ଏହି ଦେଶରେ ସବୁଠୁ ବେଶୀ ଭାରତୀୟ….

ନୂଆଦିଲ୍ଲୀ: ଜନସଂଖ୍ୟା ଦୃଷ୍ଟିରୁ ଭାରତ ଏବେ ବିଶ୍ୱର ସବୁଠାରୁ ବଡ଼ ଦେଶ ପାଲଟିଛି । ଆଉ ଭାରତରେ ବିଶ୍ୱର ସବୁଠାରୁ ବଡ଼ ପ୍ରବାସୀ ସମ୍ପ୍ରଦାୟ ବି ରହିଛି । ବୈଦେଶିକ ମନ୍ତ୍ରଣାଳୟ ଅନୁଯାୟୀ, ପ୍ରାୟ ୩୫ ନିୟୁତ ଭାରତୀୟ ଦେଶ ବାହାରେ ବାସ କରନ୍ତି । ଏଥିରେ ପ୍ରବାସୀ ଭାରତୀୟ ଏବଂ ଭାରତୀୟ ବଂଶୋଦ୍ଭବ ଅନ୍ତର୍ଭୁକ୍ତ। ଏହି ପ୍ରବାସୀମାନେ କେବଳ ବିଭିନ୍ନ ଦେଶର ଅର୍ଥନୀତିରେ ଅବଦାନ ରଖିଛନ୍ତି ତାହା ନୁହେଁ ବରଂ ସେମାନଙ୍କର ସାଂସ୍କୃତିକ ପରିଚୟକୁ ମଧ୍ୟ ବିଦେଶରେ ଦୃଢ ରଖିଛନ୍ତି ।

କେଉଁ ଦେଶରେ ବେଶୀ ଭାରତୀୟ?

ଆମେରିକା ହେଉଛି ସବୁଠାରୁ ଅଧିକ ସଂଖ୍ୟକ ଭାରତୀୟ ପ୍ରବାସୀ ଦେଶ । ଯେଉଁଠାରେ ପ୍ରାୟ ୫୪ ଲକ୍ଷ ଭାରତୀୟ ବାସ କରନ୍ତି। ଯେଉଁଥିରେ ଛାତ୍ର, ବୃତ୍ତିଗତ ଏବଂ ପରିବାର ଅନ୍ତର୍ଭୁକ୍ତ । ଭାରତୀୟ ଆମେରିକୀୟ ସମ୍ପ୍ରଦାୟକୁ ଆଜି ଆମେରିକାର ସବୁଠାରୁ ସଫଳ ଜାତିଗତ ଗୋଷ୍ଠୀ ମଧ୍ୟରେ ଗଣନା କରାଯାଏ । ପ୍ରଯୁକ୍ତିବିଦ୍ୟା, ସ୍ୱାସ୍ଥ୍ୟ, ଶିକ୍ଷା ଏବଂ ବ୍ୟବସାୟ ଭଳି କ୍ଷେତ୍ରରେ ସେମାନଙ୍କର ଉପସ୍ଥିତି ସୁଦୃଢ ରହିଛି । ଭାରତୀୟ ଜନସଂଖ୍ୟା ବିଶେଷକରି ନ୍ୟୁୟର୍କ, କାଲିଫର୍ଣ୍ଣିଆ, ଟେକ୍ସାସ ଏବଂ ନ୍ୟୁ ଜର୍ସି ଭଳି ରାଜ୍ୟରେ ସର୍ବାଧିକ ଭାରତୀୟ ବସବାସ କରନ୍ତି । ସେହିପରି ଭାରତୀୟଙ୍କ ପାଇଁ ଦ୍ୱିତୀୟ ବୃହତ ଗନ୍ତବ୍ୟସ୍ଥଳ ହେଉଛି ୟୁଏଇ । ପ୍ରାୟ ୩୬ ଲକ୍ଷ ଭାରତୀୟ ଏଠାରେ ବାସ କରନ୍ତି, ଯାହା ଦେଶର ମୋଟ ଜନସଂଖ୍ୟାର ପ୍ରାୟ ଏକ ତୃତୀୟାଂଶ। ଏହି ସମ୍ପ୍ରଦାୟରେ ଶ୍ରମିକ ବର୍ଗରୁ ବଡ଼ ବ୍ୟବସାୟୀ ଏବଂ ବୃତ୍ତିଗତ ପର୍ଯ୍ୟନ୍ତ ଲୋକ ଅନ୍ତର୍ଭୁକ୍ତ। ଭାରତୀୟମାନେ ୟୁଏଇର ଅର୍ଥନୀତିର ଏକ ଗୁରୁତ୍ୱପୂର୍ଣ୍ଣ ଅଂଶ ହେବା ସହିତ ସେଠାରେ ଭାରତର ସାମାଜିକ ଏବଂ ସାଂସ୍କୃତିକ ପରିଚୟକୁ ମଧ୍ୟ ବେଶ୍ ପ୍ରତିଫଳିତ କରିଛନ୍ତି ।

