ନୟାଗଡ: ନୟାଗଡ଼ ଜିଲ୍ଲାରେ ମଙ୍ଗଳବାର ଦୁଇଟି ପୃଥକ ଦୁର୍ଘଟଣାରେ ଦୁଇ ଜଣଙ୍କର ମୃତ୍ୟୁ। ମଙ୍ଗଳବାର ସନ୍ଧ୍ୟାରେ ବଜ୍ରପାତ ଯୋଗୁଁ ନୟାଗଡ଼ର ଖଣ୍ଡପଡ଼ା ଅଞ୍ଚଳରେ ଗଛ ଗୁଡ଼ିକ ଜଳିଯାଇଛି। ଖଲିସାହି ଠାରେ ଏକ ଗଛର ଡାଳ ଭାଙ୍ଗି ଅଟୋ ରିକ୍ସା ଉପରେ ପଡ଼ିିଯିବାରୁ ଅଟୋ ଭିତରେ ଥିବା ଜଣେ ମହିଳାଙ୍କ ମୃତ୍ୟୁ ଘଟିଛି।
ମୃତକଙ୍କ ସ୍ୱାମୀ କହିଛନ୍ତି, ସେମାନେ ଏକ ଅଟୋରେ ଘରକୁ ଫେରୁଥିବା ବେଳେ ବଜ୍ରପାତ ହୋଇଥିଲା। ଫଳରେ ସେମାନେ କିଛି ସମୟ ପାଇଁ ରାସ୍ତାରେ ଅଟକି ଯାଇଥିଲେ। କିନ୍ତୁ କିଛି ସମୟ ପରେ ଅଟୋ ରିକ୍ସା ଉପରେ ଗଛର ଡାଳ ପଡ଼ିଯିବାରୁ ତାଙ୍କ ପତ୍ନୀଙ୍କ ମୃତ୍ୟୁ ହୋଇଥିଲା ବୋଲି କହିଛନ୍ତି। ଏହି ଦୁର୍ଘଟଣାରେ ଅଟୋରେ ବସିଥିବା ଅନ୍ୟ ତିନି ଜଣ ମହିଳା ଗୁରୁତର ଆହତ ହୋଇଛନ୍ତି।ଦୁର୍ଘଟଣା ପରେ ଆହତମାନଙ୍କୁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସେହିପରି ଗଣିଆ ଥାନା ଅନ୍ତର୍ଗତ କିଶୋର ଚନ୍ଦ୍ର ହାଇସ୍କୁଲ ସମ୍ମୁଖରେ ଜଣେ ଆଇସ୍କ୍ରିମ୍ ବେପାରୀଙ୍କର ସମାନ ଢଙ୍ଗରେ ମୃତ୍ୟୁ ଘଟିଛି। ମୃତ ନାଭା ଖଟୁଆଙ୍କ ଘର ଖଣ୍ଡପଡ଼ା ଥାନା ଅନ୍ତର୍ଗତ ମାଧବେରେଣୀ ଗ୍ରାମରେ ବୋଲି ଜଣାପଡ଼ିଛି। ସୂତ୍ରରୁ ପ୍ରକାଶ, ବର୍ଷା ସମୟରେ ଖଟୁଆ ସ୍କୁଲ ସମ୍ମୁଖରେ ଥିବା ଏକ ଆମ୍ବ ଗଛ ତଳେ ଆଶ୍ରୟ ନେଇଥିଲେ। ତେବେ ଗଛରୁ ଏକ ଡାଳ ଖସି ଖଟୁଆଙ୍କୁ ତଳେ ଚାପି ଦେଇଥିଲା। ସ୍ଥାନୀୟ ଲୋକେ ଅଗ୍ନିଶମ ବିଭାଗକୁ ଫୋନ୍ କରି ତାଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
Comments are closed.