ନୂଆଦିଲ୍ଲୀ: ଆମେରିକାରେ ରାଷ୍ଟ୍ରପତି ନିର୍ବାଚନ ପ୍ରକ୍ରିୟା ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇନାହିଁ। ଜୋ ବାଇଡେନ୍ ଏବଂ ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ କଡା ସଂଘର୍ଷ ଜାରି ରହିଛି। ଚଳିତ ବର୍ଷ ନିର୍ବାଚନକୁ ଯେତିକି ଉତ୍କଣ୍ଠା ଦେଖିବାକୁ ମିଳିଥିଲା ଏବଂ ଫଳାଫଳ ମଧ୍ୟ ସେତିକି ଆକର୍ଷଣୀୟ ହେଉଛି। ୧୨୦ ବର୍ଷର ଇତିହାସରେ ଏହା ହେଉଛି ପ୍ରଥମ ନିର୍ବାଚନ ଯେଉଁଥିରେ ସର୍ବାଧିକ ମତଦାନ ହୋଇଛି।
ରିପୋର୍ଟ ଅନୁଯାୟୀ, ଏଥର ପ୍ରାୟ ୧୬ କୋଟି ଆମେରିକୀୟ ଭୋଟର ମତଦାନ କରିଛନ୍ତି। ଯେତେବେଳେ ଆମେରିକାରେ ସମୁଦାୟ ଭୋଟରଙ୍କ ସଂଖ୍ୟା ପାଖାପାଖି ୨୩.୯ କୋଟି। ତେବେ ଏହି ସଂଖ୍ୟା ଆହୁରି ମଧ୍ୟ ବୃଦ୍ଧି ପାଇପାରେ କାରଣ ଭୋଟ ଗଣନା ଏବେ ବି ଜାରି ରହିଛି।
ନଭେମ୍ବର ୩ରେ ଯୁକ୍ତରାଷ୍ଟ୍ରରେ ନିର୍ବାଚନ ଦିବସ ପାଳନ କରାଯାଇଥିଲା ଯେଉଁଥିରେ ପ୍ରାୟ ୬୬.୯ ପ୍ରତିଶତ ମତଦାନ ହୋଇଥିଲା। ୧୯୦୦ ପରେ ଆମେରିକାରେ ଅନୁଷ୍ଠିତ ହୋଇଥିବା କୌଣସି ନିର୍ବାଚନରେ ଏହା ସର୍ବାଧିକ ମତଦାନ। ୧୯୦୦ ନିର୍ବାଚନରେ ମୋଟ ୭୩.୭ ପ୍ରତିଶତ ମତଦାନ ହୋଇଥିଲା।