ପୁରୀ: ବିଶ୍ୱ ଶିଶୁ ଦିବସ ପାଳନ କରିବା ଅବସରରେ ବାର୍ତ୍ତା ଦେଇଛି ୟୁନିସେଫ। ୟୁନିସେଫ୍ ଓଡ଼ିଶା ଦ୍ଵାରା ବୁଧବାର ପୁରୀରେ ଏକ ବାଲୁକା କଳା ପ୍ରଦର୍ଶନୀ ଅନୁଷ୍ଠିତ ହୋଇଛି। ଏହି ପ୍ରଦର୍ଶନୀରେ ଚଳିତ ବର୍ଷ ପାଇଁ ‘ଭବିଷ୍ୟତ ପାଇଁ ଆହ୍ଵାନ୍’ ନାମକ ଥିମ ରହିଛି। ଏହି ଥିମ ସମ୍ପର୍କିତ ଚିତ୍ରକଳା, ପିଲାମାନଙ୍କର ହସୁଥିବା ଚେହେରାକୁ ପ୍ରଦର୍ଶନ କରି ଭବିଷ୍ୟତ ଗଠନରେ ସେମାନଙ୍କ ମତର ଗୁରୁତ୍ୱକୁ ଦର୍ଶାଇଥିଲା ୟୁନିସେଫ । ବାଲୁକା ଶିଳ୍ପୀ ମାନସ ସାହୁ ୮ ଘଣ୍ଟା ମଧ୍ୟରେ ୧୨ ଟନ୍ ବାଲି ବ୍ୟବହାର କରି ୧୫ ଫୁଟ ଓସାର, ୫ ଫୁଟ ଉଚ୍ଚର ବାଲୁକା ମୂର୍ତ୍ତି ନିର୍ମାଣ କରିଛନ୍ତି।
ଏହି ଅବସରରେ ୟୁନିସେଫ୍ ଓଡିଶା ରାଜ୍ୟ କାର୍ଯ୍ୟାଳୟ ମୁଖ୍ୟ ୱିଲିୟମ୍ ହାନଲୋନ୍ (ଜୁନିଅର୍) କହିଛନ୍ତି, ଆଜି ଜଳବାୟୁ ପରିବର୍ତ୍ତନ, ବହୁଳ ପ୍ରଯୁକ୍ତିବିଦ୍ୟା ଏବଂ ଜନସଂଖ୍ୟା ପରିବର୍ତ୍ତନ ସହିତ ପିଲାମାନେ ଅପ୍ରତ୍ୟାଶିତ ଅସୁବିଧାର ସମ୍ମୁଖୀନ ହେଉଛନ୍ତି । ଏହି ଅସୁବିଧା ଗୁଡ଼ିକ ପାଇଁ ୨୦୫୦ ସୁଦ୍ଧା ଆମେ ତାଙ୍କୁ କେଉଁ ପ୍ରକାରର ବାଲ୍ୟ ସମୟ ପ୍ରଦାନ କରିବାକୁ ଚାହୁଁଛୁ, ଏହା ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ। ଏହି ବାଲୁକା କଳା ମାଧ୍ୟମରେ ଆମେ ଏକ ସକରାତ୍ମକ ବାର୍ତ୍ତା ପହଞ୍ଚାଇବାକୁ ଲକ୍ଷ୍ୟ ରଖିଛୁ ଏବଂ ପ୍ରତ୍ୟେକ ଶିଶୁର ଅଧିକାର ତଥା କଲ୍ୟାଣ ପାଇଁ ଆମର ପ୍ରତିବଦ୍ଧତାକୁ ନିଶ୍ଚିତ କରିଛୁ।’
ସୂଚନାଯୋଗ୍ୟ, ୧୯୮୯ରେ ଶିଶୁ ଅଧିକାର ସମ୍ମିଳନୀରେ ପ୍ରତିବର୍ଷ ନଭେମ୍ବର ୨୦ରେ ବିଶ୍ୱ ଶିଶୁ ଦିବସ ପାଳନ କରିବା ନିମନ୍ତେ ନିଷ୍ପତ୍ତି ଗ୍ରହଣ କରାଯାଇଥିଲା। ଏହା ପିଲାମାନଙ୍କୁ ପ୍ରଭାବିତ କରୁଥିବା ଗୁରୁତ୍ଵପୂର୍ଣ୍ଣ ସମସ୍ୟାର ସମାଧାନ ପାଇଁ ଏକ ପ୍ଲାଟଫର୍ମ ଭାବେ କାର୍ଯ୍ୟ କରିଥାଏ। ଏହା ସହିତ ସେମାନଙ୍କୁ ସେମାନଙ୍କର ଅଧିକାର ପାଇଁ ନିଜର ମତ ରଖିବାକୁ ସାହାସ ମଧ୍ୟ ଦେଇଥାଏ।
Comments are closed.