ଭୁବନେଶ୍ବର: ୨୦୧୯-୨୦୨୪ ଆର୍ଥିକ ବର୍ଷ ଏବଂ ଡିସେମ୍ବର ୨୦୨୪-୨୫ ପର୍ଯ୍ୟନ୍ତ ମୋଟ ୪୮,୪୧୦,୧୩୧ ଜଣ ଘରୋଇ ଏବଂ ବିଦେଶୀ ପର୍ଯ୍ୟଟକ ଓଡ଼ିଶାର ବିଭିନ୍ନ ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ପରିଦର୍ଶନ କରିଛନ୍ତି । ସେହିପରି ମୋଟ ୨୨୩,୬୨୫ ଜଣ ବିଦେଶୀ ପର୍ଯ୍ୟଟକ ରାଜ୍ୟର ପର୍ଯ୍ୟଟନସ୍ଥଳୀ ପରିଦର୍ଶନ କରିଛନ୍ତି। ତେବେ ଏହି ସୂଚନା ଶନିବାର ଦିନ ରାଜ୍ୟ ବିଧାନସଭାରେ ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା ଦେଇଛନ୍ତି।
ନୟାଗଡ ବିଧାୟକ ଅରୁଣା କୁମାର ସାହୁଙ୍କ ଏକ ପ୍ରଶ୍ନର ଲିଖିତ ଉତ୍ତରରେ ଏହି ସୂଚନା ଦେଇଥିଲେ ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା ।
ପର୍ଯ୍ୟଟନ ମନ୍ତ୍ରୀ କହିଛନ୍ତି ଯେ, ପର୍ଯ୍ୟଟକ ପୁରୀ,କୋଣାର୍କ, ଭୁବନେଶ୍ୱର, ଧଉଳି, ବ୍ରହ୍ମପୁର, ଗୋପାଳପୁର, କେନ୍ଦ୍ରାପଡା, ପାରଳାଖେମୁଣ୍ଡି, ଭଞ୍ଜନଗର, ଆସ୍କା, ଚିଲିକା, ଫୁଲବାଣୀ, ବାଲିଗୁଡା, ବୌଦ୍ଧ, ଜୁନାଗଡ଼, ଟିଟିଲାଗଡ, କଣ୍ଟାବାଞ୍ଜି, ହରିଶଙ୍କର, ନୃସିଂହନାଥ, ବରଗଡ, ଝାରସୁଗୁଡା, ଦେବଗଡ, ରାଉରକେଲା, ସୁନ୍ଦରଗଡ, କେନ୍ଦୁଝର, ଆନନ୍ଦପୁର, ବଡ଼ବିଲ, ଘାଟଗାଁ, ବାରିପଦା, ଶିମିଳିପାଳ, ବାଙ୍ଗିରିପୋଷୀ, ଖିଚିଂ, ବାଲେଶ୍ବର ଆଦି ଅଞ୍ଚଳ ପରିଦର୍ଶନ କରିଛନ୍ତି। ରାଜ୍ୟର ସାଂସ୍କୃତିକ ଐତିହ୍ୟ, ବେଳାଭୂମି ଏବଂ ଐତିହାସିକ ସ୍ଥାନଗୁଡିକ ବହୁ ସଂଖ୍ୟାରେ ବିଦେଶୀ ପର୍ଯ୍ୟଟକଙ୍କୁ ଆକର୍ଷିତ କରିଛି ।
ବିଶ୍ୱ ପର୍ଯ୍ୟଟନ ମାନଚିତ୍ରରେ ଓଡ଼ିଶାର ସ୍ଥିତିକୁ ସୁଦୃଢ଼ କରିବା ପାଇଁ, ସରକାର ଏକ ବ୍ୟାପକ ରଣନୀତି କାର୍ଯ୍ୟକାରୀ କରିଛନ୍ତି, ଯେଉଁଥିରେ ପର୍ଯ୍ୟଟନ ଭିତ୍ତିଭୂମି ବିକାଶ ଅନ୍ତର୍ଗତ ପ୍ରମୁଖ ପର୍ଯ୍ୟଟନ ସ୍ଥଳଗୁଡ଼ିକରେ ପର୍ଯ୍ୟାୟକ୍ରମେ ସୌନ୍ଦର୍ଯ୍ୟକରଣ କାର୍ଯ୍ୟକ୍ରମ ଚାଲିଛି। ଅନ୍ତର୍ଜାତୀୟ ସମ୍ପର୍କ ଯୋଜନାରେ ଡବ୍ଲୁଟିଏମ ଲଣ୍ଡନ, ଏଟିଏମ ଦୁବାଇ ଏବଂ ଆଇଟିବି ବର୍ଲିନ୍ ଭଳି ପ୍ରମୁଖ ଅନ୍ତର୍ଜାତୀୟ ପର୍ଯ୍ୟଟନ କାର୍ଯ୍ୟକ୍ରମଗୁଡ଼ିକରେ ଅଂଶଗ୍ରହଣ ଏବଂ ସିଙ୍ଗାପୁର, ଭିଏତନାମ ଏବଂ ଥାଇଲାଣ୍ଡରେ ରୋଡ୍ ସୋ’ ଅନୁଷ୍ଠିତ ହୋଇଛି।ସେହିପରି ରାଜ୍ୟ ସରକାର ଓଡ଼ିଶାର ପର୍ଯ୍ୟଟନ ସ୍ଥଳଗୁଡ଼ିକର ପ୍ରଚାର ପାଇଁ ଟେଲିଭିଜନ, ଖବରକାଗଜ, ଡିଜିଟାଲ୍ ପ୍ଲାଟଫର୍ମ ଏବଂ ସୋସିଆଲ ମିଡିଆ ସମେତ ମଲ୍ଟି-ଚ୍ୟାନେଲ୍ ବ୍ରାଣ୍ଡିଂ ରଣନୀତି ବ୍ୟବହାର କରୁଛନ୍ତି। ବୌଦ୍ଧ ସର୍କିଟ୍ ବିକାଶରେ ବୌଦ୍ଧ ପର୍ଯ୍ୟଟନର ଏକ ପ୍ରମୁଖ ଆକର୍ଷଣ ଭାବରେ ହୀରକ ତ୍ରିଭୁଜ (ରତ୍ନଗିରି, ଉଦୟଗିରି, ଲଳିତଗିରି)ର ବିକଶିତ କରିବା ପାଇଁ ପ୍ରୟାସ ଜାରି ରହିଛି।
ଭାରତର ପ୍ରମୁଖ ଭ୍ରମଣ ଗନ୍ତବ୍ୟସ୍ଥଳ ମଧ୍ୟରୁ ଗୋଟିଏ ଭାବରେ ଏହାର ସ୍ଥାନକୁ ଆହୁରି ସୁଦୃଢ଼ କରିବାର ଆଶା ରହିଛି ବୋଲି ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି ।
Comments are closed.