ଭୁବନେଶ୍ଵର: ଦୀର୍ଘ ୨୪ ବର୍ଷ ପରେ ଓଡିଶାକୁ ମିଳିଛି ନୂତନ ମୁଖ୍ୟମନ୍ତ୍ରୀ । ରାଜ୍ୟରେ ବିଜେଡିର ଗଡ ଭାଙ୍ଗି ନୂତନ ସରକାର ଗଠନ କରିବାକୁ ଯାଉଥିବା ବିଜେପି ମୋହନ ଚରଣ ମାଝୀଙ୍କୁ ଓଡିଶାର ନୂଆ ମୁଖ୍ୟମନ୍ତ୍ରୀ ଭାବରେ ଘୋଷଣା କରିଛି । ୟୁପି-ମଧ୍ୟପ୍ରଦେଶ-ଛତିଶଗଡ ଭଳି ଓଡିଶାରେ ମଧ୍ୟ ବିଜେପି ଗୋଟିଏ ସିଏମ ଏବଂ ଦୁଇ ଜଣ ଡେପୁଟି ସିଏମଙ୍କ ସୂତ୍ର କାର୍ଯ୍ୟକାରୀ କରିଛି। ବିଜେପି ଘୋଷଣା କରିଥିବା ଓଡିଶାର ଦୁଇଜଣ ଉପ-ମୁଖ୍ୟମନ୍ତ୍ରୀଙ୍କ ମଧ୍ୟରୁ ଜଣେ ମହିଳା ଅଟନ୍ତି । କେଭି ସିଂ ଦେଓ ଏବଂ ପ୍ରଭାତୀ ପରିଡାଙ୍କୁ ଉପମୁଖ୍ୟମନ୍ତ୍ରୀ ଭାବେ ଘୋଷଣା କରିଛି ବିଜେପି । ଓଡିଶାର ଏତେ ବଡ ଆସନରେ ପ୍ରଥମ ଥର ପାଇଁ ପାଦ ରଖିଛନ୍ତି ମୋହନ । ଆସନ୍ତୁ ଜାଣିବା ମୋହନ ମାଝୀଙ୍କ ରାଜନୈତିକ ଜୀବନ ଉପରେ…
ସୂଚନାଯୋଗ୍ୟ ଯେ, ୨୦୨୪ ଓଡିଶା ବିଧାନସଭା ନିର୍ବାଚନରେ ବିଜେପି ନେତା ମୋହନ ଚରଣ ମାଝୀ ୧୧,୫୭୭ଟି ଭୋଟରେ ବିଜୁ ଜନତା ଦଳର ମୀନା ମଞ୍ଜୀଙ୍କୁ ପରାସ୍ତ କରି କେନ୍ଦୁଝର ବିଧାନସଭା ଆସନ ଜିତିଛନ୍ତି। ୫୨ ବର୍ଷିୟ ମୋହନ ୪ଥର ବିଧାୟକ ହୋଇଛନ୍ତି । ସେ ୨୦୦୦ ରୁ ୨୦୦୯ ମଧ୍ୟରେ ଦୁଇଥର କେନ୍ଦୁଝରର ପ୍ରତିନିଧିତ୍ୱ କରିଥିଲେ। ଏହା ପରେ ପୁଣି ଥରେ ମୋହନ ଚରଣ ମାଝୀ ୨୦୧୯ରେ ବିଜେପି ଟିକେଟରେ କେନ୍ଦୁଝରରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ।
ମୋହନ ମାଝୀ ନିଜର ରାଜନୀତିକ ଜୀବନରେ ସବୁବେଳେ ସର୍ବାଙ୍ଗୀନ ସ୍ବାର୍ଥରେ ସ୍ବର ଉତ୍ତଳନ କରି ଆସିଛନ୍ତି । ବିରୋଧୀ ଦଳରେ ଥିବା ବେଳେ ଶାସକ ବିଜେଡି ଉପରେ ଅନେକ ପ୍ରଶ୍ନ ନେଇ ବର୍ଷିଛନ୍ତି ମୋହନ । ୪ ଥର କେନ୍ଦୁଝରରୁ ବିଧାୟକ ହୋଇଥିବା ମୋହନ ମାଝୀ ଚଳିତ ନିର୍ବାଚନରେ ବିଜେପି ଦଳ ଉପମୁଖ୍ୟ ସଚେତକ ମଧ୍ୟ ରହିଥିଲେ । ଜଣେ ଆଦିବାସୀ ଚେହେରା ଭାବରେ ଓଡିଶା ରାଜନୀତିରେ ବେଶ୍ ଆଦୃତ ମୋହନ । ସରସ୍ବତୀ ଶିଶୁ ମନ୍ଦିରରେ ଜଣେ ସାଧାରଣ ଗୁରୁଜୀ ଭାବରେ ଜୀବନ ଆରମ୍ଭ କରିଥିଲେ ମୋହନ । ପରେ ସରପଞ୍ଚ ଓ ଓ୍ବାର୍ଡମେମ୍ବର ଭାବରେ ମଧ୍ୟ ଲୋକଙ୍କ ପାଇଁ କାମ କରିଥିଲେ ।
ମୋହନ ଚରଣ ମାଝୀ ୬ ଜାନୁୟାରୀ ୧୯୭୨ରେ ଓଡ଼ିଶାର କେନ୍ଦୁଝରରେ ଜନ୍ମଗ୍ରହଣ କରିଥିଲେ। ଅନୁସୂଚିତ ଜନଜାତିରୁ ଆସି ଡକ୍ଟର ପ୍ରିୟଙ୍କା ମାରାଣ୍ଡିଙ୍କୁ ବିବାହ କରିଥିଲେ ମୋହନ । ୧୯୯୭ ରୁ ୨୦୦୦ ପର୍ଯ୍ୟନ୍ତ ଜଣେ ସରପଞ୍ଚରୁ ସେ ତାଙ୍କର ରାଜନୈତିକ କ୍ୟାରିଅର୍ ଆରମ୍ଭ କରିଥିଲେ । ଏହା ପରେ ସେ ୨୦୦୦ମସିହାରେ ପ୍ରଥମ ଥର ପାଇଁ ବିଧାୟକ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ। ବିଜେପି ତାଙ୍କୁ ରାଜ୍ୟ ଆଦିବାସୀ ମୋର୍ଚ୍ଚାର ସଚିବ ପଦରେ ମଧ୍ୟ ନିଯୁକ୍ତ କରିଛି। ଏହା ବ୍ୟତୀତ ସେ ୨୦୦୫ ରୁ ୨୦୦୯ ପର୍ଯ୍ୟନ୍ତ ରାଜ୍ୟ ଏସ.ଟି ମୋର୍ଚ୍ଚାର ମୁଖ୍ୟ ଶାସନ ସଚିବ ଏବଂ ସରକାରୀ ଉପ ମୁଖ୍ୟ ସଚେତକ ମଧ୍ୟ ଥିଲେ।