ଏହି ଭୁଲ୍ ଯୋଗୁଁ ବର୍ଷାଦିନେ ବଢ଼ିଥାଏ ସ୍କିନ ଆଲର୍ଜି …!

ଭୁବନେଶ୍ବର: ପ୍ରଚଣ୍ଡ ଗ୍ରୀଷ୍ମ ଋତୁ ପରେ ମୌସୁମୀ ବର୍ଷା ପ୍ରାଣୀଜଗତକୁ ଆଶ୍ୱସ୍ତି ପ୍ରଦାନ କରିଥାଏ । କିନ୍ତୁ ଏହି ବର୍ଷା ଋତୁରେ ସ୍କିନ ଆଲର୍ଜି ଏବଂ ସଂକ୍ରମଣର ଆଶଙ୍କା ମଧ୍ୟ ବହୁ ଗୁଣରେ ବୃଦ୍ଧି ପାଏ। ଏହି ଋତୁରେ ବାୟୁମଣ୍ଡଳରେ ଆର୍ଦ୍ରତା ବୃଦ୍ଧି ପାଏ । ଆର୍ଦ୍ରତା ଯୋଗୁଁ ଶରୀରରେ ପ୍ରଚୁର ଝାଳ ବାହାରେ । ଫଳରେ ବ୍ୟାକ୍ଟେରିଆ ଏବଂ ଫଙ୍ଗସ୍ ଦ୍ରୁତ ଗତିରେ ବୃଦ୍ଧି ପାଏ। ଏହି କାରଣରୁ ବର୍ଷା ଋତୁରେ କୁଣ୍ଡାଇ ହେବା ଆଦି ଆଲର୍ଜି ସମସ୍ୟା ସାଧାରଣ ଭାବେ ଦେଖାଯାଏ ।

ବର୍ଷାଦିନେ ସ୍କିନ ଆଲର୍ଜି ବୃଦ୍ଧି ପାଇବାର ସବୁଠାରୁ ବଡ଼ କାରଣ ହେଉଛି ଆର୍ଦ୍ରତା, ମଇଳା, ଝାଳ ଏବଂ ନିଜ ଚର୍ମ ଯତ୍ନରେ ଅବହେଳା। ଥଣ୍ଡା ପାଗ ଯୋଗୁଁ ଲୋକମାନେ ଶରୀରର ପରିଷ୍କାର ପରିଚ୍ଛନ୍ନତାକୁ ହାଲୁକା ଭାବରେ ନିଅନ୍ତି , ଯେତେବେଳେ କି ଓଦା ହେବା, ଝାଳ ଏବଂ ଧୂଳି ଯୋଗୁଁ ଚର୍ମର ଛିଦ୍ର ବନ୍ଦ ହୋଇଯାଏ। ଏପରି ପରିସ୍ଥିତିର ଆଲର୍ଜିକ୍ ପ୍ରତିକ୍ରିୟା ଦେଖାଦେବା ଆରମ୍ଭ କରେ।

ଟିକିଏ ସତର୍କତା ଏବଂ ପରିଷ୍କାର ପରିଚ୍ଛନ୍ନତା  ଆପଣଙ୍କୁ ଚର୍ମ ସମସ୍ୟାରୁ ରକ୍ଷା କରିପାରିବ। ପ୍ରଥମେ ଆସନ୍ତୁ ଜାଣିବା ଏହି ଋତୁରେ ଲୋକମାନେ କେଉଁ ଭୁଲ କରନ୍ତି, ଯାହାଫଳରେ ଚର୍ମ ସଂକ୍ରମଣର ଆଶଙ୍କା ବଢ଼ିଥାଏ ।

-ଓଦା ପୋଷାକ ପିନ୍ଧି ବହୁତ ସମୟ ଧରି ରହିବା। ବର୍ଷାରେ ଭିଜିବା ପରେ ଯେତେବେଳେ ଆପଣ ଆପଣଙ୍କର ଓଦା ମୋଜା, ଅନ୍ତଃବସ୍ତ୍ର କିମ୍ବା ପୋଷାକ ବଦଳାନ୍ତି ନାହିଁ , ସେତେବେଳେ ଆର୍ଦ୍ରତା ତ୍ୱଚାରେ ରହିଥାଏ। ଫଳରେ ଫଙ୍ଗଲ ସଂକ୍ରମଣ ହୋଇଥାଏ ।

