ଭୁବନେଶ୍ୱର: ବିନା ପାସ୍ରେ ଓଡ଼ିଶା ଆସି ପାରିବେ ନାହିଁ ପ୍ରବାସୀ ଓଡ଼ିଆ । ବାହାରୁ ଆସୁଥିବା ବସ୍ ପାଇଁ ପାସ୍ ବାଧ୍ୟତାମୂଳକ । ବିନା ପାସ୍ରେ ବସ୍ ଆସିଲେ ଓଡ଼ିଶା ସୀମା ପ୍ରବେଶ ଅନୁମତି ମିଳିବ ନାହିଁ । ଏନେଇ ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରିଛନ୍ତି ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ।
ସେ କହିଛନ୍ତି, ବସ୍ରେ ଭିଡ ଥିଲେ ଓଡ଼ିଶା ଆସିପାରିବେ ନାହିଁ । ଏପରିକି ସରକାର ଜାରି କରିଥିବା ରୁଟ ବଦଳରେ ଅନ୍ୟ ରୁଟ ଦେଇ ଗାଡି ପଶିଲେ ତାକୁ ସିଜ୍ କରାଯିବ ବୋଲି ସରକାର କହିଛନ୍ତି ।
କିଛି କମ୍ ସଂଖ୍ୟକ ଲୋକଙ୍କ ପାଇଁ ଓଡିଶାର ସମସ୍ତ ଜନସାଧାରଣଙ୍କୁ ବିପଦରେ ପକାଇ ଦିଆଯାଇପାରିବ ନାହିଁ । ବାହାରୁ ଆସୁଥିବା ପ୍ରବାସୀ ଓଡ଼ିଆ ସରକାରଙ୍କୁ ସହଯୋଗ କରନ୍ତୁ ବୋଲି ମୁଖ୍ୟଶାସନ ସଚିବ ଅନୁରୋଧ କରିଛନ୍ତି ।
ଓଡ଼ିଶା ଆସିବାକୁ ଥିବା ପ୍ରବାସୀ ନିଜ ନାଁ ରେଜିଷ୍ଟର କରନ୍ତୁ ଏବଂ ସରକାରଙ୍କ କ୍ୱାରେଂଟିନ ନିୟମ ପାଳନ କରନ୍ତୁ ବୋଲି ସେ କହିଛନ୍ତି । ଏଥିସହ ଜିଳ୍ଲାପାଳ କ୍ଷମତା ଦିଆଯାଇଥିବା ସରପଂଚ ସଙ୍ଗରୋଧ କେନ୍ଦ୍ରରେ ହେଉଥିବା ବିଶୃଙ୍ଖଳାର ତଦାରଖ କରନ୍ତୁ ବୋଲି ସରକାର ନିର୍ଦ୍ଦେଶ ଦେଇଛନ୍ତି।