ପହଲଗାମରେ ଆତଙ୍କବାଦୀ ଆକ୍ରମଣ ବେଳେ କାହିଁକି ନଥିଲା ପୋଲିସ, ଉତ୍ତର ରଖିଲେ ଏଲଜି ମନୋଜ ସିହ୍ନା

ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନା ଇଣ୍ଡିଆ ଟିଭିର ଏକ କାର୍ଯ୍ୟକ୍ରମରେ ସେ ପହଲଗାମର ବୈସାରଣ ଭ୍ୟାଲିରେ ଏପ୍ରିଲ ୨୨ରେ ହୋଇଥିବା ଆତଙ୍କବାଦୀ ଆକ୍ରମଣ ବିଷୟରେ କହିଛନ୍ତି। ଏହି ଆକ୍ରମଣରେ ୨୬ ଜଣ ନାଗରିକଙ୍କର ମୃତ୍ୟୁ ହୋଇଥିଲା, ଯେଉଁଥିରେ ୨୫ ଜଣ ଥିଲେ ପର୍ଯ୍ୟଟକ ଓ ଜଣେ ସ୍ଥାନୀୟ ଲୋକ ଥିଲେ।

ଆକ୍ରମଣ ସମୟରେ ବୈସାରଣରେ ପୋଲିସ ନ ଥିବା ବିଷୟରେ ସିହ୍ନା କହିଛନ୍ତି, ସେଠାରେ ଜିପଲାଇନିଂ ଓ ଅନ୍ୟ ପର୍ଯ୍ୟଟନ କାର୍ଯ୍ୟକ୍ରମ ବିନା ସରକାରୀ ଅନୁମତିରେ ଆରମ୍ଭ କରିଥିଲେ। ସେ ଜମ୍ମୁ ଓ କାଶ୍ମୀର ଟୁରିଜମ ଡେଭେଲପମେଣ୍ଟ କର୍ପୋରେସନ (ଟିଡିସି) ନିକଟରେ ଅନୁମତି ପାଇଁ ଆବେଦନ କରିଥିଲେ, କିନ୍ତୁ ଅନୁମତି ମିଳି ନଥିଲା। ପୋଲିସ କିମ୍ବା ପ୍ରଶାସନକୁ ସୂଚନା ନ ଦେଇ ସେ କାର୍ଯ୍ୟକ୍ରମ ଆରମ୍ଭ କରିଥିଲେ। ସିହ୍ନା କହିଛନ୍ତି, “ଚାରି ବର୍ଷ ଧରି ଉପତ୍ୟକାରେ ଶାନ୍ତି ଥିଲା। ଅନେକ ଛୋଟ ପର୍ଯ୍ୟଟନ ସ୍ଥଳୀ ସୃଷ୍ଟି ହୋଇଥିଲା।”

ସିହ୍ନା କହିଛନ୍ତି, ବୈସାରଣକୁ ଏହି ବ୍ୟକ୍ତି ଅନୁମତି ବିନା ତିନି ଦିନ ପୂର୍ବେ ଖୋଲିଥିଲେ। ପାକିସ୍ତାନୀ ଆତଙ୍କବାଦୀମାନେ ପୂର୍ବ ଯାଞ୍ଚ ପରେ ଏହି ଆକ୍ରମଣ କରିଥିଲେ। ସେ ଏହାକୁ ‘ଭାରତର ଆତ୍ମା ଉପରେ ଆଘାତ’ ବୋଲି କହିଛନ୍ତି। ଏହି ଘଟଣା ପରେ ଉପତ୍ୟକାରେ ସାଧାରଣ ଲୋକଙ୍କ ମଧ୍ୟରେ ପାକିସ୍ତାନ ଓ ଆତଙ୍କବାଦ ବିରୁଦ୍ଧରେ ତୀବ୍ର ରୋଷ ଦେଖାଦେଇଛି, ଯାହା ବର୍ଷ ବର୍ଷ ଧରି ଦେଖାଯାଇ ନଥିଲା।

