Types Of Gold: କାହିଁକି ୧୮, ୨୨ ଏବଂ ୨୪ କ୍ୟାରେଟ୍ ହିଁ ହୋଇଥାଏ ସୁନା, ୧୯, ୨୧ କି ୨୫ ନୁହେଁ?

ନୂଆଦିଲ୍ଲୀ: ଶତାବ୍ଦୀ ଧରି ଆମ ଦେଶରେ ହଳଦିଆ ଧାତୁ ସୁନା ଏକ ଗୁରୁତ୍ୱପୂର୍ଣ୍ଣ ସ୍ଥାନ ଗ୍ରହଣ କରିଆସିଛି। ବିବାହ, ପର୍ବ କିମ୍ବା ଧାର୍ମିକ ରୀତିନୀତି ହେଉ, ସୁନା ଅଳଙ୍କାରର ଚମକ ପ୍ରତ୍ୟେକ ଅବସରକୁ ଅଧିକ ସ୍ୱତନ୍ତ୍ର କରିଥାଏ। ଭାରତୀୟମାନେ ସୁନାକୁ କେବଳ ଅଳଙ୍କାର ଭାବରେ ମୂଲ୍ୟବାନ ନୁହେଁ ବରଂ ଏକ ନିବେଶ ଭାବରେ ମଧ୍ୟ ମାନନ୍ତି। କିନ୍ତୁ ଯେତେବେଳେ ସୁନାର ଶୁଦ୍ଧତା କଥା ଆସେ, ଆମେ ପ୍ରାୟତଃ ୧୮, ୨୨ କିମ୍ବା ୨୪ କ୍ୟାରେଟ୍ ଭଳି ଶବ୍ଦ ଶୁଣିବାକୁ ପାଉ। ଆପଣ କେବେ ଭାବିଛନ୍ତି କି କ୍ୟାରେଟ୍ କ’ଣ ଏବଂ ଏହି ମାନଦଣ୍ଡ ଅନୁଯାୟୀ ସୁନା କାହିଁକି କିଣାଯିବା ଉଚିତ?

ସୁନା ମାନ ଦଣ୍ଡରେ କ୍ୟାରେଟ୍ ହେଉଛି ସୁନାର ଶୁଦ୍ଧତା ପାଇଁ ମାପକର ଏକ ଏକକ। ୨୪ କ୍ୟାରେଟ୍ ସୁନା ଅର୍ଥ ୧୦୦% ଶୁଦ୍ଧ ସୁନା, ଅର୍ଥାତ୍ ଏଥିରେ ଅନ୍ୟ କୌଣସି ଧାତୁ ନାହିଁ। କିନ୍ତୁ ଶୁଦ୍ଧ ସୁନା ବହୁତ ନରମ, ଯାହା ଫଳରେ ଏହାକୁ ଅଳଙ୍କାର ପାଇଁ ଉପଯୁକ୍ତ କରିବା ପାଇଁ ତମ୍ବା, ରୂପା କିମ୍ବା ଜିଙ୍କ ଭଳି ଧାତୁ ସହିତ ମିଶ୍ରିତ କରାଯାଏ । ଏହି କାରଣରୁ ବଜାରରେ ୧୮ କ୍ୟାରେଟ୍ (୭୫% ଶୁଦ୍ଧ) ଏବଂ ୨୨ କ୍ୟାରେଟ୍ (୯୧.୬୭% ଶୁଦ୍ଧ) ଭଳି ବିକଳ୍ପ ଉପଲବ୍ଧ। ଯେଉଁଥିରେ ୨୨ କ୍ୟାରେଟ୍ ସୁନା ହେଉଛି ୨୨ ଅଂଶ ଶୁଦ୍ଧ ସୁନା ଏବଂ ଅନ୍ୟ ଏକ ଧାତୁର ୨ ଅଂଶ । ଏହା ପ୍ରାୟ ୯୨ ପ୍ରତିଶତ ଶୁଦ୍ଧ ସୁନା। ସେହିପରି ୧୮ କ୍ୟାରେଟ୍ ସୁନା ହେଉଛି ୧୮ ଅଂଶ ଶୁଦ୍ଧ ସୁନା, ଅର୍ଥାତ୍ ୭୫ ପ୍ରତିଶତ ଶୁଦ୍ଧ ସୁନା।

ତେବେ ୨୨ କ୍ୟାରେଟ ସୁନା ୨୪-କ୍ୟାରେଟ୍ ସୁନା ଅପେକ୍ଷା ଅଧିକ ଶକ୍ତିଶାଳୀ, ତେଣୁ ଏହାକୁ ଫ୍ୟାଶନେବଲ୍ ଅଳଙ୍କାର ଡିଜାଇନ୍‌ରେ ବ୍ୟବହାର କରାଯାଏ। ୨୪-କ୍ୟାରେଟ୍ ସୁନା କେବଳ ମୁଦ୍ରା ପାଇଁ ଉପଯୁକ୍ତ । ଏହା କେବେବି ଅଳଙ୍କାରରେ ବ୍ୟବହାର ହୁଏ ନାହିଁ, ଏବଂ ଯଦି ଏହା ଥାଏ, ତେବେ ଏହା ୨୨-କ୍ୟାରେଟ୍ ପରି ଶକ୍ତିଶାଳୀ ନୁହେଁ।

ତେବେ ପ୍ରଶ୍ନ ହେଉଛି, କାହିଁକି ଅନ୍ୟ କୌଣସି ସଂଖ୍ୟାକୁ ଏଥିପାଇଁ ବ୍ୟବହାର କରାଯାଇନାହିଁ?, କାହିଁକି ୧୯, ୨୧, କିମ୍ବା ୨୫-କ୍ୟାରେଟ୍ ସୁନା ଉପଲବ୍ଧ କାହିଁକି ନାହିଁ। ତେବେ ଭାରତରେ, BIS (ବ୍ୟୁରୋ ଅଫ୍ ଇଣ୍ଡିଆନ୍ ଷ୍ଟାଣ୍ଡାର୍ସ ବା ଭାରତୀୟ ମାନକ ବ୍ୟୁରୋ) କେବଳ ୧୪, ୧୮, ୨୨, ଏବଂ ୨୪-କ୍ୟାରେଟ୍ ସୁନାକୁ ସ୍ୱୀକୃତି ଦିଏ ।  ୧୪, ୧୮, ଏବଂ ୨୨-କ୍ୟାରେଟ୍ ସୁନା ଅଳଙ୍କାର ପାଇଁ ହଲମାର୍କିଂ ଅନୁମତିପ୍ରାପ୍ତ। ହଲମାର୍କ ହେଉଛି BIS ଦ୍ୱାରା ଜାରି କରାଯାଇଥିବା ଏକ ଗୁଣାତ୍ମକ ପ୍ରମାଣପତ୍ର ଯାହା ଏକ ନିର୍ଦ୍ଦିଷ୍ଟ ଅଳଙ୍କାରରେ ସୁନାର ଶୁଦ୍ଧତାକୁ ଗ୍ୟାରେଣ୍ଟି ଦିଏ। ଯେଉଁଥି ପାଇଁ ଅନ୍ୟ କୌଣସି ନମ୍ବର ବ୍ୟବହାର କରାଯାଏ ନାହିଁ ।