ଗୁଗୁଲ୍, ମାଇକ୍ରୋସଫ୍ଟ, ଫେସବୁକ୍…ଭାରତୀୟମାନଙ୍କୁ ଚାକିରି ଦିଅ ନାହିଁ, କାହିଁକି ଏମିତି କହିଲେ ଟ୍ରମ୍ପ….

ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗୁଗୁଲ୍, ମାଇକ୍ରୋସଫ୍ଟ ଏବଂ ଆପଲ୍ ଭଳି ଆମେରିକୀୟ ଟେକ୍ ଜାଏଣ୍ଟମାନଙ୍କୁ ଭାରତ ଏବଂ ଅନ୍ୟ ଦେଶରୁ କର୍ମଚାରୀ ନିଯୁକ୍ତି ବନ୍ଦ କରିବାକୁ ଆହ୍ୱାନ କରିଛନ୍ତି । ବୁଧବାର ୱାଶିଂଟନରେ ଏକ ଏଆଇ ସମ୍ମିଳନୀରେ ସେ କହିଛନ୍ତି ଯେ ଆମେରିକୀୟ କମ୍ପାନୀଗୁଡ଼ିକ ଏବେ ଚୀନରେ କାରଖାନା ନିର୍ମାଣ କରିବା କିମ୍ବା ଭାରତୀୟ ଟେକ୍ କର୍ମଚାରୀମାନଙ୍କୁ ନିଯୁକ୍ତି ଦେବା ପରିବର୍ତ୍ତେ ନିଜ ଦେଶରେ ନିଯୁକ୍ତି ସୃଷ୍ଟି କରିବା ଉପରେ ଧ୍ୟାନ ଦେବା ଉଚିତ। ଟ୍ରମ୍ପ ଟେକ୍ ଶିଳ୍ପର ‘ବିଶ୍ୱବ୍ୟାପୀ ମାନସିକତା’କୁ ସମାଲୋଚନା କରିଛନ୍ତି। ସେ କହିଛନ୍ତି ଯେ ଏହି ମନୋଭାବ ଯୋଗୁଁ ଅନେକ ଆମେରିକୀୟ ଅବହେଳିତ ଅନୁଭବ କରୁଛନ୍ତି। ରାଷ୍ଟ୍ରପତି ଦାବି କରିଛନ୍ତି ଯେ କିଛି ଶୀର୍ଷ ଟେକ୍ କମ୍ପାନୀ ଆମେରିକୀୟ ସ୍ୱାଧୀନତା ବ୍ୟବହାର କରି ଲାଭ କରିଛନ୍ତି। କିନ୍ତୁ, ସେମାନେ ଦେଶ ବାହାରେ ପ୍ରଚୁର ପରିମାଣରେ ନିବେଶ କରିଛନ୍ତି।

ଯଦିଓ କୌଣସି ଆନୁଷ୍ଠାନିକ ନିଯୁକ୍ତି ପ୍ରତିବନ୍ଧକ ଘୋଷଣା କରାଯାଇ ନାହିଁ, କିନ୍ତୁ ରାଷ୍ଟ୍ରପତିଙ୍କ ମନ୍ତବ୍ୟ ଇଞ୍ଜିନିୟରିଂ, ସଫ୍ଟୱେର୍ ବିକାଶ ଏବଂ ଏଆଇ ଭୂମିକା ପାଇଁ, ବିଶେଷକରି ଭାରତରୁ ନିର୍ଭର କରୁଥିବା ଆମେରିକା-ଭିତ୍ତିକ ଫାର୍ମଗୁଡ଼ିକ ପାଇଁ ଏକ ସ୍ପଷ୍ଟ ଚେତାବନୀ ଭାବରେ ଦେଖାଯାଉଛି । ଟ୍ରମ୍ପଙ୍କ ମନ୍ତବ୍ୟ ସେତେବେଳେ ଆସିଥିଲା ଯେତେବେଳେ ସେ କୃତ୍ରିମ ବୁଦ୍ଧିମତ୍ତା କ୍ଷେତ୍ରରେ ଆମେରିକାର ନେତୃତ୍ୱକୁ ସୁଦୃଢ଼ କରିବା ପାଇଁ ଲକ୍ଷ୍ୟ ରଖି ତିନୋଟି କାର୍ଯ୍ୟନିର୍ବାହୀ ନିର୍ଦ୍ଦେଶ ଉନ୍ମୋଚନ କରିଥିଲେ।

ଭାରତ ଉପରେ କି ପ୍ରଭାବ?

