ଭୁବନେଶ୍ୱର: ଏକ ସମୟରେ ମୋବାଇଲ୍ ଫୋନ୍ ଜଗତର ରାଜା ଥିବା ନୋକିଆ ଆଣ୍ଡ୍ରଏଡ୍ ଓ ଆପଲ୍ ଫୋନ୍ର ଆଧିପତ୍ୟ ଯୁଗରେ କାହିଁକି ପଛରେ ପଡ଼ିଗଲା, ତାହା ଏବେ ଚର୍ଚ୍ଚାର ବିଷୟ ହୋଇଛି। ଫିନଲ୍ୟାଣ୍ଡ ଆଧାରିତ ଏହି କମ୍ପାନୀ, ଯିଏ ଏକଦା ଅତ୍ୟନ୍ତ ସରଳ ଫୋନ୍ ପାଇଁ ଜଣାଶୁଣା ଥିଲା, ସ୍ମାର୍ଟଫୋନ୍ ବିପ୍ଳବରେ ନିଜର ପ୍ରଭାବ ହରାଇ ବସିଛି।
ବିଶେଷଜ୍ଞଙ୍କ ମତରେ, ନୋକିଆର ପତନର ମୁଖ୍ୟ କାରଣ ହେଉଛି ସମୟରେ ବଦଳୁଥିବା ବଜାର ଆବଶ୍ୟକତା ଅନୁସାରେ ନିଜକୁ ଖାପ ଖୁଆଇପାରିଲାନି। ୨୦୦୭ରେ ଆପଲ୍ ଆଇଫୋନ୍ ଲଞ୍ଚ କରି ଟଚ୍ସ୍କ୍ରିନ୍ ଓ ଅପରେଟିଂ ସିଷ୍ଟମ୍ର ନୂଆ ଯୁଗ ଆରମ୍ଭ କରିଥିବା ବେଳେ, ୨୦୧୦ ଆଡ଼କୁ ଗୁଗଲ୍ର ଆଣ୍ଡ୍ରଏଡ୍ ସାମସଙ୍ଗ ଭଳି କମ୍ପାନୀଙ୍କ ସହ ମିଶି ବଜାରକୁ କବ୍ଜା କରିବାରେ ଲାଗିଥିଲା। କିନ୍ତୁ ନୋକିଆ ନିଜର ପୁରୁଣା ‘ସିମ୍ବିୟାନ’ ଅପରେଟିଂ ସିଷ୍ଟମ୍ରେ ଅଟକି ରହିଗଲା, ଯାହା ଆଧୁନିକ ଆପ୍ ଓ ସୁବିଧା ପ୍ରଦାନ କରିବାରେ ଅସମର୍ଥ ଥିଲା।
ଅନ୍ୟପକ୍ଷରେ, ଆଣ୍ଡ୍ରଏଡ୍ ଏକ ଓପନ୍-ସୋର୍ସ ପ୍ଲାଟଫର୍ମ ହୋଇଥିବାରୁ ବିଭିନ୍ନ କମ୍ପାନୀ ଏହାକୁ ଗ୍ରହଣ କରି ସ୍ମାର୍ଟଫୋନ୍କୁ ଶସ୍ତା ଓ ଅଧିକ ବ୍ୟବହାରଯୋଗ୍ୟ କରିଥିଲେ। ଆପଲ୍ ନିଜର ପ୍ରିମିୟମ୍ ବ୍ରାଣ୍ଡ ମାନ୍ୟତା ଓ ଉନ୍ନତ ଇକୋସିଷ୍ଟମ୍ ସହ ଗ୍ରାହକଙ୍କୁ ଆକର୍ଷିତ କରୁଥିଲା। କିନ୍ତୁ ନୋକିଆ ୨୦୧୧ରେ ମାଇକ୍ରୋସଫ୍ଟ ସହ ମିଶି ‘ଉଇଣ୍ଡୋଜ୍ ଫୋନ୍’ ଆଣିବାକୁ ନିଷ୍ପତ୍ତି ନେଇଥିଲା, ଯାହା ଗ୍ରାହକଙ୍କ ମଧ୍ୟରେ ଗ୍ରହଣୀୟ ହୋଇପାରିନଥିଲା। ଏହି ଭୁଲ୍ ନିଷ୍ପତ୍ତି କମ୍ପାନୀକୁ ଆହୁରି ପଛକୁ ଠେଲି ଦେଇଥିଲା।
ବଜାର ଗବେଷଣା ଅନୁସାରେ, ୨୦୦୭ରେ ନୋକିଆର ବିଶ୍ୱ ମୋବାଇଲ୍ ବଜାରରେ ୪୦%ରୁ ଅଧିକ ଅଂଶ ଥିଲା, କିନ୍ତୁ ୨୦୧୩ ଆଡ଼କୁ ଏହା ମାତ୍ର ୩%କୁ ଖସି ଆସିଥିଲା। ଏହି ସମୟରେ ଆଣ୍ଡ୍ରଏଡ୍ ଗ୍ରହଣ ନ କରିବା, ଦୁର୍ବଳ ମାର୍କେଟିଂ ରଣନୀତି ଓ ଗ୍ରାହକଙ୍କ ଚାହିଦା ବୁଝିବାରେ ବିଫଳତା ନୋକିଆର ପତନକୁ ତ୍ୱରାନ୍ୱିତ କରିଥିଲା।
୨୦୧୪ରେ ନୋକିଆର ମୋବାଇଲ୍ ବ୍ୟବସାୟ ମାଇକ୍ରୋସଫ୍ଟକୁ ବିକ୍ରି ହୋଇଯାଇଥିଲା। ପରେ ୨୦୧୬ରେ ଏଚଏମଡି ଗ୍ଲୋବାଲ୍ ନୋକିଆ ବ୍ରାଣ୍ଡ ଅଧିଗ୍ରହଣ କରି ଆଣ୍ଡ୍ରଏଡ୍ ଫୋନ୍ ବାହାର କରିଥିଲା । କିନ୍ତୁ ଏହାରି ଭିତରେ ବଜାରରେ ସାମସଙ୍ଗ, ଆପଲ୍ ଓ ଚାଇନିଜ୍ କମ୍ପାନୀ ଶାଓମି ଆଗରେ ନୋକିଆ ନିଜର ପୁରୁଣା ଗୌରବ ଫେରାଇ ଆଣିବାରେ ସଫଳ ହୋଇପାରି ନାହିଁ।
ଏକ ସମୟର ମୋବାଇଲ୍ ଜଗତର ରାଜା ନୋକିଆ ଏଭଳି ସ୍ଥିତି ପ୍ରମାଣ କରୁଛି ଯେ, ସମୟ ସହ ତାଳ ଦେଇ ନ ଚାଲିଲେ ଯେତେ ବଡ଼ ବ୍ରାଣ୍ଡ ହେଲେ ମଧ୍ୟ ପଛରେ ପଡ଼ିବା ଅନିବାର୍ଯ୍ୟ।
Comments are closed.