ମାତିଛନ୍ତି ସାଇବର ଠକ; ବ୍ୟାଙ୍କ ବାଲାନ୍ସ ଯାଞ୍ଚ କରିବା ମାତ୍ରେ ଆକାଉଣ୍ଟ ହେଇଯିବ ଖାଲି

ଭୁବନେଶ୍ବର:ଏବେ ସାଇବର ଠକମାନେ ଏକ ନୂତନ ପଦ୍ଧତି ବାହାର କରିଛନ୍ତି । ଯାହାଦ୍ବାରା ସେମାନେ ୟୁପିଆଇ ବ୍ୟବହାରକାରୀଙ୍କ ବ୍ୟାଙ୍କ ଆକାଉଣ୍ଟରୁ ଟଙ୍କା ଉଠାଇ ପାରିବେ। ଏହାକୁ ‘ଜମ୍ପ ଡିପୋଜିଟ୍ ​​ସ୍କାମ୍’ କୁହାଯାଉଛି। ଏହି ଠକମାନେ ଏତେ ଚତୁର ଯେ ଆକାଉଣ୍ଟରୁ ଟଙ୍କା ନେଇଯିବେ ଆପଣ ଜାଣିପାରିବେ ନାହିଁ ।

ସାଇବର ଠକମାନେ ସର୍ବପ୍ରଥମେ ୟୁପିଆଇ ମାଧ୍ୟମରେ ଜଣେ ବ୍ୟକ୍ତିଙ୍କ ବ୍ୟାଙ୍କ ଆକାଉଣ୍ଟକୁ ଅଳ୍ପ ଟଙ୍କା ପଠାନ୍ତି । ଯେତେବେଳେ ଆକାଉଣ୍ଟକୁ ଟଙ୍କା ଆସିଥାଏ, ଲୋକମାନେ ସାଧାରଣତଃ ନିଜର ବ୍ୟାଙ୍କ ବାଲାନ୍ସ ଯାଞ୍ଚ କରିବାକୁ ୟୁପିଆଇ ଆପ୍ ଖୋଲନ୍ତି । ସେମାନେ ସେମାନଙ୍କର ୟୁପିଆଇ ଆପ୍ ରେ ପିନ୍ ଟାଇପ୍ କରିବା ମାତ୍ରେ ସାଇବର ଠକ ସେମାନଙ୍କ ଖେଳ ଆରମ୍ଭ କରନ୍ତି | ଏହିଠାରେ ସ୍କାମରମାନେ ଲୋକଙ୍କ ଆକାଉଣ୍ଟରୁ ଟଙ୍କା ଗାୟବ କରି ଦିଅନ୍ତି ।

ଉଦାହରଣସ୍ବରୂପ, ସ୍କାମରମାନେ ପ୍ରଥମେ ଆପଣଙ୍କ ବ୍ୟାଙ୍କ ଖାତାରେ ହଜାରେ ପାଞ୍ଚହଜାରେ ଟଙ୍କା ଜମା କରନ୍ତି । ଆପଣ ଏହି ଟଙ୍କା ଦେଖିବା ପରେ ଉତ୍ସାହିତ ହୁଅନ୍ତି ଏବଂ ଏହି ଟଙ୍କା କେଉଁଠୁ ଆସିଛି ଜାଣିବା ପାଇଁ ବ୍ୟାଙ୍କିଙ୍ଗ୍ ଆପ୍ ଖୋଲନ୍ତି । କିନ୍ତୁ, ଏଠାରେ ଏକ ଗଡବଡ କାମ ହୋଇଥାଏ । ସ୍କାମରମାନେ ଟଙ୍କା ଉଠେଇବା ପାଇଁ ଅନୁରୋଧ ପଠାନ୍ତି, ଯାହାର ପରିମାଣ ବହୁତ ଅଧିକ ଥାଏ । ଯେତେବେଳେ ଆପଣ ପିନ୍ ପ୍ରବେଶ କରି ବାଲାନ୍ସ ଯାଞ୍ଚ କରନ୍ତି,ଆପଣ ଅଜାଣତରେ ସ୍କାମରଙ୍କ ଦ୍ୱାରା ପଠାଯାଇଥିବା ଟଙ୍କା ଉଠେଇବା ଅନୁରୋଧକୁ ଗ୍ରହଣ କରିଦିଅନ୍ତି । ସ୍କାମରମାନେ ଏହାର ଫାଇଦା ଉଠାନ୍ତି ଏବଂ ଆପଣ ଏହା ଜାଣିବା ପୂର୍ବରୁ, ଆପଣଙ୍କର ଆକାଉଣ୍ଟ୍ ଖାଲି ହୋଇଯାଏ ।

ଏହାର ଅର୍ଥ ସ୍କାମରମାନେ ଆପଣଙ୍କ ଆକାଉଣ୍ଟରୁ ଟଙ୍କା ଉଠେଇ ଦେଇଥାନ୍ତି । ଏହି ସ୍କାମ୍ ଚିହ୍ନଟ କରିବା କଷ୍ଟକର କାରଣ ଲୋକମାନେ ଭାବନ୍ତି ଯେ ସେମାନେ କେବଳ ନିଜର ବ୍ୟାଙ୍କ ବାଲାନ୍ସ ଯାଞ୍ଚ କରୁଛନ୍ତି ।

ଏହି ଠକାମିରୁ ନିଜକୁ କିପରି ରକ୍ଷା କରିବେ ..

– ଯଦି ଆପଣଙ୍କର ଅଜଣାତରେ କୌଣସି ସ୍ଥାନରୁ ଆପଣଙ୍କ ଆକାଉଣ୍ଟରେ ଟଙ୍କା ଜମା ହୁଏ, ତୁରନ୍ତ ଆକାଉଣ୍ଟ ବାଲାନ୍ସ ଯାଞ୍ଚ କରନ୍ତୁ ନାହିଁ ।

-ବ୍ୟାଙ୍କକୁ ଏହା ବିଷୟରେ ପଚାରନ୍ତୁ ।

-ଯଦି କୌଣସି ସ୍ଥାନରୁ ହଠାତ୍ ଆପଣଙ୍କ ଆକାଉଣ୍ଟରେ ଟଙ୍କା ଜମା ହୁଏ, ତେବେ ଏହି ଠକାମିକୁ ଏଡାଇବା ପାଇଁ ଆପଣଙ୍କର ବାଲାନ୍ସ ଯାଞ୍ଚ କରିବା ପୂର୍ବରୁ ଅତି କମରେ ୩୦ ମିନିଟ୍ ଅପେକ୍ଷା କରନ୍ତୁ ।

– ପ୍ରଥମ ଥର ଆପଣଙ୍କର ସଠିକ୍ PIN ଲେଖନ୍ତୁ ନାହିଁ ।

-ଆପଣଙ୍କର PIN କିମ୍ବା OTP କାହା ସହିତ ସେୟାର କରନ୍ତୁ ନାହିଁ ।