ନାଗପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ନାଗପୁରସ୍ଥିତ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ) ମୁଖ୍ୟାଳୟରେ ପହଞ୍ଚିଛନ୍ତି। ଏହା ତାଙ୍କର ୧୨ ବର୍ଷ ପରେ ପ୍ରଥମ ଗସ୍ତ। ସଂଘ ଏହି ବର୍ଷ ନିଜର ୧୦୦ ବର୍ଷ ପୂର୍ତ୍ତି ପାଳନ କରୁଛି। ମୋଦୀଙ୍କ ଏହି ଗସ୍ତ ଚୈତ୍ର ନବରାତ୍ରି ଓ ହିନ୍ଦୁ ନବବର୍ଷର ପ୍ରଥମ ଦିନରେ ହୋଇଛି। ଏହା ପୂର୍ବରୁ ସେ ୨୦୧୩ରେ ଲୋକସଭା ନିର୍ବାଚନ ସମୟରେ ଏକ ବୈଠକରେ ଯୋଗ ଦେବାକୁ ନାଗପୁର ଆସିଥିଲେ। ଏହି ଅବସରରେ ମୋଦୀ ସଂଘର ପ୍ରତିଷ୍ଠାତା କେଶବ ବଳରାମ ହେଡଗେୱାର ଓ ଦ୍ୱିତୀୟ ସରସଂଘଚାଳକ ମାଧବ ସଦାଶିବରାଓ ଗୋଲୱାଲକରଙ୍କ ସ୍ମାରକୀ ମନ୍ଦିରରେ ପହଞ୍ଚି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ମାଧବ ନେତ୍ରାଳୟର ନୂଆ ଭବନର ଭିତ୍ତିପ୍ରସ୍ତର ସ୍ଥାପନ କରି ମୋଦୀ ସଂଘର କାମକୁ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ୧୦୦ ବର୍ଷ ପୂର୍ବେ ରାଷ୍ଟ୍ରୀୟ ଚେତନା ପାଇଁ ଯେଉଁ ବିଚାର ସଂଘ ମଞ୍ଜି ଭାବେ ରୋପଣ କରିଥିଲା, ତାହା ଆଜି ଏକ ବିଶାଳ ବଟବୃକ୍ଷ ରୂପେ ବିଶ୍ୱ ସାମ୍ନାରେ ଉଭା ହୋଇଛି। ଏହା ଭାରତୀୟ ସଂସ୍କୃତି ଓ ରାଷ୍ଟ୍ରୀୟ ଚେତନାକୁ ନିରନ୍ତର ଶକ୍ତି ଯୋଗାଉଛି। ସ୍ୱୟଂସେବକଙ୍କ ପାଇଁ ସେବା ହିଁ ଜୀବନ ବୋଲି ସେ ଉଲ୍ଲେଖ କରିଛନ୍ତି।
ମୋଦୀଙ୍କର ଏହି ଅଚାନକ ଗସ୍ତ ରାଜନୈତିକ ବିଶେଷଜ୍ଞଙ୍କୁ ଆଶ୍ଚର୍ଯ୍ୟ କରିଛି। ଲୋକସଭା ନିର୍ବାଚନ ସମୟରେ ବିଜେପି ସଭାପତି ଜେପି ନଡ୍ଡାଙ୍କ ‘ଆତ୍ମନିର୍ଭର’ ପ୍ରସଙ୍ଗରେ ବୟାନ ପରେ ବିଜେପି ଓ ସଂଘ ନେତୃତ୍ୱ ମଧ୍ୟରେ ମତାନ୍ତର ସୃଷ୍ଟି ହୋଇଥିଲା। ନିର୍ବାଚନ ଫଳାଫଳରେ ବିଜେପି ଏକାକୀ ସରକାର ଗଠନ କରି ନପାରିବା ପରେ ସଂଘ ମୁଖ୍ୟଙ୍କ ବୟାନରେ ଦଳର ପରାଜୟ କାରଣ ସ୍ପଷ୍ଟ ହୋଇଥିଲା। ତା’ପରେ ସଂଘର ପରିଶ୍ରମ ଓ ରଣନୀତି ବଳରେ ମହାରାଷ୍ଟ୍ର, ହରିୟାଣା ଓ ଦିଲ୍ଲୀରେ ବିଜେପି ସରକାର ଗଠନ କରିପାରିଛି। ଏବେ ବିଜେପି ସଭାପତି ପଦକୁ ନେଇ ସଂଘ ଓ ଦଳ ମଧ୍ୟରେ ମନୋମାଳିନ୍ୟ ଚାଲିଥିବା ଚର୍ଚ୍ଚା ହେଉଛି। ଏପରି ପରିସ୍ଥିତିରେ ମୋଦୀଙ୍କ ଗସ୍ତ ସମସ୍ତ ଚର୍ଚ୍ଚା ଉପରେ ପୂର୍ଣ୍ଣଛେଦ ପକାଇବ ଭଳି କୁହାଯାଉଛି।
