ଭୁବନେଶ୍ବର : ସୋମବାରଠାରୁ ଆକାଶ ନିର୍ମଳ ଓ ଖରାଟିଆ ପାଗ ରହିବ। ରାଜ୍ୟରେ ଖରାର ପ୍ରକୋପ ବଢ଼ିବା ସହ ଓ ଶୀତ ଫେରିବାର ସମ୍ଭାବନା କମ୍ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି।
ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ ଦେଇଥିବା ସୂଚନାନୁସାରେ, ଗତ ୨ ଦିନ ହେଲା ରାଜ୍ୟରେ ଲାଗି ରହିଥିବା କୋହଲା ପାଗ ଆଉ ରହିବ ନାହିଁ। ଆଜିଠାରୁ ପାଗ ଶୁଖିଲା ରହିବ। ସୋମବାରଠାରୁ ଖରାର ପ୍ରକୋପ ବଢ଼ିବ।
ଦିନର ତାପମାତ୍ରା ଅପେକ୍ଷାକୃତ ଅଧିକ ବଢ଼ିବ। ଭୁବନେଶ୍ବର, ମାଲକାନଗିରି, ଟିଟିଲାଗଡ଼, ତାଳଚେର ଆଦି କେତେକ ସ୍ଥାନରେ ୨୫ ବା ୨୬ ତାରିଖ ସର୍ବାଧିକ ତାପମାତ୍ରା ୩୮ଡିଗ୍ରିରୁ ଅଧିକ ରହିପାରେ।
ଆକଳନ କରାଯାଉଛି ଯେ, ଆସନ୍ତା ୨୬ ତାରିଖ ସୁଦ୍ଧା ଭୁବନେଶ୍ବର ସମେତ ଦକ୍ଷିଣ ଉପକୂଳ, କେନ୍ଦ୍ରୀୟ ଓଡ଼ିଶା ଓ ଉତ୍ତର ଓଡ଼ିଶାରେ ସର୍ବାଧିକ ତାପମାତ୍ରା ପ୍ରାୟ ୮ ଡିଗ୍ରି ବଢ଼ିବା ବେଳେ ଆଭ୍ୟନ୍ତରୀଣ ଦକ୍ଷିଣରେ ପ୍ରାୟ ୬ ଡିଗ୍ରି ବଢ଼ିବ। ସେହିପରି ସର୍ବନିମ୍ନ ତାପମାତ୍ରା ଦକ୍ଷିଣ ଉପକୂଳରେ ୪ ଡିଗ୍ରି ବଢ଼ିବା ବେଳେ ବାକି ଅଞ୍ଚଳରେ ପ୍ରାୟ ୬ ଡିଗ୍ରି ବଢ଼ିପାରେ।
ସୂଚନା ମୁତାବକ, ଗତ ୨୪ ଘଣ୍ଟାରେ କନ୍ଧମାଳ, ବରଗଡ଼, ଅନୁଗୁଳ, ଝାରସୁଗୁଡ଼ା ଓ ସମ୍ବଲପୁର ଆଦି ଜିଲ୍ଲାର କିଛି କିଛି ସ୍ଥାନରେ ବର୍ଷା ହୋଇଯାଇଛି। ଏହାଛଡ଼ା ରାଜ୍ୟର ଅବଶିଷ୍ଟ ଅଞ୍ଚଳରେ ପାଗ ଶୁଖିଲା ରହିଥିବା ବେଳେ ଜଗତସିଂହପୁର, ମାଲକାନଗିରି ଓ କନ୍ଧମାଳ ଆଦି ଜିଲ୍ଲାରେ ଆଜି ସକାଳୁ ହାଲ୍କା କୁହୁଡ଼ି ମଧ୍ୟ ଦେଖିବାକୁ ମିଳିଥିଲା। ଆଗକୁ ରାଜ୍ୟର ପାଗ ଶୁଖିଲା ରହିବ ଓ ଶୀତ ଦୂରେଇ ଯିବ ବୋଲି ଜଣାପଡ଼ିଛି।