ପାଟନା: ବିହାରର ବକ୍ସର ଜିଲ୍ଲାର ନୂଆ ଭୋଜପୁର ଥାନା ଅଞ୍ଚଳର ଏକ ଗାଁରେ ମଙ୍ଗଳବାର ସନ୍ଧ୍ୟାରେ ଏକ ହୃଦୟ ବିଦାରକ ଘଟଣା ଘଟିଛି। ବହୁଦିନ ଧରି ମୋବାଇଲ କିଣିଦେବା ପାଇଁ ଜିଦି କରୁଥିଲା ସ୍ତ୍ରୀ । ହେଲେ ପତ୍ନୀର ଇଚ୍ଛା ପୂରଣ କରିନଥିଲା ସ୍ବାମୀ । ଫଳରେ ଜଣେ ବିବାହିତ ମହିଳା ତାଙ୍କ ତିନି ନିଷ୍ପାପ ଛୁଆଙ୍କ ସହିତ ବିଷ ପିଇ ଦେଇଛନ୍ତି । ଫଳରେ ମାଆ ସହ ୩ ଛୁଆଙ୍କ ମୃତ୍ୟୁ ଘଟିଛି ।
ନୂଆ ଭୋଜପୁର ଗ୍ରାମର ସୁନୀଲ କୁମାରଙ୍କ ପତ୍ନୀ ସବିତା ଦେବୀ (୩୦) ମଙ୍ଗଳବାର ଅପରାହ୍ନ ପ୍ରାୟ ୧ଟାରେ ଘରେ ରଖାଯାଇଥିବା କୀଟନାଶକ ପିଇ ଦେଇଥିଲେ ଏବଂ ତାଙ୍କ ପିଲାମାନଙ୍କୁ ମଧ୍ୟ ପିଆଇ ଦେଇଥିଲେ । ଏନେଇ ପରିବାର ଲୋକ ଜାଣିବା ପରେ ପାଖ ପଡୋଶୀଙ୍କ ସହାୟତାରେ ତୁରନ୍ତ ସମସ୍ତଙ୍କୁ ଉପଖଣ୍ଡ ହସ୍ପିଟାଲକୁ ନେଇଥିଲେ । ସେଠାରୁ ଗୁରୁତର ଅବସ୍ଥାରେ ସେମାନଙ୍କୁ ବକ୍ସର ସ୍ଥାନାନ୍ତର କରାଯାଇଥିଲା ।
ଚିକିତ୍ସା ସମୟରେ ସବିତା ଦେବୀଙ୍କ ସହ ତାଙ୍କ ପାଞ୍ଚ ବର୍ଷର ଝିଅ ଜ୍ୟୋତି ଏବଂ ତିନି ବର୍ଷର ପୁଅ ଆକାଶଙ୍କ ମୃତ୍ୟୁ ହୋଇଥିଲା। କିଛି ଘଣ୍ଟା ପରେ ତାଙ୍କ ୧୨ ମାସର ପୁଅ ବିକାଶର ମଧ୍ୟ ମୃତ୍ୟୁ ହୋଇଥିଲା। ଡାକ୍ତରମାନେ ବିକାଶଙ୍କୁ ଗୁରୁତର ଅବସ୍ଥାରେ ପାଟନାର PMCHକୁ ରେଫର କରିଥିଲେ, ଯେଉଁଠାରେ ତାଙ୍କର ଚିକିତ୍ସା ସମୟରେ ମୃତ୍ୟୁ ହୋଇଥିଲା।
ମୃତ ମହିଳାଙ୍କ ସ୍ୱାମୀ ସୁନୀଲ କୁମାର କହିଛନ୍ତି, “ସବିତା କିଛି ଦିନ ଧରି ମୋବାଇଲ୍ ଫୋନ୍ ମାଗୁଥିଲେ। ତାଙ୍କୁ ଫୋନ ନଦେବାରୁ ମଙ୍ଗଳବାର ଦିନ, ସେ ଏଭଳି ଚରମ ନିଷ୍ପତ୍ତି ନେଇଛନ୍ତି ।” ସେ ଆହୁରି ମଧ୍ୟ କହିଛନ୍ତି ଯେ ସବିତା ତାଙ୍କର ତୃତୀୟ ପତ୍ନୀ ଥିଲେ। ଏହା ପୂର୍ବରୁ ତାଙ୍କର ଦୁଇ ପତ୍ନୀଙ୍କ ମୃତ୍ୟୁ ହୋଇଥିଲା। ତାଙ୍କ ପ୍ରଥମ ସ୍ତ୍ରୀଙ୍କ ଝିଅ ଜ୍ୟୋତି ମଧ୍ୟ ଏହି ଅଘଟଣରେ ପ୍ରାଣ ହରାଇଛନ୍ତି ।
ଘଟଣା ସମ୍ପର୍କରେ ସୂଚନା ପାଇବା ପରେ ଟାଉନ୍ ପୋଲିସ ଷ୍ଟେସନ୍ ଅଧିକାରୀ ମନୋଜ କୁମାର ସିଂହ ତାଙ୍କ ଦଳ ସହିତ ସଦର ହସ୍ପିଟାଲରେ ପହଞ୍ଚି ଘଟଣାର ତଦନ୍ତ କରିଛନ୍ତି। ପୋଲିସ ମୃତଦେହଗୁଡ଼ିକୁ ପୋଷ୍ଟମର୍ଟମ୍ ପାଇଁ ପଠାଇଛି ଏବଂ ଅଧିକ ତଦନ୍ତ ଜାରି ରହିଛି।
Comments are closed.