ଆମେରିକୀୟ ଟେକ୍ କମ୍ପାନୀଗୁଡ଼ିକୁ ବିଦେଶରେ, ବିଶେଷକରି ଭାରତରେ ଚାକିରି ନଦେବା ପାଇଁ ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶ ଅନେକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। ଏହା ତାଙ୍କର ‘ଆମେରିକା ଫାଷ୍ଟ’ ନୀତିର ଏକ ବିସ୍ତାର। ଏହା ଭାରତର ଆଇଟି କ୍ଷେତ୍ର ଏବଂ ବୃତ୍ତିଗତମାନଙ୍କ ଉପରେ ସିଧାସଳଖ ପ୍ରଭାବ ପକାଇପାରେ। ଏହି ଆଦେଶ ଭାରତୀୟ ଆଇଟି କମ୍ପାନୀ ଏବଂ ଆଉଟସୋର୍ସିଂ ଫାର୍ମଗୁଡ଼ିକ ପାଇଁ ଏକ ବଡ଼ ଚ୍ୟାଲେଞ୍ଜ ଉପସ୍ଥାପନ କରେ। ଭାରତୀୟ ଆଇଟି କ୍ଷେତ୍ରର ଏକ ବଡ଼ ଅଂଶ ଆମେରିକା ବଜାର ଉପରେ ନିର୍ଭରଶୀଳ। ଯଦି ଆମେରିକୀୟ କମ୍ପାନୀଗୁଡ଼ିକ ଭାରତରେ କମ୍ ନିଯୁକ୍ତି ଦିଅନ୍ତି, ତେବେ ନୂତନ ନିଯୁକ୍ତି ହ୍ରାସ ପାଇପାରେ। ଫ୍ରେଶର୍ସ ଏବଂ ପ୍ରବେଶ-ସ୍ତରୀୟ ଚାକିରି ସମସ୍ୟାରେ ପଡ଼ିପାରେ। କ୍ୟାମ୍ପସ୍ ପ୍ଲେସମେଣ୍ଟ ଏବଂ ଇଣ୍ଟର୍ନସିପ୍ ଅଫରରେ ବିଳମ୍ବ ହେବାର ସମ୍ଭାବନା ରହିଛି। ନାସକମ୍ ଆକଳନ ଅନୁଯାୟୀ, ଯଦି ଆମେରିକାର ଆଉଟସୋର୍ସିଂ ୧୦ରୁ ୧୫ ପ୍ରତିଶତ ହ୍ରାସ ପାଏ, ତେବେ ଆଗାମୀ ଦୁଇ ବର୍ଷ ମଧ୍ୟରେ ଭାରତରେ ୫ ଲକ୍ଷରୁ ଅଧିକ ଚାକିରି ହରାଇପାରନ୍ତି ।

ନିଯୁକ୍ତି ବନ୍ଦ ନେଇ କହିଛନ୍ତି ଟ୍ରମ୍ପ?