ଆକ୍ରମଣ ପରେ ବନ୍ଦ ହୋଇଥିବା ପର୍ଯ୍ୟଟନ ସ୍ଥଳୀଗୁଡ଼ିକ ଧୀରେ ଧୀରେ କଡ଼ା ସୁରକ୍ଷା ସହ ଖୋଲୁଛି। କିନ୍ତୁ ଶ୍ରୀ ଅମରନାଥ ଯାତ୍ରା ଓ ରାସ୍ତା ଅଭାବ ହେତୁ ବୈସାରଣ ଏବେ ବି ବନ୍ଦ ଅଛି। ଆକ୍ରମଣକାରୀ ପାକିସ୍ତାନୀ ନାଗରିକ ଥିଲେ ବୋଲି ସିହ୍ନା ସ୍ପଷ୍ଟ କରିଛନ୍ତି। ଏହି ମାମଲାର ତଦନ୍ତ ଏନଆଇଏ କରୁଛି।

ସିହ୍ନା କହିଛନ୍ତି, ବିଦେଶୀ ଅନୁପ୍ରବେଶ ଏବେ ମୁଖ୍ୟ ଚିନ୍ତାର ବିଷୟ। କିନ୍ତୁ ଆତଙ୍କବାଦୀ ଗୋଷ୍ଠୀରେ ସ୍ଥାନୀୟ ଯୋଗଦାନ ବହୁତ କମିଛି। ବାର୍ଷିକ ୧୨୫-୧୫୦ରୁ ଏବେ ମାତ୍ର ଜଣେ ଯୋଗ ଦେଇଛନ୍ତି। ଅପରେସନ ସିନ୍ଦୂର ମାଧ୍ୟମରେ ଭାରତର କଡ଼ା ଜବାବୀ ନୀତି ବିଷୟରେ ସେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ପଷ୍ଟ କରିଛନ୍ତି ଯେ ଭବିଷ୍ୟତରେ କୌଣସି ଆତଙ୍କବାଦୀ ଆକ୍ରମଣକୁ ଯୁଦ୍ଧର କାର୍ଯ୍ୟ ଭାବେ ଗ୍ରହଣ କରାଯିବ।

ନିଜର ପାଞ୍ଚ ବର୍ଷର କାର୍ଯ୍ୟକାଳ ବିଷୟରେ ସିହ୍ନା କହିଛନ୍ତି, ଆଇନ ଶୃଙ୍ଖଳା ଫେରିଛି, ହରତାଲ ବନ୍ଦ ହୋଇଛି। ସିନେମା ଓ ଶିକ୍ଷା କ୍ଷେତ୍ରରେ ପୁନରୁଦ୍ଧାର ହୋଇଛି। ୪୦,୦୦୦ରୁ ଅଧିକ ସରକାରୀ ଚାକିରି ସ୍ୱଚ୍ଛତାର ସହ ଦିଆଯାଇଛି। ପର୍ଯ୍ୟଟନ ଓ ସ୍ୱୟଂ ରୋଜଗାର କ୍ଷେତ୍ରରେ ବୃଦ୍ଧି ହୋଇଛି। ସେ କହିଛନ୍ତି, “ପର୍ଯ୍ୟଟକମାନେ ଫେରୁଛନ୍ତି। ଚାରି ଲକ୍ଷ ଅମରନାଥ ଯାତ୍ରୀ ଆସିବେ ଓ ସେମାନେ ଶାନ୍ତିର ଦୂତ ହେବେ।”

ଉଲ୍ଲେଖଯୋଗ୍ୟ, ନିକଟରେ ସଂସଦରେ ଅପରେସନ ସିନ୍ଦୂରକୁ ନେଇ ସଂସଦରେ ବିତର୍କ ହୋଇଥିଲା। ଏହି ସମୟରେ କାହିଁକି ଉପତ୍ୟକାରେ ପୋଲିସ ନଥିଲା ବୋଲି ବିରୋଧୀ ସରକାରକୁ ପ୍ରଶ୍ନ କରିଥିଲେ।