ବୁଲା କୁକୁର ହଟାଇବା ନିଷ୍ପତ୍ତିକୁ ପ୍ରତ୍ୟାହାର କରିବେ କି ସୁପ୍ରିମକୋର୍ଟ?, ଏମିତି କହିଲେ ମୁଖ୍ୟ ବିଚାରପତି……

ନୂଆଦିଲ୍ଲୀ: ଦିଲ୍ଲୀ-ଏନସିଆରରେ ରାସ୍ତାରୁ ବୁଲା କୁକୁର ହଟାଇବା ପାଇଁ ସୁପ୍ରିମକୋର୍ଟଙ୍କ ସାମ୍ପ୍ରତିକ ନିଷ୍ପତ୍ତିକୁ ନେଇ ଏବେ ହଙ୍ଗାମା ସୃଷ୍ଟି ହୋଇଛି । ଇଣ୍ଟରନେଟରେ ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ପ୍ରତିଟି କୁକୁର ପ୍ରେମୀ । ସୁପ୍ରିମକୋର୍ଟଙ୍କ ଦ୍ୱାରା ଆଶ୍ରୟସ୍ଥଳୀକୁ ବୁଲା କୁକୁର ପଠାଇବା ନିର୍ଦ୍ଦେଶ ଉପରେ ଉତ୍ତେଜନା ମଧ୍ୟରେ, ଏହି ପ୍ରସଙ୍ଗ ଆଜି ୧୩ ଅଗଷ୍ଟରେ ସୁପ୍ରିମକୋର୍ଟରେ ପହଞ୍ଚିଛି । ଜଣେ ଓକିଲ କୋର୍ଟଙ୍କ ନିର୍ଦ୍ଦେଶ ସମ୍ପର୍କରେ ଏକ ଆବେଦନ ଦାଖଲ କରିଛନ୍ତି, ଯାହା ଉପରେ ଭାରତର ମୁଖ୍ୟ ବିଚାରପତି (CJI) ବି.ଆର. ଗବାଇ କହିଛନ୍ତି ଯେ ସେ ଏହି ମାମଲାକୁ ପୁନଶ୍ଚ ବିଚାର କରିବେ ।

ତେବେ ସୁପ୍ରିମକୋର୍ଟଙ୍କ ସାମ୍ପ୍ରତିକ ନିଷ୍ପତ୍ତିକୁ ନେଇ ଏବେ ଅନେକ ଆଲୋଚନା ସୃଷ୍ଟି ହେଉଛି। ଏଥିରେ ଗୋଟିଏ ପକ୍ଷ କୁକୁର ପ୍ରେମୀଙ୍କର, ଯେଉଁମାନେ ଏହି ନିଷ୍ପତ୍ତି ଉପରେ ଚିନ୍ତା ପ୍ରକାଶ କରୁଛନ୍ତି। କୁକୁର ପ୍ରେମୀମାନେ କହିଛନ୍ତି ଯେ ଏହି ନିଷ୍ପତ୍ତି ସମସ୍ୟାର ସ୍ଥାୟୀ ସମାଧାନ ପ୍ରଦାନ କରିବ ନାହିଁ। ଅନ୍ୟପକ୍ଷରେ, ଅନ୍ୟ ପକ୍ଷ ସମାଜର ସେହି ବର୍ଗର, ଯେଉଁମାନେ ଏହି ନିଷ୍ପତ୍ତିକୁ ସ୍ୱାଗତ କରୁଛନ୍ତି। ଯାହାକୁ ନେଇ ଏବେ ବିବାଦ ତେଜିଥିବା ବେଳେ ସିଜେଆଇ ଗବାଇଙ୍କ ବୟାନ ଟିକିଏ ଆଶ୍ବସ୍ତି ଦେଇଛି ।

