କୋଚି: ଉତ୍କଳିକା – କୋଚିନ ଓଡ଼ିଆ ସଂଘ ପକ୍ଷରୁ ୧୬ତମ ପ୍ରତିଷ୍ଠା ଦିବସ ସହିତ ଉତ୍କଳ ଦିବସ ୨୦୨୬କୁ କୋଚିର କୁଣ୍ଡାନୂର ସ୍ଥିତ ପେଟ୍ରୋ ହାଉସ୍ରେ ଭବ୍ୟ ଓ ଆନନ୍ଦମୟ ପରିବେଶରେ ତାରିଖ ୦୫ ଏପ୍ରିଲ ୨୦୨୬ ରେ ପାଳନ କରାଯାଇଥିଲା। ଏହି ଅବସରରେ ସଂଘର ସଦସ୍ୟମାନେ ଓ ଅତିଥିମାନଙ୍କର ଉଲ୍ଲେଖନୀୟ ଉପସ୍ଥିତି ଦେଖାଯାଇଥିଲା।
କାର୍ଯ୍ୟକ୍ରମଟି ଯୁଦ୍ଧରେ ପ୍ରାଣ ହରାଇଥିବା ନିର୍ଦ୍ଦୋଷ ଲୋକଙ୍କ ସ୍ମୃତିରେ ଏକ ମିନିଟ୍ ନୀରବତା ପାଳନ ସହ ଆରମ୍ଭ ହୋଇଥିଲା। ପରବର୍ତ୍ତୀକାଳରେ ପରମ୍ପରାଗତ ଭାବରେ ଦୀପ ପ୍ରଜ୍ୱଳନ ଓ ପ୍ରଭୁ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ପାଦପଦ୍ମରେ ପୁଷ୍ପାଞ୍ଜଳି ଅର୍ପଣ କରାଯାଇଥିଲା। ଉତ୍କଳିକାର ମହିଳା ଦଳଙ୍କ ଦ୍ୱାରା ‘ବନ୍ଦେ ଉତ୍କଳ ଜନନୀ’ର ଭାବପୂର୍ଣ୍ଣ ପାଠ ଉପସ୍ଥିତ ସମସ୍ତଙ୍କ ମନକୁ ଓଡ଼ିଆ ଗୌରବରେ ଭରିଦେଇଥିଲା।
ଆନୁଷ୍ଠାନିକ ଅଧିବେଶନରେ ଉପାଧ୍ୟକ୍ଷା ରୁବିତା ସାମନ୍ତ ଅଧ୍ୟକ୍ଷୀୟ ଉଦବୋଧନ ରଖି ସଂଘର କାର୍ଯ୍ୟକଳାପ ଓ ସଫଳତା ବିଷୟରେ ଆଲୋକ ପାତ କରିଥିଲେ। ସମ୍ପାଦକ ଡ଼ଃ ଅଶୁତୋଷ ଚୌଧୁରୀ ବାର୍ଷିକ ବିବରଣୀ ପାଠ କରିଥିଲେ ଏବଂ କୋଷାଧକ୍ଷ ଜ୍ଞାନ ରଞ୍ଜନ ସାମନ୍ତ ଆର୍ଥିକ ହିସାବ ଓ ବ୍ୟାଲାନ୍ସ ସିଟ୍ ଉପସ୍ଥାପନ କରିଥିଲେ।
ଏହି ଅବସରରେ ସଂଘର ବାର୍ଷିକ ସ୍ମରଣିକା ପୁସ୍ତିକା ‘ଚନ୍ଦ୍ରଭାଗା ୨୦୨୬’ର ଅଷ୍ଟମ ସଂସ୍କରଣ ଉଦ୍ଘାଟନ କରାଯାଇଥିଲା। ବିଶିଷ୍ଟ ଅତିଥି ଉମେଶ ଚନ୍ଦ୍ର ମହାପାତ୍ର, (ପୂର୍ବତନ ଉପ-ନିର୍ଦ୍ଦେଶକ, ମେରିନ ପ୍ରୋଡକ୍ଟ୍ସ ଡେଭଲପମେଣ୍ଟ ଅଥୋରିଟି) ଉଦ୍ବୋଧନ ରଖିଥିବାବେଳେ, ମୁଖ୍ୟ ଅତିଥି ଲୋକନାଥ ବେହେରା (ମ୍ୟାନେଜିଂ ଡାଇରେକ୍ଟର, କୋଚି ମେଟ୍ରୋ ରେଲ୍ ଲିମିଟେଡ୍), ଅତିଥି ସମ୍ମାନୀତ ସଂଗ୍ରାମ କୁମାର ମିଶ୍ର (ସିଏମ୍ଡି, ହିନ୍ଦୁସ୍ତାନ ଓର୍ଗାନିକ କେମିକାଲ୍ସ ଲିମିଟେଡ୍) ଓ ମୁଖ୍ୟ ବକ୍ତା ଅନମୟ ମିଶ୍ର (ଡିଜିଏମ୍, ବ୍ୟାଙ୍କ ଅଫ୍ ବରୋଦା) ଉତ୍ସାହବର୍ଦ୍ଧକ ଉଦ୍ବୋଧନ ଦେଇଥିଲେ।
ସାଂସ୍କୃତିକ କାର୍ଯ୍ୟକ୍ରମ ଅତ୍ୟନ୍ତ ଆକର୍ଷଣୀୟ ଥିଲା। ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପ୍ରାୟୋଜିତ ନଟରାଜ ଡାନ୍ସ ଏକାଡେମୀ, ଭଜନ ଭକ୍ତି ପ୍ରାର୍ଥନା, କୃଷ୍ଣମ୍ ଡାନ୍ସ, ସାଇ ଭକ୍ତି ସାଗର ଓ ଡାର୍କ ନାଇଟ୍ ବ୍ୟାଣ୍ଡର କଳାକାରମାନଙ୍କ ଦ୍ୱାରା ପ୍ରସ୍ତୁତ ସାଂସ୍କୃତିକ କାର୍ଯ୍ୟକ୍ରମ ସମସ୍ତଙ୍କୁ ମନୋମୁଗ୍ଧ କରିଥିଲା। ଉତ୍କଳିକାର ସଦସ୍ୟମାନେ ମଧ୍ୟ ନିଜ ନିଜ ପ୍ରତିଭା ପ୍ରଦର୍ଶନ କରିଥିଲେ।
ବିଶେଷ ଆକର୍ଷଣ ଥିଲା ରୁବିତା ସାମନ୍ତ ଓ ଶ୍ୱେତା ଚୌଧୁରୀଙ୍କ ସମ୍ବର୍ଦ୍ଧନା । ସେମାନେ ୧୨ ଅଗଷ୍ଟ ୨୦୨୩ରୁ ପ୍ରବାସୀ ଶ୍ରମିକଙ୍କ ଶିଶୁମାନଙ୍କୁ ଓଡ଼ିଆ ଭାଷା ଶିକ୍ଷା ଦେଇ ଆସୁଛନ୍ତି। ଓଡ଼ିଆ ଭାଷାର ସୁରକ୍ଷା ଓ ପ୍ରଚାର ପାଇଁ ସେମାନଙ୍କର ଏହି ପ୍ରୟାସକୁ ମୁଖ୍ୟ ଅତିଥିଙ୍କ ଦ୍ୱାରା ସମ୍ମାନିତ କରାଯାଇଥିଲା। ଶିକ୍ଷାର୍ଥୀମାନଙ୍କୁ ମଧ୍ୟ ଓଡ଼ିଆ ଭାଷା ଶିଖିବା ଓ ଅଭ୍ୟାସ ପାଇଁ ପ୍ରମାଣପତ୍ର ଦିଆଯାଇଥିଲା।
କାର୍ଯ୍ୟକ୍ରମଟିକୁ ଶ୍ରୀ ରଣଜିତ କୁମାର ପଣ୍ଡା ଓ ଶ୍ରୀ ସୌଭାଗ୍ୟ ମିଶ୍ର ସୁନ୍ଦର ଭାବରେ ସଂଚାଳନ କରିଥିଲେ। ଶେଷରେ ଶ୍ରୀ ଜ୍ଞାନରଞ୍ଜନ ସାମନ୍ତ ଧନ୍ୟବାଦ ଜ୍ଞାପନ କରି କାର୍ଯ୍ୟକ୍ରମର ସମାପନ କରିଥିଲେ।
ଏହି ଉତ୍ସବ ଉତ୍କଳିକା ସଂଘର ସାମୂହିକ ଏକତା, ସଂସ୍କୃତି ପ୍ରତି ନିଷ୍ଠା ଓ ପ୍ରବାସରେ ଓଡ଼ିଆ ପରିଚୟକୁ ସଜାଗ ରଖିବାର ଦୃଢ଼ ସଙ୍କଳ୍ପକୁ ପୁନର୍ବ୍ୟକ୍ତ କରିଥିଲା।