-ମୌସୁମୀ ସମୟରେ ବାହାରେ ଥଣ୍ଡା ଥିଲେ ମଧ୍ୟ, ବାୟୁରେ ଅଧିକ ଆର୍ଦ୍ରତା ହେତୁ ଶରୀରରୁ ବାରମ୍ବାର ଝାଳ ବାହାରେ । ଯଦି ଆପଣ ଝାଳ ଏବଂ ଗରମ ସମୟରେ ଟାଇଟ୍ ଏବଂ ସିନ୍ଥେଟିକ୍ ପୋଷାକ ପିନ୍ଧନ୍ତି, ତେବେ ଏହି ଝାଳ ଚର୍ମରେ ଲାଗିଯାଏ ଏବଂ ଆଲର୍ଜି ଆରମ୍ଭ ହୁଏ।

-ବର୍ଷା ଋତୁରେ ଚର୍ମର ଉପରେ ଧୂଳି ଏବଂ ଝାଳ ଜମା ହୁଏ। ଯଦି ଆପଣ ଦିନକୁ ଅତି କମରେ ଦୁଇଥର ଆପଣଙ୍କ ମୁହଁ ଏବଂ ଶରୀରକୁ ଠିକ୍ ଭାବରେ ଧୋଇବେ ନାହିଁ, ତେବେ ଛିଦ୍ରଗୁଡ଼ିକ ବନ୍ଦ ହୋଇଯାଏ ଏବଂ ଚର୍ମରେ ରାସେସ୍ ହୋଇପାରେ।

-ଲଗାତାର ଓଦା ଜୋତା କିମ୍ବା ଚପଲ ପିନ୍ଧିବା। ଏହାଦ୍ବାରା ପାଦରୁ ଦୁର୍ଗନ୍ଧ ଆସେ ଏବଂ ଫଙ୍ଗଲ ସଂକ୍ରମଣ ମଧ୍ୟ ବୃଦ୍ଧି ପାଏ। ଏହା ବ୍ୟତୀତ ଅତ୍ୟଧିକ କ୍ରିମ୍ କିମ୍ବା ମଇଶ୍ଚରାଇଜର ବ୍ୟବହାର କରିବା ଦ୍ୱାରା ମଧ୍ୟ ଚର୍ମ ତେଲିଆ ହୋଇଯାଏ, ଯାହା ଆଲର୍ଜି ଏବଂ ଫଙ୍ଗଲ ସଂକ୍ରମଣର ଆଶଙ୍କା ବଢ଼ାଇଥାଏ।

-ବର୍ଷା ଦିନେ ବାହାରେ ମିଳୁଥିବା ରାସ୍ତାକଡ଼ର ଖାଦ୍ୟ ମଧ୍ୟ ସ୍କିନ ଆଲର୍ଜିର ଏକ କାରଣ ହୋଇପାରେ । କାରଣ ଦୂଷିତ ଖାଦ୍ୟ ଶରୀର ଭିତରୁ ଆଲର୍ଜି ପ୍ରତିକ୍ରିୟା ସୃଷ୍ଟି କରିପାରେ। ବର୍ଷା ସମୟରେ ରାସ୍ତା କଡ଼ରେ ମିଳୁଥିବା ଖାଦ୍ୟ ଖାଆନ୍ତୁ ନାହିଁ।

ଚର୍ମକୁ ସୁସ୍ଥ ରଖିବା ପାଇଁ ଗୁରୁତ୍ୱପୂର୍ଣ୍ଣ ଟିପ୍ସ:-

-ତୁରନ୍ତ ଓଦା ପୋଷାକ / ମୋଜା ପରିବର୍ତ୍ତନ କରନ୍ତୁ

-କଟନ ଡ୍ରେସ ପିନ୍ଧନ୍ତୁ

-ଦିନକୁ ଦୁଇଥର ସ୍କିନ କ୍ଲିନ କରନ୍ତୁ

-ଗାଧୋଇବା ପାଣିରେ ଆଣ୍ଟିସେପ୍ଟିକ୍ ଲିକ୍ବିଡ କିମ୍ବା ନିମ୍ବ ପତ୍ର ମିଶାନ୍ତୁ

-ଗାଧୋଇବା ପରେ ଆଣ୍ଟି-ଫଙ୍ଗଲ୍ ପାଉଡର ବ୍ୟବହାର କରିପାରିବେ