ଲକ୍ଷ୍ନୌ: ଆତଙ୍କବାଦୀଙ୍କ ବିରୋଧରେ ଉତ୍ତରପ୍ରଦେଶ ପୋଲିସକୁ ବଡ଼ ସଫଳତା ମିଳିଛି । ଆଇଏସଆଇଏସ (ISIS) ସହ ଜଡିତ ଦୁଇ ଆତଙ୍କବାଦୀଙ୍କୁ ଆଲିଗଡରୁ ପୋଲିସ ଗିରଫ କରିଛି । ସେମାନଙ୍କଠାରୁ ଆଇଏସଆଇଏସ ସହ ଜଡିତ ଅନେକ ଆପତ୍ତିଜନକ ସାମଗ୍ରୀ ମଧ୍ୟ ଜବତ କରିଛି ପୋଲିସ ।
ଏ ସମ୍ପର୍କରେ ଉତ୍ତରପ୍ରଦେଶ ପୋଲିସର ଆତଙ୍କବାଦ ବିରୋଧୀ ଶାଖା କହିଛି ଯେ, ଗତ କିଛି ଦିନ ହେବ ସେମାନେ ଏନେଇ ସୂଚନା ପାଇଥିଲେ ଯେ କିଛି ଲୋକ ଏହାର ଆଦର୍ଶ ଦ୍ୱାରା ପ୍ରଭାବିତ ହେବା ପରେ ଆଇଏସଆଇଏସର ଶପଥ ନେଇଛନ୍ତି । ଏହା ସହିତ ସେମାନେ ଦେଶ ବିରୋଧୀ କାର୍ଯ୍ୟ କରିବାକୁ ଷଡ଼ଯନ୍ତ୍ର କରୁଛନ୍ତି ।
ପୋଲିସ କହିଛି ଯେ, ଆଇଏସଆଇଏସ ସହ ଜଡିତ ଲୋକଙ୍କ ନିର୍ଦ୍ଦେଶରେ ଏହି ଲୋକମାନେ ଦେଶରେ ଆତଙ୍କବାଦୀ ଜିହାଦ ପାଇଁ ଏକ ଗୋଷ୍ଠୀ ଗଠନ କରୁଛନ୍ତି । ଏହା ସହିତ, ସେମାନଙ୍କ ଲିଡରଙ୍କ ନିର୍ଦ୍ଦେଶରେ ସେମାନେ ଉତ୍ତରପ୍ରଦେଶରେ କିଛି ବଡ଼ କାଣ୍ଡ ଘଟାଇବାକୁ ଯୋଜନା କରିଥିଲେ ।
ଏଟିଏସ୍ (ATS) ଏକ ପ୍ରେସ ବିଜ୍ଞପ୍ତି ଜାରି କରି କହିଛି ଯେ, ଗିରଫ ଦୁଇ ଯୁବକ ହେଲେ ଆଲିଗଡର ବାସିନ୍ଦା ଅବଦୁଲ୍ଲା ଅର୍ସଲାନ୍ ଏବଂ ମାଜ୍ ବିନ୍ ତାରିକ ।
ଉଭୟଙ୍କ ଠାରୁ ଆଇଏସ୍ଆଇଏସ (ISIS) ର ମୁଦ୍ରିତ ପ୍ରତିବନ୍ଧିତ ସାହିତ୍ୟ ଏବଂ ଆଇଏସ୍ଆଇଏସ ଆପତ୍ତିଜନକ ପ୍ରଚାର ରେ ପରିପୂର୍ଣ୍ଣ ଏକ ପେନ୍ ଡ୍ରାଇଭ୍ ଜବତ କରାଯାଇଛି । ଗିରଫ ପରେ ପୋଲିସ ଉଭୟଙ୍କୁ କୋର୍ଟରେ ଉପସ୍ଥାପନ କରିଥିଲା ଯେଉଁଠାରେ ସେମାନଙ୍କୁ ନ୍ୟାୟିକ ହେପାଜତକୁ ପଠାଯାଇଛି ।