Venezuela’s Interim President: ଭେନେଜୁଏଲାରେ ଆମେରିକାର ରାଜ୍!, ଅନ୍ତରୀଣ ସରକାର ନେଇ ସୁପ୍ରିମକୋର୍ଟ ଦେଲେ ବଡ଼ ଆଦେଶ, ଜାଣନ୍ତୁ କିଏ ଏହି ଡେଲସି ରୋଡ୍ରିଗେଜ୍?

ନୂଆଦିଲ୍ଲୀ: ଆମେରିକାର ଏକ ପ୍ରମୁଖ ଅପରେସନ ପରେ, ଆମେରିକ ଭେନେଜୁଏଲାର ରାଷ୍ଟ୍ରପତି ମାଦୁରୋ ଏବଂ ତାଙ୍କ ପତ୍ନୀ ସିଲିଆ ଫ୍ଲୋରେସଙ୍କୁ ବନ୍ଦୀ କରିଛି। ଆମେରିକା ରାଷ୍ଟ୍ରପତି ଟ୍ରମ୍ପ ଏନେଇ ଘୋଷଣା କରିଥିବା ବେଳେ ଏହାର ପ୍ରମାଣ ସ୍ବରୂପ ହାତରେ ହାତକଡି ପିନ୍ଧି ଚାଲିଥିବା ମାଦୁରୋଙ୍କ ଭିଡିଓ ବି ଜାରି କରିଛନ୍ତି ଟ୍ରମ୍ପ। ଯାହାକୁ ନେଇ ପୁରା ବିଶ୍ଵ ଅସନ୍ତୋଷ ପ୍ରକାଶ କରିଛି। ଏହାରି ଭିତରେ ଭେନେଜୁଏଲା ଦେଶର ସୁପ୍ରିମକୋର୍ଟ ଉପରାଷ୍ଟ୍ରପତି ଡେଲସି ରୋଡ୍ରିଗେଜଙ୍କୁ ଅନ୍ତରୀଣ ରାଷ୍ଟ୍ରପତି ଭାବରେ ନିଯୁକ୍ତ କରିଛନ୍ତି। ଶନିବାର, ଭେନେଜୁଏଲାର ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ ମାଦୁରୋଙ୍କ ଅନୁପସ୍ଥିତିରେ ଉପରାଷ୍ଟ୍ରପତି ଡେଲସି ରୋଡ୍ରିଗେଜ ଅନ୍ତରୀଣ ରାଷ୍ଟ୍ରପତି ଭୂମିକା ଗ୍ରହଣ କରିବେ।

କୋର୍ଟ ତାଙ୍କ ନିଷ୍ପତ୍ତିରେ କହିଛନ୍ତି ଯେ ରାଷ୍ଟ୍ରପତି ନିକୋଲାସ୍ ମାଦୁରୋଙ୍କ ଅନୁପସ୍ଥିତିରେ ଡେଲସି ରୋଡ୍ରିଗେଜ୍ ଦେଶର କାର୍ଯ୍ୟକାରୀ ରାଷ୍ଟ୍ରପତି ହେବେ, ଯାହା ସରକାରଙ୍କ ସୁଗମ କାର୍ଯ୍ୟ ଏବଂ ଜାତୀୟ ସୁରକ୍ଷା ସୁନିଶ୍ଚିତ କରିବ। ନିଷ୍ପତ୍ତିରେ ଏହା ମଧ୍ୟ କୁହାଯାଇଛି ଯେ କୋର୍ଟ ଏହି ପ୍ରସଙ୍ଗକୁ ଆହୁରି ବିଚାର କରିବେ ଯାହା ରାଷ୍ଟ୍ରପତିଙ୍କ ଅନୁପସ୍ଥିତିରେ ମଧ୍ୟ ଦେଶ, ସରକାରୀ ପ୍ରଶାସନ ଏବଂ ଜାତୀୟ ସାର୍ବଭୌମତ୍ୱର ସୁରକ୍ଷା ଏବଂ ନିରନ୍ତରତା ସୁନିଶ୍ଚିତ କରିବ।

ତେବେ ଏହି ଘଟଣାରେ ସବୁଠୁ ବଡ଼ କଥା ହେଉଛି, ଡେଲସି ରୋଡ୍ରିଗେଜ୍ ଦେଶ ରାଷ୍ଟ୍ରପତି ହେବା କଥା ପୂର୍ବରୁ ଦାବି କରିଛନ୍ତି ରାଷ୍ଟ୍ରପତି ଟ୍ରମ୍ପ। ପୂର୍ବରୁ, ରାଷ୍ଟ୍ରପତି ଟ୍ରମ୍ପ ଦାବି କରିଥିଲେ ଯେ ଭେନେଜୁଏଲାର ଉପରାଷ୍ଟ୍ରପତି ଡେଲସି ରୋଡ୍ରିଗେଜ୍ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଛନ୍ତି। ଟ୍ରମ୍ପ ଉପରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିବା ଦାବି କରିଥିବା ବେଳେ, ମାଦୁରୋଙ୍କ କବଜା ପରେ ରୋଡ୍ରିଗେଜଙ୍କ ବୟାନ ଆସିଥିଲା।

ତଥାପି, ଭେନେଜୁଏଲାର ଉପରାଷ୍ଟ୍ରପତି କହିଛନ୍ତି ଯେ ରାଷ୍ଟ୍ରପତି ନିକୋଲାସ ମାଦୁରୋ ଦେଶର ଏକମାତ୍ର ବୈଧ ନେତା ଅଛନ୍ତି। ଏଥିସହିତ ସେ ଶପଥ ଗ୍ରହଣ କରିଥିବା ଦାବିକୁ ମଧ୍ୟ ଅସ୍ୱୀକାର କରିଥିଲେ।

ଡେଲସି ରୋଡ୍ରିଗେଜ କିଏ?