ବିଜେପି ସଭାପତି ପଦ ପାଇଁ ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଓ ମନୋହରଲାଲ ଖଟ୍ଟରଙ୍କ ନାମ ଆଗରେ ରହିଛି। ଉଭୟ ନେତା ସଂଘ ପୃଷ୍ଠଭୂମିରୁ ଆସିଛନ୍ତି। କିନ୍ତୁ ସୂତ୍ର ଅନୁସାରେ, ବିଜେପିର ଶୀର୍ଷ ନେତା ଏହି ଦୁଇ ନେତାଙ୍କୁ ସମର୍ଥନ କରୁନାହାନ୍ତି। ଦଳ ପକ୍ଷରୁ ଧର୍ମେନ୍ଦ୍ର ପ୍ରଧାନ ଓ ଭୂପେନ୍ଦ୍ର ଯାଦବଙ୍କ ନାମ ଆଗରେ ରହିଛି। ଏହାକୁ ନେଇ ସଂଘ ଓ ବିଜେପି ମଧ୍ୟରେ ଆଲୋଚନା ଚୂଡ଼ାନ୍ତ ହୋଇଛି କି ନାହିଁ, ତାହା ଏକ ବଡ଼ ପ୍ରଶ୍ନ।
ରାଜନୈତିକ ବିଶ୍ଳେଷକମାନେ ଅନୁମାନ କରୁଛନ୍ତି ଯେ, ୨୦୨୯ ଲୋକସଭା ନିର୍ବାଚନ ପୂର୍ବରୁ ରାଜ୍ୟଗୁଡ଼ିକରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ମୋଦୀ ଓ ସଂଘ ମଧ୍ୟରେ ରଣନୀତି ପ୍ରସ୍ତୁତ ହୋଇଛି। ଉତ୍ତରପ୍ରଦେଶ, ଆସାମ, ତାମିଲନାଡୁ, କେରଳ ଓ ପଶ୍ଚିମବଙ୍ଗ ଏଥିରେ ମୁଖ୍ୟ। ଯେଉଁଠି ଉତ୍ତରପ୍ରଦେଶ ଓ ଆସାମରେ ବିଜେପି ହ୍ୟାଟ୍ରିକ ମାରିବା ଲକ୍ଷ୍ୟରେ ରହିଛି, ସେହିପରି କେରଳ, ତାମିଲନାଡୁ ଓ ପଶ୍ଚିମବଙ୍ଗରେ ପ୍ରଥମଥର ସରକାର ଗଠନ ପାଇଁ ଉଦ୍ୟମ କରୁଛି। ବିଶେଷକରି ଦେଶରେ ସର୍ବାଧିକ ଶାଖା କେରଳରେ ରହିଥିବାରୁ ବିଜେପିର ଧ୍ୟାନ ଦକ୍ଷିଣ ଭାରତ ଉପରେ କେନ୍ଦ୍ରିତ ହୋଇଛି।
ବିପକ୍ଷ ଦଳ ମଧ୍ୟ ଏହାକୁ ନେଇ ପ୍ରଶ୍ନ ଉଠାଇଛନ୍ତି। ଶିବସେନା (ୟୁବିଟି) ସାଂସଦ ସଞ୍ଜୟ ରାଉତ କହିଛନ୍ତି, “ପିଏମ ମୋଦୀଙ୍କୁ ଆରଏସଏସର କିପରି ମନେ ପଡ଼ିଲା? ଆଜି ହିଁ କାହିଁକି ଏହି ଅନୁଭବ ହେଲା? ସେ କେବଳ କ୍ଷମତା ପାଇଁ ଲୋକଙ୍କ ସହ ଯୋଡ଼ି ହୁଅନ୍ତି। ବିଜେପି ଓ ଆରଏସଏସ ଏକ ମୁଦ୍ରାର ଦୁଇ ପାର୍ଶ୍ୱ।” ସେହିପରି ଆପ୍ ସାଂସଦ ସଞ୍ଜୟ ସିଂହ କହିଛନ୍ତି, “ମୋଦୀ ଓ ସଂଘ ମୁଖ୍ୟ ଜବାବ ଦିଅନ୍ତୁ ଯେ, ୧୦୦ ବର୍ଷରେ ଆରଏସଏସର ମୁଖ୍ୟ ଜଣେ ଦଳିତ, ପଛୁଆ କିମ୍ବା ଆଦିବାସୀ କାହିଁକି ହୋଇନାହାନ୍ତି? କୌଣସି ମହିଳା ସଂଘ ମୁଖ୍ୟ କାହିଁକି ହୋଇପାରିଲେ ନାହିଁ?”
ଉଲ୍ଲେଖଯୋଗ୍ୟ, ମୋଦୀ ୧୯୭୨ରେ ଆରଏସଏସ ସହ ଯୋଡ଼ି ହୋଇଥିଲେ। ପରେ ସେ ପ୍ରଚାରକ ଭାବେ କାର୍ଯ୍ୟ କରିଥିଲେ ଓ ସଂଘ ମାଧ୍ୟମରେ ବିଜେପିରେ ପ୍ରବେଶ କରିଥିଲେ। ଗୁଜରାଟରେ ସଂଗଠନର ଦାୟିତ୍ୱ ସମ୍ଭାଳିବା ପରେ ୨୦୦୧ରେ ସେ ମୁଖ୍ୟମନ୍ତ୍ରୀ ହୋଇଥିଲେ, ଯେଉଁଠି ସଂଘର ସମର୍ଥନ ତାଙ୍କୁ ମିଳିଥିଲା।
Comments are closed.