ମାଲେସିଆରେ ୨୯ ଲକ୍ଷ ଭାରତୀୟ

ମାଲେସିଆରେ ପ୍ରାୟ ୨୯ ଲକ୍ଷ ଭାରତୀୟ ବାସ କରନ୍ତି। ଏଠାରେ ଦକ୍ଷିଣ ପୂର୍ବ ଏସିଆର ସବୁଠାରୁ ଅଧିକ ଭାରତୀୟ ପ୍ରବାସୀ ରହିଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ତାମିଲ ବଂଶୋଦ୍ଭବ ଲୋକ। ଯେଉଁମାନଙ୍କୁ ବ୍ରିଟିଶ ଶାସନ ସମୟରେ ଶ୍ରମ ପାଇଁ ଦାସ ଭାବରେ ଅଣାଯାଇଥିଲା। ଏବେ ମାଲେସିଆରେ ଭାରତୀୟ ଆଇନ, ସ୍ୱାସ୍ଥ୍ୟ କ୍ଷେତ୍ର, ଶିକ୍ଷା ଏବଂ ବ୍ୟବସାୟ କ୍ଷେତ୍ରରେ ସକ୍ରିୟ ଅଛନ୍ତି।

କାନାଡାରେ ଭାରତୀୟଙ୍କ ବଡ଼ ଉପସ୍ଥିତି

କାନାଡାରେ ପ୍ରାୟ ୨୮ ରୁ ୨୯ ଲକ୍ଷ ଭାରତୀୟ ବାସ କରନ୍ତି। ୧୯୬୭ ପରେ ଏଠାରେ ଭାରତୀୟ ପ୍ରବାସୀଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଥିଲା। ଆଜି ଦେଶର ରାଜନୀତି ଏବଂ ସାର୍ବଜନୀନ ଜୀବନରେ ଭାରତୀୟ କାନାଡିଆନ ସମ୍ପ୍ରଦାୟର ମଧ୍ୟ ଏକ ଦୃଢ଼ ଉପସ୍ଥିତି ରହିଛି । ଏଠାରେ ସର୍ବାଧିକ ସଂଖ୍ୟକ ଭାରତୀୟ ହେଉଛନ୍ତି ପଞ୍ଜାବୀ ଶିଖ ଯେଉଁମାନେ ବ୍ରିଟିଶ କଲମ୍ବିଆ ଏବଂ ଓଣ୍ଟାରିଓ ଭଳି ପ୍ରଦେଶରେ ବସବାସ କରନ୍ତି ।

ସାଉଦି ଆରବରେ ୨୫ ଲକ୍ଷ ଭାରତୀୟ

ସାଉଦି ଆରବରେ ପ୍ରାୟ ୨୫ ଲକ୍ଷ ଭାରତୀୟ ବାସ କରନ୍ତି। ୧୯୭୦ ଦଶକରେ ତେଲ ଆବିଷ୍କାର ଏବଂ ଆର୍ଥିକ ବିକାଶ ପରେ, ଭାରତୀୟ ଶ୍ରମିକ ଏଠାକୁ ଆସିବା ଆରମ୍ଭ କରିଥିଲେ। ଆଜି ଏହି ସମ୍ପ୍ରଦାୟ ନିର୍ମାଣ, ସ୍ୱାସ୍ଥ୍ୟ ଏବଂ ଖୁଚୁରା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଏଠାରୁ ଭାରତ ପ୍ରତିବର୍ଷ ବିପୁଳ ପରିମାଣର ଟଙ୍କା, ଅର୍ଥାତ୍ ବିଦେଶରୁ ପଠାଯାଇଥିବା ଟଙ୍କା ମଧ୍ୟ ପାଏ ।