ଟ୍ରମ୍ପ ବଡ଼ ବଡ଼ ଆମେରିକୀୟ ଟେକ୍ କମ୍ପାନୀଗୁଡ଼ିକୁ ଭାରତ ଭଳି ଦେଶରେ ବିଦେଶରେ ନିଯୁକ୍ତି ବନ୍ଦ କରିବାକୁ କହିଛନ୍ତି। ତାଙ୍କ ଅନୁସାରେ, ଏବେ ଆମେରିକୀୟ କମ୍ପାନୀଗୁଡ଼ିକ ନିଜ ଦେଶରେ ନିଯୁକ୍ତି ସୃଷ୍ଟି କରିବା ଉଚିତ। ୱାଶିଂଟନରେ ଅନୁଷ୍ଠିତ ଏଆଇ ସମ୍ମିଳନୀରେ ଟ୍ରମ୍ପ ଟେକ୍ ଶିଳ୍ପ ଉପରେ ବର୍ଷିଥିଲେ। ସେ କହିଥିଲେ ଯେ ଟେକ୍ କମ୍ପାନୀଗୁଡ଼ିକର ‘ବିଶ୍ୱବାଦୀ ମାନସିକତା’ ଯୋଗୁଁ, ଅନେକ ଆମେରିକୀୟ ଅନୁଭବ କରନ୍ତି ଯେ କେହି ସେମାନଙ୍କ ବିଷୟରେ ଚିନ୍ତା କରନ୍ତି ନାହିଁ। ଟ୍ରମ୍ପଙ୍କ ଅନୁସାରେ, କିଛି ବଡ଼ ଟେକ୍ କମ୍ପାନୀ ଆମେରିକାର ସ୍ୱାଧୀନତାର ସୁଯୋଗ ନେଇଛନ୍ତି। କିନ୍ତୁ, ଚୀନରେ କାରଖାନା ନିର୍ମାଣ କରିଛନ୍ତି। ଭାରତୀୟ ଶ୍ରମିକଙ୍କୁ ଚାକିରି ଦେଇଛନ୍ତି। ଆୟରଲ୍ୟାଣ୍ଡରେ ସେମାନଙ୍କର ଲାଭ ଲୁଚାଇଛନ୍ତି । କିନ୍ତୁ ଏବେ ରାଷ୍ଟ୍ରପତି ଟ୍ରମ୍ପଙ୍କ ଅଧୀନରେ ସେହି ଦିନ ଶେଷ ହୋଇଯାଇଛି। ଏଆଇ ଦୌଡ଼ ଜିତିବା ପାଇଁ ସିଲିକନ୍ ଭ୍ୟାଲି ଏବଂ ବାହାରେ ଦେଶପ୍ରେମର ଏକ ନୂତନ ଭାବନା ଏବଂ ଜାତୀୟ ବିଶ୍ୱସ୍ତତା ଆବଶ୍ୟକ ହେବ। ଯାହାକୁ ନେଇ ସେ ଆମେରିକୀୟ କମ୍ପାନୀଗୁଡ଼ିକୁ ଆମେରିକାକୁ ପ୍ରାଥମିକତା ଦେବାକୁ ଆହ୍ୱାନ କରିଛନ୍ତି।

ତେବେ ଏହା କରିବା ପଛରେ ଟ୍ରମ୍ପଙ୍କ ଲକ୍ଷ୍ୟ ହେଉଛି, ଆମେରିକୀୟ କମ୍ପାନୀଗୁଡ଼ିକୁ ଚୀନରେ କାରଖାନା ନିର୍ମାଣ କରିବା କିମ୍ବା ଭାରତରେ ଚାକିରି ଦେବା ପରିବର୍ତ୍ତେ ଆମେରିକାରେ ନିବେଶ ଏବଂ ନିଯୁକ୍ତି ସୃଷ୍ଟି କରିବାକୁ ଉତ୍ସାହିତ କରିବା। ଏହା ଆମେରିକାରେ ସ୍ଥାନୀୟ ଉତ୍ପାଦନ ଏବଂ ପ୍ରଯୁକ୍ତିବିଦ୍ୟା ବିକାଶକୁ ପ୍ରୋତ୍ସାହିତ କରିବ। କିନ୍ତୁ, ଭାରତ ଭଳି ଦେଶରୁ ଆଉଟସୋର୍ସିଂ ହ୍ରାସ ପାଇପାରେ। ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ ମଧ୍ୟ H-1B ଭିସା ନିୟମରେ କଠୋରତା ଦେଖାଯାଇଥିଲା। ଏହି କାରଣରୁ, ଭାରତୀୟ ବୃତ୍ତିଗତମାନଙ୍କୁ ଆମେରିକାରେ କାମ କରିବାରେ ଅସୁବିଧାର ସମ୍ମୁଖୀନ ହେବାକୁ ପଡିଥିଲା। ତାଙ୍କର ନୂତନ ଆଭିମୁଖ୍ୟ ଭିସା ନିୟମକୁ ଆହୁରି କଠୋର କରିପାରେ। ଏହା ଭାରତୀୟ ଆଇଟି କର୍ମଚାରୀଙ୍କ ଆମେରିକାରେ କାମ କରିବାର ସ୍ୱପ୍ନକୁ ଭାଙ୍ଗି ଦେଇପାରେ।