ଥାଇଲ୍ୟାଣ୍ଡରୁ ଭୁଟାନ ସବୁଠି ଚାଲିବ UPI!

ନୂଆଦିଲ୍ଲୀ: ଭାରତର ୟୁପିଆଇର ସଫଳତାର ଚର୍ଚ୍ଚା ସମଗ୍ର ବିଶ୍ୱରେ ହେଉଛି । ଭାରତର ୟୁପିଆଇ ଅନେକ ଦେଶରେ ବ୍ୟବହୃତ ହେଲାଣି । ଏହି କ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବର୍ତ୍ତମାନ BIMSTEC ଦେଶମାନଙ୍କୁ ଭାରତର ୟୁନିଫାଏଡ୍ ପେମେଣ୍ଟ ଇଣ୍ଟରଫେସ୍ (UPI) କୁ ସେମାନଙ୍କ ପେମେଣ୍ଟ ସିଷ୍ଟମ ସହିତ ସଂଯୋଗ କରିବାକୁ ପ୍ରସ୍ତାବ ଦେଇଛନ୍ତି। ବାଣିଜ୍ୟ ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବା ଏହି ପଦକ୍ଷେପର ଉଦ୍ଦେଶ୍ୟ ।

ବିମ୍ସଟେକ (BIMSTEC)ରେ ବାଂଲାଦେଶ, ଭୁଟାନ, ଭାରତ, ମିଆଁମାର, ନେପାଳ, ଶ୍ରୀଲଙ୍କା ଏବଂ ଥାଇଲ୍ୟାଣ୍ଡ ଅନ୍ତର୍ଭୁକ୍ତ । ଏହି ଦେଶଗୁଡିକର ଦେୟ ପ୍ରଣାଳୀ ସହିତ UPIକୁ ସଂଯୋଗ କରିବା ଦ୍ବାରା ନେଣଦେଣରେ ସହଜ ହେବ, ଯାହାଦ୍ୱାରା ବାଣିଜ୍ୟ ଏବଂ ପର୍ଯ୍ୟଟନ ବୃଦ୍ଧି ପାଇବ । ଏହି ପଦକ୍ଷେପ ଡିଜିଟାଲ ଦେୟକୁ ପ୍ରୋତ୍ସାହିତ କରିବ ଏବଂ ଆଞ୍ଚଳିକ ଅର୍ଥନୈତିକ ସହଯୋଗକୁ ଦୃଢ କରିବାରେ ସହାୟକ ହେବ ।

UPIର ସଫଳତା ବିଶ୍ବରେ ଆଲୋଚନା ହେଉଛି । ବର୍ତ୍ତମାନ ସାତୋଟି ଦେଶରେ ଏହା ଉପଲବ୍ଧ, ଏଥିମଧ୍ୟରେ ଭୁଟାନ, ମରିସସ୍, ନେପାଳ, ସିଙ୍ଗାପୁର, ଶ୍ରୀଲଙ୍କା ଏବଂ ଫ୍ରାନ୍ସ ରହିଛି। BHIM, PhonePe, Paytm ଏବଂ Google Pay ପରି କୋଡିଏଟି ଆପ୍ ଏହି ଆନ୍ତର୍ଜାତୀୟ କାରବାରକୁ ସମର୍ଥନ କରେ ।

ୟୁପିଆଇ ମାଧ୍ୟମରେ କାରବାର ସଂଖ୍ୟା ବାର୍ଷିକ ୪୨ ପ୍ରତିଶତ ବୃଦ୍ଧି ପାଇ ୨୦୨୪ ର ଦ୍ୱିତୀୟାର୍ଦ୍ଧରେ ୯୩.୨୩ ବିଲିୟନରେ ପହଞ୍ଚିଛି। ଏହା ଏକ ରିପୋର୍ଟରେ କୁହାଯାଇଛି। ୱାର୍ଲ୍ଡଲାଇନର ୨୦୨୪ ର ଅନ୍ତିମ ଛଅ ମାସର ଇଣ୍ଡିଆ ଡିଜିଟାଲ୍ ପେମେଣ୍ଟ ରିପୋର୍ଟ ଅନୁଯାୟୀ, ତିନୋଟି ୟୁପିଆଇ ପ୍ଲାଟଫର୍ମ ଫୋନପେ, ଗୁଗୁଲ୍ ପେ ଏବଂ ପେଟିଏମ୍ ର ପ୍ରାଧାନ୍ୟ ବିସ୍ତାର ହୋଇଛି । କାରବାର ଦୃଷ୍ଟିରୁ, ଡିସେମ୍ବର ୨୦୨୪ରେ ସମସ୍ତ କାରବାରରେ ଏହି ତିନୋଟି ଆପ୍ ର ବ୍ୟବହାର ୯୩ ପ୍ରତିଶତ ଥିଲା।