ରାଣୀ ଏଲିଜାବେଥ-୨ଙ୍କ ପରେ କାହାକୁ ମିଳିବ କୋହିନୁର ମୁକୁଟ !

ଓଡ଼ିଶା ସମ୍ବାଦ ବ୍ୟୁରୋ: ବ୍ରିଟେନର ରାଣୀ ଏଲିଜାବେଥ ଦ୍ବିତୀୟଙ୍କର ୯୬ ବର୍ଷ ବୟସରେ ଦେହାନ୍ତ ହୋଇଛି। ଏଥି ସହିତ ଗୋଟିଏ ଯୁଗର ଶେଷ ହୋଇଛି। ତାଙ୍କ ମୃତ୍ୟୁ ସମଗ୍ର ବିଶ୍ୱକୁ ଚକିତ କରି ଦେଇଛି। ଏଲିଜାବେଥ ଦୀର୍ଘ ସମୟ ଧରି ବ୍ରିଟେନର ରାଣୀ ଥିଲେ। ରାଣୀଙ୍କ ମୃତ୍ୟୁ ପରେ ଉତ୍ତରାଧିକାରୀ ବା ବିଟ୍ରେନର ପରବର୍ତ୍ତୀ ରାଜା ହୋଇଛନ୍ତି ଚାର୍ଲସ (୭୩)। ଏବେ କାହାକୁ ମିଳିବ ବ୍ରିଟିଶ ରାଜ ମୁକୁଟ, ସେନେଇ ଚାଲିଛି ଚର୍ଚ୍ଚା।

ଦୀର୍ଘ ବର୍ଷ ହେଲା ବ୍ରଟିଶ ରାଜଗାଦୀର ଅଧିଷ୍ଠାତ୍ରୀ ଥିବା ଏଲିଜାବେଥ ୭୦ ବର୍ଷର ଶାସନ କାଳରେ ବ୍ରିଟେନ ରାଜତନ୍ତ୍ରର ଅନେକ ଉତ୍‌ଥାନ-ପତନ ଦେଖିଛନ୍ତି। ବ୍ରିଟେନ ପାଇଁ କୋହିନୁର ହୀରା ଖଚିତ ମୁକୁଟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଚର୍ତୁଦଶ ଶତାବ୍ଦୀରେ ଭାରତରେ କୋହିନୁର ହୀରା ମିଳିଥିଲା। ବହୁ ଶତାବ୍ଦୀ ଭିତରେ ତାହା ଅନେକଙ୍କ ହାତକୁ ଯାଇଥିଲା। ପରେ ୧୮୪୯ରେ ହୀରାଟି ରାଣୀ ‌ଭିକ୍ଟୋରିଆଙ୍କ ପାଖରେ ପହଞ୍ଚିଥିଲା। ସେବେଠାରୁ ତାହା ବ୍ରିଟିଶ ରାଜ ମୁକୁଟରେ ସ୍ଥାନ ପାଇଆସୁଛି। କିନ୍ତୁ ଏହା ଭାରତ ସମେତ ଅତି କମରେ ଚାରୋଟି ଦେଶ ମଧ୍ୟରେ ଐତିହାସିକ ମାଲିକାନା ବିବାଦର ବିଷୟ ପାଲଟିଛି।

ପରବର୍ତ୍ତୀ ରାଜା ଚାର୍ଲସଙ୍କ ନାମ ଘୋ।ଷଣା ପରେ ତାଙ୍କ ପତ୍ନୀ କାମିଲାଙ୍କୁ ଏଲିଜାବେଥ୍‌ ରାଣୀ ଘୋଷଣା କରିଥିଲେ। ଏବେ ତାଙ୍କ ପାଖକୁ ଆସିବ ପ୍ରସିଦ୍ଧ କୋହିନୁର ହୀରା ଖଚିତ ମୁକୁଟ। ଏହି କୋହିନୁର ହେଉଛି ୧୦୫.୬ କ୍ୟାରେଟର ହୀରା। ଚାର୍ଲସ୍‌ ଯେତେବେଳେ ରାଜା ହେବେ ସେହିଦିନ କାମିଲା ରାଣୀଙ୍କ ମୁକୁଟ ପିନ୍ଧିବେ।