ଭେନେଜୁଏଲାର ଅନ୍ତରୀଣ ରାଷ୍ଟ୍ରପତି ହୋଇଥିବା ଡେଲସି ରୋଡ୍ରିଗେଜ (୫୬) ଭେନେଜୁଏଲାର ସମାଜବାଦୀ ସରକାରଙ୍କ ସବୁଠାରୁ ଶକ୍ତିଶାଳୀ ବ୍ୟକ୍ତିତ୍ୱ ମଧ୍ୟରୁ ଜଣେ। ମାଦୁରୋଙ୍କ ଜଣେ ଘନିଷ୍ଠ ସହଯୋଗୀ, ରୋଡ୍ରିଗେଜ ଏକକାଳୀନ ଉପରାଷ୍ଟ୍ରପତି, ଅର୍ଥମନ୍ତ୍ରୀ ଏବଂ ତୈଳ ମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି। ମାଦୁରୋ ତାଙ୍କ ସରକାରଙ୍କ ଆକ୍ରମଣାତ୍ମକ ପ୍ରତିରକ୍ଷା ପାଇଁ ତାଙ୍କୁ ଥରେ ‘ଟାଇଗର’ ବୋଲି କହିଥିଲେ।

କାରାକାସରେ ଜନ୍ମଗ୍ରହଣ କରିଥିବା ରୋଡ୍ରିଗେଜ ଲିଗା ସୋସିଆଲିଷ୍ଟା ଦଳର ପ୍ରତିଷ୍ଠାତା ବାମପନ୍ଥୀ ଗରିଲା ନେତା ଜର୍ଜ ଆଣ୍ଟୋନିଓ ରୋଡ୍ରିଗେଜଙ୍କ ଝିଅ। ସେ ଆଇନ ଅଧ୍ୟୟନ କରିଥିଲେ ଏବଂ ୟୁନିଭର୍ସିଡାଡ୍ ସେଣ୍ଟ୍ରାଲ୍ ଡି ଭେନେଜୁଏଲାରେ ସ୍ନାତକ ହାସଲ କରିଥିଲେ। ରୋଡ୍ରିଗେଜ ରାଜନୀତିରେ ଦ୍ରୁତ ସଫଳତା ହାସଲ କରିଛନ୍ତି। ସେ ଯୋଗାଯୋଗ ମନ୍ତ୍ରୀ, ବୈଦେଶିକ ବ୍ୟାପାର ମନ୍ତ୍ରୀ ଭାବରେ ମଧ୍ୟ କାର୍ଯ୍ୟ କରିଥିଲେ ଏବଂ ପରେ ସରକାର ସମର୍ଥକ ସମ୍ବିଧାନ ସଭାର ଅଧ୍ୟକ୍ଷା ହୋଇଥିଲେ।

ତେବେ କାହିରଖୁଛୁ, ଯୁକ୍ତରାଷ୍ଟ୍ର ଆମେରିକା ଭେନେଜୁଏଲାରେ ଆକ୍ରମଣ କରିଥିଲା। ଏହି ଆକ୍ରମଣ ପରେ, ଯୁକ୍ତରାଷ୍ଟ୍ର ରାଷ୍ଟ୍ରପତି ମାଦୁରୋ ଏବଂ ତାଙ୍କ ପତ୍ନୀଙ୍କୁ ବନ୍ଦୀ କରିଥିଲା। ମାଦୁରୋଙ୍କ ଫଟୋ ମଧ୍ୟ ସାମ୍ନାକୁ ଆସିଛି ଯେଉଁଥିରେ ତାଙ୍କୁ ଆଖିରେ ପଟି ବାନ୍ଧି ହାତ ବାନ୍ଧିଥିବା ଦେଖାଯାଇଛି। ମାଦୁରୋ ଏବଂ ତାଙ୍କ ପତ୍ନୀଙ୍କୁ ହେଲିକପ୍ଟରରେ ଏକ ଆମେରିକୀୟ ଯୁଦ୍ଧଜାହାଜକୁ ନିଆଯାଇଥିଲା ଏବଂ ସେଠାରୁ ଆମେରିକାକୁ ଉଡ଼ାଣ ଭରିବାକୁ ପଡିଥିଲା, ଯେଉଁଠାରେ ଟ୍ରମ୍ପ ପ୍ରଶାସନ ନ୍ୟୁୟର୍କରେ ତାଙ୍କ ବିରୁଦ୍ଧରେ ମାମଲା ରୁଜୁ କରିବାକୁ ଯୋଜନା କରୁଛି।