ନୂଆଦିଲ୍ଲୀ: ସଂସଦରେ ବଜେଟ୍ ଅଧିବେଶନର ଆଉ ଦୁଇ ଦିନ ବାକି ଥିବା ବେଳେ ଗୁରୁବାର ରାଜ୍ୟସଭାରେ ଓ୍ୱାକଫ୍ (ସଂଶୋଧନ) ବିଲ୍ ଉପସ୍ଥାପନ ହୋଇଛି। ଏହାପୂର୍ବ ଦିନ ଲୋକସଭାରେ ୧୨ ଘଣ୍ଟାର ଜୋରଦାର ଆଲୋଚନା ପରେ ପାସ ହୋଇଥିଲା। ଏବେ ରାଜ୍ୟସଭାରେ ଏହାର ଭାଗ୍ୟ ନିର୍ଣ୍ଣୟ ହେବ। ଏହି ସମୟରେ ବିଜେଡିର ଆଭିମୁଖ୍ୟ ଉପରେ ସମସ୍ତଙ୍କ ନଜର ରହିଛି । ଏହାରି ଭିତରେ ବିଜେଡି ସାଂସଦଙ୍କ ଟୁଇଟ୍ ମଧ୍ୟ ଚକିତ କରିଛି ।
ବିଜେଡି ଏହି ବିଲ୍ ଉପରେ ନିଜ ସାଂସଦଙ୍କୁ ହ୍ୱିପ୍ ଜାରି କରିନାହିଁ। ବରଂ ସେମାନଙ୍କୁ ନିଜ ବିବେକ ଅନୁସାରେ ଭୋଟ୍ ଦେବାକୁ କୁହାଯାଇଛି। ବିଜେଡି ସାଂସଦ ସସ୍ମିତ ପାତ୍ର ଏକ୍ସରେ ଲେଖିଛନ୍ତି, “ବିଜୁ ଜନତା ଦଳ ସବୁବେଳେ ଧର୍ମନିରପେକ୍ଷତା ଓ ସମାବେଶୀକରଣର ସିଦ୍ଧାନ୍ତକୁ ଧରିଛି। ଆମେ ସଂଖ୍ୟାଲଘୁ ସମ୍ପ୍ରଦାୟର ବିଭିନ୍ନ ମତାମତକୁ ଗମ୍ଭୀରତାର ସହ ବିଚାର କରିଛୁ। ତେଣୁ ଆମ ରାଜ୍ୟସଭା ସାଂସଦଙ୍କୁ ନ୍ୟାୟ, ସଦ୍ଭାବନା ଓ ସମସ୍ତଙ୍କ ଅଧିକାର ପାଇଁ ବିବେକ ଅନୁସାରେ ଭୋଟ୍ ଦେବାର ଦାୟିତ୍ୱ ଦେଇଛୁ। କୌଣସି ଦଳୀୟ ହ୍ୱିପ୍ ଜାରି ହୋଇନାହିଁ।”
ଏହା ପୂର୍ବରୁ ବିଜେଡି ଘୋଷଣା କରିଥିଲା ଯେ ସେ ରାଜ୍ୟସଭାରେ ଓ୍ୱାକଫ୍ ସଂଶୋଧନ ବିଲ୍, ୨୦୨୫ ଓ ମୁସଲମାନ ଓ୍ୱାକଫ୍ (ରିପିଲ୍) ବିଲ୍, ୨୦୨୪ ବିରୋଧ କରିବ। ସସ୍ମିତ ପାତ୍ର ଗଣମାଧ୍ୟମକୁ କହିଥିଲେ, “ଆମ ପକ୍ଷରୁ ରାଜ୍ୟସଭା ସାଂସଦ ମୁଜିବୁଲ୍ଲା ଖାନ ମୁସଲିମ ସମ୍ପ୍ରଦାୟର ପ୍ରତିନିଧିତ୍ୱ କରି କଥା ରଖିବେ। ବିଲ୍ରେ ଥିବା ଦୁର୍ବଳତା ବିଜେଡି ସଂସଦରେ ଉଠାଇବ।”
ବିଲ୍ ପାସ ପାଇଁ ରାଜ୍ୟସଭାରେ ଗଣିତ
ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ଏନଡିଏ ମେଣ୍ଟରେ ରାଜ୍ୟସଭାରେ ୧୧୭ ସାଂସଦ ଅଛନ୍ତି, ଯାହା ବହୁମତ ସଂଖ୍ୟା ୧୧୯ରୁ ମାତ୍ର ଦୁଇଟି କମ୍। ବିଜେପିର ୯୮ ସଦସ୍ୟ ରହିଥିବା ବେଳେ ଜେଡି(ୟୁ)ର ୪, ଏନସିପିର ୩, ଟିଡିପିର ୨ ଓ ଅନ୍ୟ ୧୦ଟି ଦଳର ଜଣେ ଜଣେ ସାଂସଦ ଅଛନ୍ତି। ଏହା ସହ ଦୁଇ ମନୋନୀତ ଓ ୬ ସ୍ୱାଧୀନ ସାଂସଦଙ୍କ ସମର୍ଥନ ମିଳିଲେ ଏନଡିଏର ସଂଖ୍ୟା ୧୨୫ ଛୁଇଁପାରେ।
ଅନ୍ୟପଟେ ବିରୋଧୀ ଇଣ୍ଡିଆ ମେଣ୍ଟର ରାଜ୍ୟସଭାରେ ୮୮ ସାଂସଦ ଅଛନ୍ତି। ଏଥିରେ କଂଗ୍ରେସର ୨୭, ତୃଣମୂଳ କଂଗ୍ରେସର ୧୩, ଡିଏମ୍କେ ଓ ଆପ୍ର ୧୦ ଜଣ ଲେଖାଏଁ, ଆରଜେଡିର ୫, ସମାଜବାଦୀ ପାର୍ଟି ଓ ସିପିଆଇ-ଏମ୍ର ୪ ଜଣ ଲେଖାଏଁ, ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ୩ ଓ ଅନ୍ୟ ଦଳର ସାଂସଦ ରହିଛନ୍ତି।
