ଚାନ୍ଦବାଲି: ନାବାଳିକା ଝିଅ ଏବଂ ମା’ଙ୍କୁ ଘୋଷାଡ଼ି ଘୋଷାଡ଼ି ମାଡ଼ ମାରିବା ଘଟଣାରେ ଭଦ୍ରକ ଏସପି ଚାନ୍ଦବାଲି ଥାନାର ଏଏସଆଇ, କନେଷ୍ଟବଳ ଏବଂ ହୋମଗାର୍ଡଙ୍କୁ ଭଦ୍ରକ ପୋଲିସ ମୁଖ୍ୟାଳୟକୁ ବଦଳି ହୋଇଛନ୍ତି। ଏସପି ପ୍ରାଥମିକ ଭାବେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ପୋଲିସ ଏବେ ଏହି ମାମଲାର ତଦନ୍ତ କରୁଛି। ରିପୋର୍ଟ ଆସିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସପି କହିଛନ୍ତି।
ଭାଇରାଲ ଭିଡିଓରେ ଦେଖିବାକୁ ମିଳୁଛି ଯେ ମହିଳା ଜଣକ ତାଙ୍କୁ ସୁରକ୍ଷା ଦେବା ପାଇଁ ବହୁ ଚେଷ୍ଟା କରୁଥିବା ବେଳେ ୪ ଜଣ ବ୍ୟକ୍ତି ତାଙ୍କୁ ଉଭୟ ଗୋଡ଼ ଓ ହାତରେ ଧରି ଥାନା ପରିସରରୁ ଟେକି ଟେକି ନେଇଯାଉଛନ୍ତି। ତାଙ୍କ ପୋଷାକ ଖସି ଯାଉଛି କିନ୍ତୁ ଚାରିଜଣ ତାଙ୍କୁ ତାଙ୍କ ଶରୀରକୁ ଧରି ଥାନା ବାହାରେ ଫିଙ୍ଗି ଦେଉଛନ୍ତି।
ଭାଇରାଲ ଭିଡିଓକୁ ଏପର୍ଯ୍ୟନ୍ତ ଯାଞ୍ଚ କରାଯାଇନାହିଁ। ଏ ନେଇ ଚାନ୍ଦବାଲି ଏସଡିପିଓ କାର୍ତ୍ତିକ ଚନ୍ଦ୍ର ମଲ୍ଲିକଙ୍କୁ ପଚାରିବାରୁ ସେ କହିଥିଲେ, ଆମ ନଜରକୁ ଏକ ଭିଡିଓ ଆସିଛି। କାହିଁକି ଏଭଳି ଭିଡିଓ ରେକର୍ଡ କରାଯାଇଛି ଏବଂ କେଉଁ ପରିସ୍ଥିତିରେ ଏହି ଘଟଣା ଘଟିଛି ସେ ନେଇ ତଦନ୍ତ ଚାଲିଛି। ତଦନ୍ତ ରିପୋର୍ଟ ଆଧାରରେ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏପରି କହି ନିଜ ସହଯୋଗୀଙ୍କ ଉପରେ ଆସିଥିବା ଅଭିଯୋଗକୁ ସୁରକ୍ଷା ଦେଉଥିବା ଅଭିଯୋଗ ହୋଇଛି।
ମିଳିଥିବା ସୂଚନା ଅନୁଯାୟୀ ନିର୍ଯାତନାର ଶିକାରର ମହିଳାଙ୍କ ସ୍ବାମୀ ଥାନାରେ ଅଟକ ଅଛନ୍ତି। ତାଙ୍କୁ ନେବା ପାଇଁ ଆସି ଥାନା ଆଗରେ ପ୍ରତିବାଦ କରୁଛନ୍ତି ମହିଳା ଜଣଙ୍କ। ଏହି ସମୟରେ ଛୋଟ ଝିଅଟି ଖେଳୁଥିବା ବେଳେ ଏକ ଜୋତା ଖୋଳକୁ ଥାନା ପରିସରକୁ ଫିଙ୍ଗିଦେଇଥିଲା। ଏହାପରେ ଥାନାରେ ଥିବା ଏସଆଇ ଏବଂ ତାଙ୍କ ସହଯୋଗୀ ଉଭୟ ମା ଏବଂ ଝିଅଙ୍କୁ ମାଡ଼ ମାରିଥିଲେ।