ରଜୌରୀ: ଆତଙ୍କବାଦୀମାନେ ଗୁରୁବାର ଦିନ ଜମ୍ମୁ କଶ୍ମୀରର ପୁଞ୍ଚ ଜିଲ୍ଲାର ଦୁଇଟି ସେନା ଗାଡି ଉପରେ ଆକ୍ରମଣ କରିବାରୁ ତିନିଜଣ ଯବାନ ସହିଦ ହୋଇଛନ୍ତି । ଅନ୍ୟ ତିନିଜଣ ଆହତ ହୋଇଛନ୍ତି। ଏହି ଘଟଣା ଜିଲ୍ଲାର ରଜୌରୀ ସେକ୍ଟରରେ ଘଟିଛି ଯେଉଁ ଅଞ୍ଚଳରେ ଗତ କିଛି ମାସ ହେବ ଆତଙ୍କବାଦୀ କାର୍ଯ୍ୟକଳାପର ପୁନର୍ବାର ଆରମ୍ଭ ହୋଇଛି।
ଖବର ଅନୁଯାୟୀ, ଆତଙ୍କବାଦୀମାନେ ସୁରାନକୋଟର ଡେରା କି ଗୋଲି (ଡି.କେ.ଜି) ଜଙ୍ଗଲ ଅଞ୍ଚଳ ଦେଇ ଯାଉଥିବା ସେନାର ଟ୍ରକ୍ ଉପରେ ଆକ୍ରମଣ କରିଥିଲେ। ଆତଙ୍କବାଦୀମାନେ କନଭୟ ଉପରକୁ ଗୁଳି ଚଳାଇଥିଲେ । ଏହାପରେ ସୁରକ୍ଷା ବାହିନୀ ଏବଂ ଆକ୍ରମଣକାରୀଙ୍କ ମଧ୍ୟରେ ଗୁଳି ବିନିମୟ ଘଟିଥିଲା।
ଭାରତୀୟ ସେନା ଏହାର ତୁରନ୍ତ ଜବାବ ଦେଇଥିଲା । ପରେ ଏହି ଅଞ୍ଚଳରେ ଅତିରିକ୍ତ ବାହିନୀ ନିୟୋଜିତ କରି ଏକ କର୍ଡନ ଏବଂ ସର୍ଚ୍ଚ ଅପରେସନ ଆରମ୍ଭ କରିଥିଲା। ସମ୍ପ୍ରତି ଅପରେସନ ଚାଲିଛି ଏବଂ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ପ୍ରବଳ ଗୁଳି ବିନିମୟ ହେଉଛି।
ମାସକ ମଧ୍ୟରେ ଏହି ଆକ୍ରମଣ ହେଉଛି ଦ୍ୱିତୀୟ ଘଟଣା। ଗତ ମାସରେ, ରଜୌରୀ କାଲାକୋଟେରେ ଆତଙ୍କବାଦୀ ବିରୋଧୀ ଅପରେସନ ସମୟରେ ଦୁଇ ସେନା କ୍ୟାପଟେନ ଏବଂ ଅନେକ ସୈନିକ ସହିଦ ହୋଇଥିଲେ। ସର୍ବଶେଷ ଆକ୍ରମଣ ହୋଇଥିବା ଥାନାମାଣ୍ଡି ଅଞ୍ଚଳ ନିକଟ ଅତୀତରେ ଆତଙ୍କବାଦୀଙ୍କ ଆଶ୍ରୟସ୍ଥଳୀ ପାଲଟିଛି।
ଗତ କିଛି ବର୍ଷ ମଧ୍ୟରେ ରଜୌରୀ-ପୁଞ୍ଚ ଅଞ୍ଚଳରେ ଅନେକ ଆତଙ୍କବାଦୀ ଆକ୍ରମଣ ଘଟିଛି। ୨୦୦୩ ରୁ ୨୦୨୧ ମଧ୍ୟରେ, ଏହି ଅଞ୍ଚଳରେ ଆପେକ୍ଷିକ ଶାନ୍ତି ଫେରିଥିଲା କିନ୍ତୁ ସେହି ଦିନଠାରୁ ବାରମ୍ବାର ଏନକାଉଣ୍ଟର ହୋଇଥିବାର ଖବର ଆସିଥିଲା ଢ କେବଳ ଗତ ଦୁଇ ବର୍ଷ ମଧ୍ୟରେ ଏହି ଅଞ୍ଚଳରେ ଆତଙ୍କବାଦୀ ବିରୋଧୀ କାର୍ଯ୍ୟରେ ୩୫ ରୁ ଅଧିକ ଯବାନ ପ୍ରାଣ ହରାଇଥିବା ସୂଚନା ରହିଛି ।