କଟକ:ଜିରୋ ପାଟାଲିଟି ସପ୍ତାହ ପାଳନ ଚାଲିଛି । ମୃତ୍ୟୁ ସଂଖ୍ୟା ଶୂନ କରିବାକୁ ପରିବହନ ବିଭାଗ ସଚେତନତା ସୃଷ୍ଟି କରୁଛି । ଏପଟେ ଘଟିଚାଲିଛି ଗୋଟିଏ ପରେ ଗୋଟିଏ ଦୁର୍ଘଟଣା । ଗଡି ଚାଲିଛି ମୁଣ୍ଡ । ଝାରସୁଗୁଡା ଜାତୀୟ ରାଜପଥରେ ବିଳମ୍ବିତ ରାତିରେ ତିନୋଟି ଟ୍ରକ ମୁହାଁମୁହିଁ ଧକ୍କା ଘଟି ୩ ଡ୍ରାଇଭର ଜୀବନ୍ତ ଜଳି ଯାଇଥିଲେ । ଏପଟେ କଟକ ବିଡାନାସୀ ନିକଟରେ ମଧ୍ୟ ଏକ ଟ୍ରକ ଓ କାର ମୁହାଁମୁହିଁ ଧକ୍କା ଘଟି ଜଣଙ୍କର ଜୀବନ ଯାଇଥିଲା । ଅନ୍ୟ ୨ ଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି ।
କଟକ ବିଡାନାସୀ ମଶାଣି ଛକ ନିକଟରେ ଗତକାଲି ବିଳମ୍ବିତ ରାତିରେ ଘଟିଥିଲା ଦୁର୍ଘଟଣା । କାର ଓ ଟ୍ରକ ମୁହାଁମୁହିଁ ପିଟି ହୋଇଥିଲେ । ଘଟଣାସ୍ଥଳରେ ଜଣଙ୍କର ଜୀବନ ଚାଲି ଯାଇଥିଲା । ଅନ୍ୟ ୨ ଜଣ ଗୁରୁତର ଅବସ୍ଥାରେ ମୃତ୍ୟୁ ସହ ଲଢୁଛିନ୍ତି । ଢେଙ୍କାନାଳ ଜିଲ୍ଲାର ଏହି ୩ ଜଣ ବ୍ୟକ୍ତି ଏକ କାରରେ ଘର ଅଭିମୁଖେ ଫେରୁଥିଲେ । ହେଲେ ବିଡାନାସୀ ମଶାଣୀ ଛକ ନିକଟରେ ସାମ୍ନା ପଟୁ ଆସୁଥିବା ଟ୍ରକ କାରଟିକୁ ପିଟି ଥିଲା ।
ଦୁର୍ଘଟଣାରେ କାରର ସମ୍ମୁଖ ଭାଗ ସମ୍ପୂର୍ଣ୍ଣ ଭାଙ୍ଗି ଯାଇଛି । ପୋଲିସ ଟ୍ରକକୁ ଜବତ କରି ଡ୍ରାଇଭରକୁ ଅଟକ ରଖିଛି । ଗୁରୁତରଙ୍କୁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି ।
Comments are closed.