି ଯେ, କଂଗ୍ରେସ ନେତା ଭାରତରେ ରୁହନ୍ତି କିନ୍ତୁ ପାକିସ୍ତାନରେ ତାଙ୍କ ହୃଦୟରେ ରହଛି । ପାକିସ୍ତାନର କେଉଁଠୁ ସାହସ ଅଛି? କିପରି ଉପଯୁକ୍ତ ଉତ୍ତର ଦେବାକୁ ହେବ ତାହା ଭାରତକୁ ଜଣା ।
Comments are closed.