ଛତିଶଗଡ଼: ଦନ୍ତେୱାଡାରେ ବଡ଼ ଧରଣର ଏନ୍କାଉଣ୍ଟର । ବିଜାପୁରରେ ପୁଣି ମୁହାଁମୁହିଁ ହେଲେ ପୋଲିସ-ମାଓବାଦୀ । ପୋଲିସ-ମାଓବାଦୀ ମଧ୍ୟରେ ଗୁଳି ବିନିମୟ । ଜଣେ ମାଓବାଦୀଙ୍କ ମୃତଦେହ ମିଳିଥିବା ବେଳେ ଏକାଧିକ ମୃତ୍ୟୁ ସନ୍ଦେହ । ସେପଟେ ଉକ୍ତ ସ୍ଥାନରୁ ବିପୁଳ ମାଓ ଅସ୍ତ୍ରଶସ୍ତ୍ର ଜବତ କରିଛି ସୁରକ୍ଷାବାହିନୀ । ଏବେବି ଜାରି ରହିଛି ଗୁଳି ବିନିମୟ ।
ସୂଚନା ଅନୁସାରେ, ଛତିଶଗଡ ଦାନ୍ତେୱାଡା ଓ ବିଜାପୁର ସୀମାରେ ପୋଲିସ-ମାଓବାଦୀ ଗୁଳିବିନିମୟ ଜାରି । ଏଯାବତ୍ ଜଣେ ମହିଳା ମାଓବାଦୀଙ୍କ ମୃତଦେହ ମିଳିଥିବା ବେଳେ ଆଗକୁ ମୃତ୍ୟୁ ସଂଖ୍ୟା ବଢିବା ନେଇ ଆଶଙ୍କା ରହିଛି । ଘଟଣାସ୍ଥଳରୁ ଇନ୍ସାସ୍ ରାଇଫଲ ସମେତ ବିପୁଳ ମାରଣାସ୍ତ୍ର ଜବତ କରାଯାଇଛି । ମୃତ ମହିଳା ମାଓବାଦୀଙ୍କ ନାଁ ହେଉଛି ରେଣୁକା । ସେ ତେଲେଙ୍ଗାନା ୱାରଙ୍ଗଲ ଜିଲ୍ଲାର ବୋଲି ସୂଚନା ମିଳିଛି । ଦଣ୍ଡକାରଣ୍ୟ ସ୍ପେଶାଲ୍ ଜୋନାଲ୍ କମିଟି (DKSZC) ସଦସ୍ୟ ଥିଲେ ରେଣୁକା । ନକ୍ସଲ ମିଡିଆ ଟିମ୍ ପାଇଁ ଦୀର୍ଘ ଦିନ ଧରି କାର୍ଯ୍ୟ କରି ଆସୁଥିଲେ ରେଣୁକା । ତେବେ ରେଣୁକାଙ୍କୁ ଧରାଇ ଦେବାକୁ ୨୫ ଲକ୍ଷ ଟଙ୍କାର ପୁରସ୍କାର ଘୋଷଣା ହୋଇଥିଲା ।
କହିରଖୁଛୁ ଯେ, ଗତକାଲି ଛତିଶଗଡ ଦାନ୍ତେୱାଡା ରେ ଯବାନଙ୍କ ଏନକାଉଣ୍ଟରରେ ମଧ୍ୟ ୩ ମାଓବାଦୀ ନିପାତ ହୋଇଥିଲେ । ସେହିପରି ଏନକାଉଣ୍ଟର ଭୟରେ ଛତିଶଗଡ଼ ବିଜାପୁର ଏସ୍ପିଙ୍କ ନିକଟରେ ୫୦ ମାଓବାଦୀଙ୍କ ଆତ୍ମସମର୍ପଣ କରିଥିଲେ । ଏହାର ଗୋଟେ ଦିନ ପୂର୍ବରୁ ସୁକୁମାରେ ଏନକାଉଣ୍ଟରରେ ୧୭ ନକ୍ସଲ ନିହତ ହୋଇଥିଲେ । ଧିରେ ଧିରେ ଭୁଷୁଡିବାରେ ଲାଗିଛି ଲାଲଗଡ । ସୁରକ୍ଷାକର୍ମୀଙ୍କ ଲଗାତାର ଚଢ଼ାଉ ଓ ଏନକାଉଣ୍ଟର ଯୋଗୁଁ କିଛି ମାଓବାଦୀ ଜୀବନ ହାରୁଥିବା ବେଳେ କିଛି ଜୀବନ ବଞ୍ଚାଇବାକୁ ଆତ୍ମସମର୍ପଣ କରୁଛନ୍ତି ।
Comments are closed.