ଏହା ବ୍ୟତୀତ, ଏନଡିଏ ଓ ଇଣ୍ଡିଆ ମେଣ୍ଟ ବାହାରେ ୨୩ ସାଂସଦ ଅଛନ୍ତି। ଏମାନଙ୍କ ମଧ୍ୟରେ ଓଡ଼ିଶାର ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜୁ ଜନତା ଦଳ (ବିଜେଡି) ମଧ୍ୟ ରହିଛି। ବିଜେଡିର ରାଜ୍ୟସଭାରେ ସଂଖ୍ୟା ୯ରୁ କମି ୭କୁ ଖସିଆସିଛି । କାରଣ ଦୁଇ ସାଂସଦ ମମତା ମହନ୍ତ ଓ ସୁଜିତ କୁମାର ଦଳ ଛାଡ଼ି ବିଜେପିରେ ସାମିଲ ହୋଇ ଏବେ ରାଜ୍ୟସଭାରେ ବିଜେପିର ପ୍ରତିନିଧିତ୍ୱ କରୁଛନ୍ତି।
ବିଜେଡି ବିଜେପି ସଂପର୍କରେ ପରିବର୍ତ୍ତନ
ମୋଦୀ ୨.୦ ସମୟରେ ଓଡ଼ିଶାରେ ବିଜେଡି ଶାସନ ଥିବା ବେଳେ ବିଜେପି ସହ ଏହାର ସମ୍ପର୍କ ବେଶ୍ ସୁଦୃଢ଼ ଥିଲା। ବିଜେଡି ବିଜେପି ଓ କଂଗ୍ରେସଠାରୁ ‘ସମାନ ଦୂରତା’ ରଖୁଥିବା ଦାବି କରୁଥିଲେ ମଧ୍ୟ, ସଂସଦରେ ଆର୍ଟିକିଲ୍ ୩୭୦ ରଦ୍ଦ, ତିନି ତାଲାକ୍ ଓ ନାଗରିକତା ସଂଶୋଧନ ବିଲ୍ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଏନଡିଏକୁ ସମର୍ଥନ ଦେଇଥିଲା। ସେହିପରି ଦିଲ୍ଲୀ ସର୍ଭିସେସ ବିଲ୍ ଭଳି ବିବାଦୀୟ ବିଷୟରେ ମଧ୍ୟ ବିଜେଡି ସରକାରଙ୍କ ସପକ୍ଷରେ ଛିଡ଼ା ହୋଇଥିଲା, ଯାହାକୁ ବିରୋଧୀ ନେତାମାନେ ଅସାମ୍ବିଧାନିକ କହିଥିଲେ।
କିନ୍ତୁ ୨୦୨୪ ନିର୍ବାଚନରେ ବିଜେଡି ଲୋକସଭାରେ ଗୋଟିଏ ବି ଆସନ ଜିତି ନ ପାରିବା ଓ ବିଧାନସଭାରେ ୭୮କୁ ଖସି ଆସିବା ପରେ ନବୀନ ଘୋଷଣା କରିଥିଲେ ଯେ ଦଳ ଏବେ ଶକ୍ତିଶାଳୀ ବିରୋଧୀ ଭୂମିକା ନେବେ। ଜୁଲାଇ ୨୦୨୪ରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ପ୍ରଧାନମନ୍ତ୍ରୀଙ୍କ ଉତ୍ତର ସମୟରେ ବିଜେଡିର ୯ ସାଂସଦ ବିରୋଧୀ ଦଳ ସହ ଛିଡ଼ା ହୋଇଥିଲେ। ଦୁଇ ସାଂସଦ ଦଳ ଛାଡ଼ି ବିଜେପିରେ ଯୋଗ ଦେଇଥିବାରୁ ବିଜେଡି ବିଜେପି ଉପରେ ‘ଅପରେସନ୍ ଲୋଟସ୍’ ଚଲାଇଥିବା ଅଭିଯୋଗ କରିଥିଲା।
ଗତ ମାସରେ ବିଜେଡିର ଦୁଇ ନେତା ଅମର ପଟ୍ଟନାୟକ ଓ ସଞ୍ଜୟ ଦାସ ବର୍ମା ତାମିଲନାଡୁ ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନ୍ଙ୍କ ଦ୍ୱାରା ଆୟୋଜିତ ବୈଠକରେ ଯୋଗ ଦେଇଥିଲେ। ରାଜନୈତିକ ବିଶ୍ଲେଷକମାନେ ଏହାକୁ ବିଜେଡିର ବିଜେପି ପ୍ରତି ନୂଆ ଆଭିମୁଖ୍ୟ ବୋଲି କହିଥିଲେ। ଏବେ ଓ୍ୱାକଫ ବିଲ୍ ଉପରେ ହ୍ୱିପ୍ ଜାରି ନ କରି ସାଂସଦଙ୍କୁ ବିବେକ ଅନୁସାରେ ଭୋଟ୍ ଦେବାକୁ କହିବା ଦଳର ନୂଆ ଦିଗକୁ ସୂଚାଇଛି।
Comments are closed.