ବାଲ୍ୟ ବିବାହକୁ ନେଇ ଜାତିସଂଘ ମହାସଚିବଙ୍କ ବଡ଼ ବୟାନ, ଟ୍ରେଣ୍ଡ ଅନୁଯାୟୀ ରୋକିବାକୁ ୩୦୦ ବର୍ଷ ଲାଗିବ

ନୂଆଦିଲ୍ଲୀ: ବୁଧବାର ଅନ୍ତର୍ଜାତୀୟ ବାଳିକା ଦିବସ ଥିଲା। ଏହି ଅବସରରେ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ କଡ଼ା ଚେତାବନୀ ଦେଇ କହିଛନ୍ତି, ସାରା ବିଶ୍ୱ ବାଲ୍ୟ ବିବାହକୁ ନେଇ ଫେଲ୍ ମାରୁଛି। ସେ କହିଛନ୍ତି ଯେ, ବର୍ତ୍ତମାନର ଟ୍ରେଣ୍ଡ ଯେଉଁଭଳି ଆଗକୁ ବଢ଼ୁଛି, ବାଲ୍ୟ ବିବାହର ଅନ୍ତ ହେବାକୁ ଆଉ ୩୦୦ ବର୍ଷ ଲାଗିବ। ଆଉ ୧୧୦ ନିୟୁତ ଯୁବତୀ ଓ ଯୁବତୀ ଯେଉଁମାନେ ଶ୍ରେଣୀଗୃହରେ ରହିବା ଉଚିତ୍ ସେମାନେ ୨୦୩୦ ବେଳକୁ ରହିବେ ନାହିଁ।

ଝିଅମାନଙ୍କ ପ୍ରତି ପୂର୍ବରୁ ହେଉଥିବା ବିଭିନ୍ନ ପ୍ରକାରର ଭେଦଭାବ ଜାରି ରହିଥିବା କଥା ମଧ୍ୟ ଗୁଟେରେସ୍ ଉଲ୍ଲେଖ କରିଛନ୍ତି, ଆଉ ସେହି ନୂଆ ନୂଆ ପ୍ରକାରର ପକ୍ଷପାତିତା ଓ ଅସମାନତା ଦେଖାଦେଉଛି ବୋଲି ସେ କହିଛନ୍ତି। ଆଫଗାନିସ୍ତାନରେ ଝିଅମାନେ ନିଜର ମୌଳିକ ଅଧିକାର ଓ ସ୍ୱାଧୀନତାର ବ୍ୟବହାର କରିପାରୁନାହାନ୍ତି। ସାରା ବିଶ୍ୱରେ ଅନେକ ଝିଅ ଅନଲାଇନ ଦୁନିଆରୁ ବାଦ ପଡୁଛନ୍ତି।

ଆହ୍ୱାନ ସତ୍ତ୍ୱେ ଗୁଟେରେସ୍ ଦର୍ଶାଇଛନ୍ତି ଯେ ସାରା ବିଶ୍ୱରେ ଝିଅମାନେ ପ୍ରତିଆକ୍ରମଣର ମୁକାବିଲା କରୁଛନ୍ତି। ଆମେ ସେମାନଙ୍କ ସହ ଠିଆ ହେବା ସହ ସେମାନଙ୍କ ନେତୃତ୍ୱରେ ବିନିଯୋଗ କରିବା ଆବଶ୍ୟକ ବୋଲି ସେ କହିଛନ୍ତି। ସେ ଏହା ମଧ୍ୟ କହିଛନ୍ତି ଯେ ଆମକୁ ମନୋଭାବ ବଦଳାଇବା ଏବଂ ପରିବର୍ତ୍ତନ ଆଣିବା ଆବଶ୍ୟକ ଏବଂ ଝିଅମାନଙ୍କ ଆବଶ୍ୟକତାକୁ ପୂରଣ କରିବା ପାଇଁ ନୀତି ଏବଂ ସମାଧାନକୁ ଆଗକୁ ନେବା ଆବଶ୍ୟକ।

ୟୁଏନଏସଜିର ଏହି ଚେତାବନୀକୁ ୟୁଏନ୍ ଓ୍ବିମେନ ଆଣ୍ଡ୍ ଅନ୍ଦେସା ପକ୍ଷରୁ ପ୍ରକାଶିତ ଏକ ରିପୋର୍ଟରେ ପ୍ରତିଧ୍ୱନିତ କରାଯାଇଛି, ଯେଉଁଥିରେ କୁହାଯାଇଛି ଯେ “ବୈଶ୍ୱିକ ପ୍ରୟାସ ସତ୍ତ୍ୱେ ବିଶ୍ୱ ଲିଙ୍ଗଗତ ସମାନତା ହାସଲ କରିବାରେ ବିଫଳ ହେଉଛି। ଏହି ରିପୋର୍ଟରେ ଚେତାବନୀ ଦିଆଯାଇଛି ଯେ, ଯଦି ବର୍ତ୍ତମାନର ଧାରା ଜାରି ରହେ, ତା’ହେଲେ ୩୪୦ ନିୟୁତରୁ ଅଧିକ ମହିଳା ଏବଂ ବାଳିକା ବିଶ୍ୱର ମହିଳା ଜନସଂଖ୍ୟାର ଆନୁମାନିକ ୮% – ୨୦୩୦ ସୁଦ୍ଧା ଅତ୍ୟଧିକ ଦାରିଦ୍ର୍ୟରେ ବଞ୍ଚିବେ ଏବଂ ପ୍ରତି ଚାରିଜଣଙ୍କ ମଧ୍ୟରୁ ଜଣେ ମଧ୍ୟମ କିମ୍ବା ଗୁରୁତର ଖାଦ୍ୟ ନିରାପତ୍ତାହୀନତାର ସମ୍ମୁଖୀନ ହେବେ।

କ୍ଷମତା ଓ ନେତୃତ୍ୱ ପଦବୀରେ ଲିଙ୍ଗଗତ ବ୍ୟବଧାନ ଏବେ ବି ବଳବତ୍ତର ରହିଛି ବୋଲି ରିପୋର୍ଟରେ ଦର୍ଶାଯାଇଛି, ଏବଂ ବର୍ତ୍ତମାନର ପ୍ରଗତି ହାରରେ, ଆଗାମୀ ପିଢ଼ିର ମହିଳାମାନେ ଏବେ ବି ପୁରୁଷଙ୍କ ତୁଳନାରେ ଦୈନିକ ହାରାହାରି ୨.୩ ଘଣ୍ଟା ଅଧିକ ସମୟ ଅବୈତନିକ ଯତ୍ନ ଓ ଘରୋଇ କାମରେ ବିତାଉଛନ୍ତି ବୋଲି କୁହାଯାଉଛି।