ମଣିଷ ପିଲା ପରି କାନ୍ଦେ ଏହି ଚଢେଇ, ଲୋକେ ହୁଅନ୍ତି ବିଚଳିତ

ସିଡନୀ: ଦୁନିଆରେ ଭିନ୍ନ ଭିନ୍ନ ପ୍ରଜାତିର ପଶୁପକ୍ଷୀ ଅଛନ୍ତି । ପ୍ରତ୍ୟେକ ପଣୁପକ୍ଷୀଙ୍କ ବିଷୟରେ ଏବେ ବି ସୂଚନା ଅଜଣା ହୋଇ ରହିଛି । ଏବେ ସୋସିଆଲ ମିଡିଆରେ ଏକ ପକ୍ଷୀର ଭିଡ଼ିଓ ଭାଇରାଲ ହେଉଛି, ଯାହା ଆପଣଙ୍କୁ ଆଶ୍ଚର୍ଯ୍ୟ କରିବ । ଏହି ପକ୍ଷୀଟି ଅବିକଳ ଛୋଟ ପିଲାଙ୍କ ପରି କାନ୍ଦିଥାଏ । ଅର୍ଥାତ୍ ସେ ଏମିତି ବୋବାଏ ଲାଗେ ସତେ ଯେମିତି ଏକ ଛୋଟ ପିଲା କେଉଁଠି କାନ୍ଦୁଛି ।

ସାଧାରଣତଃ ଛୋଟ ପିଲାଟିଏ କାନ୍ଦିଲେ ତାହା ସମସ୍ତଙ୍କ ହୃଦୟକୁ ବିଚଳିତ କରିଦିଏ । ଠିକ୍ ସେମିତି ଏହି ଚଢେଇଟି ଯେଉଁଠି ବୋବାଏ ଲୋକେ ତାହାର ଶବ୍ଦ ଶୁଣି ବିଚଳିତ ମଧ୍ୟ ହୋଇପଡ଼ନ୍ତି । ଏହି ପକ୍ଷୀଟିର ନାଁ ହେଉଛି ଲାୟରବାର୍ଡ । ଏହାର ଏଭଳି ସ୍ୱର ଶୁଣିଲେ ଯେ କେହି ଭ୍ରମରେ ପଡିଯାଆନ୍ତି । ଆଉ କେଉଁଠି ଏକ ପିଲା କାନ୍ଦୁଛି ବୋଲି ଲୋକେ ଭାବନ୍ତି । ତେବେ ପ୍ରକୃତ କଥା ହେଉଛି ଶବ୍ଦକୁ ଶୁଣି ମନେ ରଖିବା ଶକ୍ତି ଏହି ପକ୍ଷୀର ଅଛି । ତାସହ ଅବିକଳ ସେହିଭଳି ଶବ୍ଦ କରି ବୋବାଇବାର ବି ଅଜବ କଳା ତା’ର ଅଛି । ନିକଟରେ ସିଡନୀର ତରୋଙ୍ଗ ଚିଡିଆଖାନାରେ ଥିବା ଏକ ଲାୟର ବାର୍ଡ ଏଭଳି ବୋବାଇ ଚର୍ଚ୍ଚାର ବିଷୟ ପାଲଟିଥିଲା । ଚିଡିଆଖାନା କର୍ମକର୍ତ୍ତାଙ୍କ ଅନୁସାରେ ଚଢେଇଟି କିଛିଦିନ ପୂର୍ବେ ଏକ ପିଲା କାନ୍ଦୁଥିବା ଶୁଣିଥିଲା । ତେଣୁ ତାକୁ ମନେ ରଖି ସେ ବି ପିଲାଙ୍କ ପରି ବୋବାଇ କାନ୍ଦିବାକୁ ଲାଗିଲା । ଏହି ଚଢେଇ ଆହୁରି ଅନେକ ପ୍ରକାରର ଶବ୍ଦ ମଧ୍ୟ ବାହାର କରିପାରେ ।