ବାର ଏବଂ ବେଞ୍ଚ ରିପୋର୍ଟ ଅନୁଯାୟୀ, ଜଣେ ଓକିଲ ସିଜେଆଇ ବି.ଆର. ଗଭାଇଙ୍କ ସମ୍ମୁଖରେ ଏହି ପ୍ରସଙ୍ଗ ଉଠାଇଥିଲେ ଏବଂ ସୁପ୍ରିମକୋର୍ଟଙ୍କ ଏକ ପୁରୁଣା ନିର୍ଦ୍ଦେଶର ଉଲ୍ଲେଖ କରିଥିଲେ, ଯେଉଁଥିରେ କୁହାଯାଇଥିଲା ଯେ ସମସ୍ତ ଜୀବଜନ୍ତୁଙ୍କ ପ୍ରତି କରୁଣା ରହିବା ଉଚିତ। କୋର୍ଟର ପୁରୁଣା ଆଦେଶକୁ ଉଲ୍ଲେଖ କରି ସେ କହିଛନ୍ତି, ଏହା ସମ୍ପ୍ରଦାୟ କୁକୁରଙ୍କ ବିଷୟ। ସୁପ୍ରିମକୋର୍ଟର ଏକ ପୁରୁଣା ଆଦେଶ ଅଛି, ଯେଉଁଥିରେ କୁହାଯାଇଛି ଯେ କୌଣସି ପରିସ୍ଥିତିରେ କୁକୁରମାନଙ୍କୁ ନିର୍ବିକାର ଭାବରେ ହତ୍ୟା କରାଯାଇପାରିବ ନାହିଁ। ରାୟ ଦେଇଥିବା ଖଣ୍ଡପୀଠରେ ଜଷ୍ଟିସ କାରୋଲଙ୍କୁ ମଧ୍ୟ ସାମିଲ କରାଯାଇଥିଲା। ରାୟରେ କୁହାଯାଇଥିଲା ଯେ ସମସ୍ତ ଜୀବଜନ୍ତୁଙ୍କ ପ୍ରତି କରୁଣା ରହିବା ଉଚିତ।’ ଆଇନଜୀବୀଙ୍କ ଯୁକ୍ତି ଶୁଣିବା ପରେ, ସିଜେଆଇ ଉତ୍ତର ଦେଇଥିଲେ, ଯଦିଓ ଖଣ୍ଡପୀଠ ପୂର୍ବରୁ ତାଙ୍କର ରାୟ ଦେଇସାରିଛନ୍ତି ତଥାପି ମୁଁ ଏହା ଉପରେ ବିଚାର କରିବି ବୋଲି କହିଛନ୍ତି ସିଜେଆଇ ।

ତେବେ କହିରଖୁଛୁ, ଦିଲ୍ଲୀ-ଏନସିଆରରେ ବୁଲା କୁକୁରଙ୍କ ଆକ୍ରମଣ ଏବଂ ରାବିଜ୍ ଯୋଗୁଁ ମୃତ୍ୟୁ ବୃଦ୍ଧିକୁ ଦୃଷ୍ଟିରେ ରଖି, ସୁପ୍ରିମକୋର୍ଟ ଅଗଷ୍ଟ ୧୧ରେ ଏକ ଗୁରୁତ୍ୱପୂର୍ଣ୍ଣ ଆଦେଶ ଜାରି କରିଛନ୍ତି। ସୁପ୍ରିମକୋର୍ଟ ୮ ସପ୍ତାହ ମଧ୍ୟରେ ଦିଲ୍ଲୀ-ଏନସିଆରର ସମସ୍ତ ବୁଲା କୁକୁରଙ୍କୁ ଆବାସିକ ଅଞ୍ଚଳରୁ ଉଠାଇ ଆଶ୍ରୟସ୍ଥଳ ବା ସେଲ୍ଟର ହୋମରେ ରଖିବା ଉଚିତ ବୋଲି ନିର୍ଦ୍ଦେଶ ଜାରି କରିଛନ୍ତି । କୋର୍ଟ ଏହା ମଧ୍ୟ ଚେତାବନୀ ଦେଇଛନ୍ତି ଯେ ଏହି କାର୍ଯ୍ୟରେ ବାଧା ସୃଷ୍ଟି କରୁଥିବା ଯେକୌଣସି ସଂଗଠନ କିମ୍ବା ବ୍ୟକ୍ତିଙ୍କ ବିରୁଦ୍ଧରେ ମଧ୍ୟ କଠୋର କାର୍ଯ୍ୟାନୁଷ୍ଠାନ ନିଆଯିବ । ଯାହାକୁ ନେଇ ଏବେ ଅସନ୍ତୋଷ ସୃଷ୍ଟି ହୋଇଥିବା ବେଳେ ଗବାଇଙ୍କ ବୟାନ କୁକୁର ପ୍ରେମୀଙ୍କ ମନରେ ଏକ ଆଶା ସଞ୍ଚାର କରିଛି ।