Latest Odisha News

BREAKING NEWS

୨୦୨୬ ନିର୍ବାଚନରେ ଏମ୍‌.କେ. ଷ୍ଟାଲିନଙ୍କୁ ପରାସ୍ତ କରିଥିବା ଟିଭିକେ ବିଧାୟକ ଭି.ଏସ୍. ବାବୁଙ୍କ ପରଲୋକ

ଚେନ୍ନାଇ: ତାମିଲନାଡୁ ରାଜନୀତିର ଜଣେ ଟାଣୁଆ ନେତା ତଥା କୋଲାଥୁର ନିର୍ବାଚନମଣ୍ଡଳୀର ବିଧାୟକ ଭି.ଏସ୍. ବାବୁଙ୍କର ଆଜି ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୭୫ ବର୍ଷ ବୟସ ହୋଇଥିଲା। ଚେନ୍ନାଇସ୍ଥିତ ଏମ୍‌ଜିଏମ୍ ହେଲଥ୍‌କେୟାର ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଅପରାହ୍ଣ ୨ଟା ୨୪ ମିନିଟରେ ହୃଦ୍‌ଘାତ ଯୋଗୁଁ ତାଙ୍କର ଦେହାନ୍ତ ହୋଇଥିବା ହସ୍ପିଟାଲ ପକ୍ଷରୁ ଜାରି କରାଯାଇଥିବା ମେଡିକାଲ ବୁଲେଟିନରେ ସୂଚନା ଦିଆଯାଇଛି।

ଦୀର୍ଘ ଦିନ ଧରି ଶ୍ୱାସକ୍ରିୟା ଜନିତ ସମସ୍ୟାରେ ପୀଡ଼ିତ ଥିବା ଭି.ଏସ୍. ବାବୁ ଗତ ସେପ୍ଟେମ୍ବର ୯ ତାରିଖରୁ ହସ୍ପିଟାଲର ଆଇସିୟୁରେ ଭର୍ତ୍ତି ହୋଇଥିଲେ। ଡାକ୍ତରୀ ଦଳର ସମସ୍ତ ପ୍ରଚେଷ୍ଟା ସତ୍ତ୍ୱେ ଗତ ୭୦ ଦିନରୁ ଅଧିକ ସମୟ ଧରି ସଂଘର୍ଷ କରିବା ପରେ ଆଜି ସେ ଶେଷ ନିଶ୍ୱାସ ତ୍ୟାଗ କରିଛନ୍ତି।

ଉଲ୍ଲେଖଯୋଗ୍ୟ ଯେ, ଅଭିନେତାରୁ ରାଜନେତା ପାଲଟିଥିବା ସି. ଯୋଶେଫ ବିଜୟଙ୍କ ଦଳ ‘ତାମିଲଗା ଭେଟ୍ରି କାଝାଗମ’ (TVK) ଟିକେଟରେ ଲଢ଼ି ଭି.ଏସ୍. ବାବୁ ୨୦୨୬ ତାମିଲନାଡୁ ବିଧାନସଭା ନିର୍ବାଚନରେ ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲେ। ସେ ପୂର୍ବତନ ମୁଖ୍ୟମନ୍ତ୍ରୀ ତଥା *ଡିଏମ୍‌କେ ସୁପ୍ରିମୋ ଏମ୍‌.କେ. ଷ୍ଟାଲିନଙ୍କୁ ତାଙ୍କର ଗଡ଼ କୁହାଯାଉଥିବା କୋଲାଥୁର ଆସନରୁ ୮,୭୯୫ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରି ସାରା ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ । ୨୦୧୧ ମସିହାରୁ ଷ୍ଟାଲିନ ଏହି ଆସନରୁ ଲଗାତାର ଜିତି ଆସୁଥିଲେ।

ରାଜନୈତିକ କ୍ୟାରିୟରରେ ବାବୁ ପୂର୍ବରୁ ୨୦୦୬ରୁ ୨୦୧୧ ପର୍ଯ୍ୟନ୍ତ ଡିଏମ୍‌କେ ଟିକେଟରେ ପୁରାସାୱାଲକମ ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ। ପରବର୍ତ୍ତୀ ସମୟରେ ସେ ଏଆଇଏଡିଏମ୍‌କେରେ ଯୋଗ ଦେଇଥିଲେ ଏବଂ ୨୦୨୬ ଫେବୃଆରୀରେ ଟିଭିକେରେ ସାମିଲ ହୋଇଥିଲେ। ତାଙ୍କର ଅକାଳ ବିୟୋଗରେ ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କ ସମେତ ବିଭିନ୍ନ ରାଜନୈତିକ ଦଳର ନେତାମାନେ ଗଭୀର ଶୋକ ପ୍ରକାଶ କରିଛନ୍ତି ।

Leave A Reply

Your email address will not be published.