ଆଜି ଭୁବନେଶ୍ୱରରୁ ରାଉରକେଲା ବିମାନ ସେବାର ଶୁଭାରମ୍ଭ, ଉପସ୍ଥିତ ରହିବେ କେନ୍ଦ୍ରମନ୍ତ୍ରୀ ସିନ୍ଧିଆ ଓ ମୁଖ୍ୟମନ୍ତ୍ରୀ

ଭୁବନେଶ୍ୱର: ଆଜି ଭୁବନେଶ୍ୱରରୁ ରାଉରକେଲାକୁ ବହୁ ପ୍ରତୀକ୍ଷିତ ବିମାନ ଉଡାଣ ଭରିବ। ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଭିଡିଓ କନଫରେନ୍ସିଂ ଜରିଆରେ ଏହି ସେବା ଉଦଘାଟନ କରିବେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସକାଳ ୧୦ଟା ୪୫ରେ ଭୁବନେଶ୍ୱରର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରୁ ପ୍ରଥମ ବିମାନ ଉଡ଼ାଣ ବେଳେ ଉପସ୍ଥିତ ରହିବେ। ଏହା ସହିତ ଭୁବନେଶ୍ୱର, ଝାରସୁଗୁଡା ଏବଂ ଜୟପୁର ପରେ ଓଡ଼ିଶାର ଚତୁର୍ଥ ସ୍ଥାନ ଭାବରେ ରାଉରକେଲା ବିମାନବନ୍ଦର ମାନଚିତ୍ରରେ ଯୋଡି ହୋଇଛି।

ରିପୋର୍ଟ ଅନୁଯାୟୀ, ୭୨ ଜଣ ଯାତ୍ରୀଙ୍କ କ୍ଷମତା ବିଶିଷ୍ଟ ଏକ ଆଲିଆନ୍ସ ଏୟାର ବିମାନ ଭୁବନେଶ୍ୱର ଏବଂ ରାଉରକେଲା ମଧ୍ୟରେ ବିମାନ ସେବା ଦେବ। ଉଦଘାଟନ ପରେ ଜାନୁଆରୀ ୧୨ରୁ ରୁଟିନ୍ ବିମାନ ସେବା ଆରମ୍ଭ ହେବ।

ଆଲାଏନ୍ସ ଏୟାରର ଏଟିଆର-୭୨ ବିମାନ ଭୁବନେଶ୍ୱରରୁ ପ୍ରତିଦିନ ଅପରାହ୍ନ ୨ଟା ୫୫ ରେ ଉଡ଼ାଣ ଭରିବ ଏବଂ ଅପରାହ୍ନ ୩ଟା ୫୦ ରେ ରାଉରକେଲାରେ ପହଞ୍ଚିବ। ଏହାର ପ୍ରତ୍ୟାବର୍ତ୍ତନ ସମୟରେ ବିମାନଟି ରାଉରକେଲା ଠାରୁ ୪ଟା ୧୫ ରେ ଯାତ୍ରା କରିବ ଏବଂ ଭୁବନେଶ୍ୱରରେ ୫ଟା ୧୦ରେ ପହଞ୍ଚିବ। ଭୁବନେଶ୍ୱର – ରାଉରକେଲା ଭଡା ୨୮୦୩ ଟଙ୍କା ଧାର୍ଯ୍ୟ କରାଯାଇଛି ଏବଂ ରିଟର୍ନ ଭଡା ୨୭୨୧ ଟଙ୍କା ରହିଛି।

ଭୁବନେଶ୍ୱରକୁ ରାଉରକେଲା ସହିତ ବିମାନ ଯୋଗେ ସଂଯୋଗ କରିବା ଓଡିଶାବାସୀଙ୍କ ଦୀର୍ଘ ଦିନର ଦାବି। ଆରସିଏସ ଯୋଜନା ଅନ୍ତର୍ଗତ ଆଲିଆନ୍ସ ଏୟାରକୁ ଏହି ମାର୍ଗ ପ୍ରଦାନ କରାଯାଇଛି ବୋଲି ଓପିଟିଭି ସହ ବିପିଆଇଏ ନିର୍ଦ୍ଦେଶକ ପ୍ରସନ୍ନ ପ୍ରଧାନ କହିଛନ୍ତି।

ଯଦିଓ ଏବେ ପ୍ରାରମ୍ଭିକ ସେବା ଭୁବନେଶ୍ୱର ଏବଂ ରାଉରକେଲା ମଧ୍ୟରେ ରହିଛି, ତେବେ କୋଲକାତା ପର୍ଯ୍ୟନ୍ତ ଆଲାଇନ୍ସ ଏୟାର ପାଇଁ ସ୍ଲଟ୍ ଆବଣ୍ଟନ କରାଯାଇଛି। ହକି ବିଶ୍ୱକପ ପରେ ଏହି ସଂପ୍ରସାରଣ ହୋଇପାରେ। ଏହି ବିମାନ ରାଉରକେଲା-କୋଲକାତାକୁ ମଧ୍ୟ ସେବା ଦେଇପାରେ ବୋଲି ପ୍ରଧାନ କହିଛନ୍ତି।