ଟ୍ରେନରେ ଜଣେ ମହିଳା ଇଲେକ୍ଟ୍ରିକ୍ କେଟିଲରେ ପ୍ରସ୍ତୁତ କଲେ ମ୍ୟାଗି, ଭିଡିଓ ଭାଇରାଲ ପରେ ରେଳବାଇ…

ନୂଆଦିଲ୍ଲୀ: ଟ୍ରେନରେ ଯାତ୍ରା କରୁଥିବା ଜଣେ ମହିଳାଙ୍କ ଅଜବ ଗଜବ ହରକତ ସାମ୍ନାକୁ ଆସିଛି । ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ଏକ ଏସି କୋଚରେ ମୋବାଇଲ ଚାର୍ଜିଂ ପଏଣ୍ଟରେ ଇଲେକ୍ଟ୍ରିକ୍ କେଟିଲ୍ ଲଗାଇ ମହିଳା ଜଣକ ମ୍ୟାଗି ତିଆରି କରୁଛନ୍ତି । ଏହି ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି । କେନ୍ଦ୍ରୀୟ ରେଳବାଇ ଏହି ଭିଡିଓ ଉପରେ କଡ଼ା ପ୍ରତିକ୍ରିୟା ପ୍ରକାଶ କରିଛି । ସମ୍ପୃକ୍ତ ଲୋକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିବା ରେଳବାଇ ନିଶ୍ଚିତ କରିଛି ।

ଏହି ଭିଡିଓ ଯାତ୍ରୀମାନଙ୍କ ମଧ୍ୟରେ ଆଚମ୍ବିତ ଏବଂ ସୁରକ୍ଷା ଚିନ୍ତା ସୃଷ୍ଟି କରିଛି । କେନ୍ଦ୍ରୀୟ ରେଳବାଇ କହିଛି ଯେ ଏହା ମ୍ୟାଗି ତିଆରି କରିଥିବା ମହିଳାଙ୍କୁ ଖୋଜିବାକୁ ଚେଷ୍ଟା କରୁଛି । ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି କେନ୍ଦ୍ରୀୟ ରେଳବାଇ କହିଛି ଯେ ଟ୍ରେନରେ ଇଲେକ୍ଟ୍ରିକ୍ କେଟଲ୍ ବ୍ୟବହାର ନିଷେଧ । ଏହା କେବଳ ଅସୁରକ୍ଷିତ ଏବଂ ବେଆଇନ ନୁହେଁ, ବରଂ ଏକ ଦଣ୍ଡନୀୟ ଅପରାଧ ମଧ୍ୟ । ରେଳବାଇ ଚେତାବନୀ ଦେଇଛି ଯେ ଏପରି କାର୍ଯ୍ୟ ଟ୍ରେନରେ ନିଆଁଲଗାଇପାରେ ଏବଂ ଅନ୍ୟମାନଙ୍କ ଜୀବନକୁ ବିପଦରେ ପକାଇପାରେ । ଏହା ଟ୍ରେନରେ ବିଦ୍ୟୁତ୍ ଯୋଗାଣ ବାଧାପ୍ରାପ୍ତ କରିପାରେ ଏବଂ ଏସି ଏବଂ ଅନ୍ୟାନ୍ୟ ଇଲେକ୍ଟ୍ରୋନିକ୍ ପୋର୍ଟଗୁଡ଼ିକୁ କ୍ଷତି ପହଞ୍ଚାଇପାରେ ।

ରେଳବାଇ ଯାତ୍ରୀମାନଙ୍କୁ ଏପରି ବିପଦପୂର୍ଣ୍ଣ କାର୍ଯ୍ୟରୁ ଦୂରେଇ ରହିବାକୁ ମଧ୍ୟ ନିବେଦନ କରିଛି । “ଯାତ୍ରୀମାନଙ୍କୁ ଏପରି ବିପଦପୂର୍ଣ୍ଣ ଆଚରଣରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି । ଯଦି ସେମାନେ ଏପରି କୌଣସି କାର୍ଯ୍ୟକଳାପ ଦେଖନ୍ତି, ତେବେ ସୁରକ୍ଷା ସୁନିଶ୍ଚିତ କରିବା ପାଇଁ ତୁରନ୍ତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ରିପୋର୍ଟ କରିବାକୁ ଅନୁରୋଧ କରାଯାଇଛି ବୋଲି ରେଳବାଇ କହିଛି ।

କେନ୍ଦ୍ରୀୟ ରେଳବାଇର ଜଣେ ଅଧିକାରୀ କହିଛନ୍ତି ଯେ, ମହିଳା ଯାତ୍ରୀଙ୍କୁ ଚିହ୍ନଟ କରାଯାଇଛି ଏବଂ ତାଙ୍କୁ ଖୋଜିବା ପାଇଁ ପ୍ରୟାସ କରାଯାଉଛି । ସେ ଆହୁରି ମଧ୍ୟ କହିଛନ୍ତି ଯେ ରେଳବାଇ ଆଇନର ଧାରା 147(1) ଅନୁଯାୟୀ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ ।

ଭିଡିଓରେ ଏକ ମୋବାଇଲ୍ ଫୋନ୍ ଚାର୍ଜିଂ ସକେଟ ସହିତ ସଂଯୋଗ ହୋଇଥିବା ଏକ ଇଲେକ୍ଟ୍ରିକ୍ କେଟଲ୍ ଦେଖାଯାଉଛି । ମହିଳା ଜଣକ ମରାଠୀ ଭାଷାରେ କଥା ହେଉଛନ୍ତି । ସେ ବ୍ୟାଖ୍ୟା କରିଛନ୍ତି ଯେ ସେ ଏହି ପଦ୍ଧତି ବ୍ୟବହାର କରି 10-15 ଜଣଙ୍କ ପାଇଁ ଚା ପ୍ରସ୍ତୁତ କରିଥିଲେ । ଭିଡିଓ ପ୍ରକାଶ ପାଇବା ପରେ, ରେଳବାଇ ଏହି ମାମଲାକୁ ଗମ୍ଭୀରତାର ସହ ନେଇ ମହିଳାଙ୍କୁ ଖୋଜିବା ଆରମ୍ଭ କରିଦେଇଛି ।