ଭୁବନେଶ୍ୱର: କରୋନା କବଳରେ ସାରା ବିଶ୍ୱ । ସବୁଆଡେ କରୋନା ପାଇଁ ହାହାକାର । ଏପର୍ଯ୍ୟନ୍ତ ପ୍ରାୟ ପ୍ରତ୍ୟେକଟି ଦେଶରେ ଏହା ନିଜର କାୟା ବିସ୍ତାର କରି ସାରିଲାଣି । ଆମେରିକା, ଇଟାଲୀ ଭଳି ଶକ୍ତିଶାଳୀ ରାଷ୍ଟ୍ର ମଧ୍ୟ କରୋନା ଆଗରେ ହାତ ଟେକି ସାରିଲେଣି । ସମଗ୍ର ବିଶ୍ୱର ଡାକ୍ତର ତଥା ସ୍ୱାସ୍ଥ୍ୟକର୍ମୀ ମାନେ ଏହାର ମୁକାବିଲା ପାଇଁ ରାତିଦିନ ଏକ କରିଛନ୍ତି ।
ପ୍ରତିଦିନ କରୋନାକୁ ନେଇ ତୁହା କୁ ତୁହା ନକରାତ୍ମକ ଖବର ଆସୁଛି । ପ୍ରତିଦିନ ଆକ୍ରାନ୍ତ ଓ ମୃତକଙ୍କ ସଂଖ୍ୟା ବଢି ଚାଲିଛି । ଏହାସହ କରୋନା କବଳରୁ ରକ୍ଷା ପାଉଥିବା ବ୍ୟକ୍ତିଙ୍କ ସଂଖ୍ୟା ଦେଖିଲେ ଏସବୁ ମଧ୍ୟରେ ଟିକିଏ ଆଶ୍ବସ୍ଥି ମିଳୁଛି ।
ଏପର୍ଯ୍ୟନ୍ତ ଏହି ମାରାତ୍ମକ ରୋଗ ପାଇଁ କୌଣସି ଔଷଧ ବାହାରି ପାରି ନାହିଁ । ଏହା ସତ୍ତ୍ୱେ ମଧ୍ୟ ଡ଼ାକ୍ତର ମାନେ ଏହି ରୋଗରେ ଅଙ୍କୁଶ ଲଗାଇବାରେ ଏକ ରକମର ସଫଳତା ପ୍ରାପ୍ତ କରିଛନ୍ତି।
ବିଶ୍ୱରୁ ଆରମ୍ଭ କରି ଆମ ରାଜ୍ୟ ଓଡିଶା ପର୍ଯ୍ୟନ୍ତ ସ୍ୱାସ୍ଥ୍ୟ ବିଭାଗର ରିପୋର୍ଟକୁ ଦେଖିଲେ ଏହା ଜଣାପଡୁଛି । ରିପୋର୍ଟରୁ ଏହା ସ୍ପଷ୍ଟ ହେଉଛି ଯେ, କରୋନା ମାମଲାରେ ମୃତକଙ୍କ ଅପେକ୍ଷା ଆରୋଗ୍ୟଙ୍କ ସଂଖ୍ୟା ମାତ୍ରାଧିକ ରହିଛି ।
ବିଶ୍ୱ ସ୍ୱାସ୍ଥ୍ୟ ସଂଗଠନର ରିପୋର୍ଟ ଅନୁଯାୟୀ, ବିଶ୍ୱରେ ଏପର୍ଯ୍ୟନ୍ତ ୩୨ ଲକ୍ଷ ୨୦ ହଜାର ୩୩୮ ଜଣ ବ୍ୟକ୍ତି କରୋନାରେ ଆକ୍ରାନ୍ତ ହୋଇଛନ୍ତି । ସେଥିରୁ ୧୦,୦୦,୩୫୫ ଜଣ ବ୍ୟକ୍ତି ସୁସ୍ଥ ହୋଇଛନ୍ତି । ଯାହା ନିହାତି ପକ୍ଷେ ଏକ ଆସ୍ୱସ୍ତି ଜନକ ଖବର।
ସେହିପରି ଯଦି ଭାରତୀୟ ସ୍ୱାସ୍ଥ୍ୟ ବିଭାଗର ରିପୋର୍ଟ ଦେଖିବା ତେବେ ୩୩ ହଜାରରୁ ଉର୍ଦ୍ଧ୍ବ ବ୍ୟକ୍ତି କରୋନାରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୮,୪୪୨ ଜଣ ସୁସ୍ଥ ହୋଇଛନ୍ତି ।
ଅନ୍ୟପକ୍ଷରେ ଆମ ରାଜ୍ୟ ଓଡ଼ିଶାର ସ୍ୱାସ୍ଥ୍ୟ ଓ ପରିବାର କଲ୍ୟାଣର ସଦ୍ୟତମ ରିପୋର୍ଟ ଅନୁଯାୟୀ ଏପର୍ଯ୍ୟନ୍ତ ରାଜ୍ୟରେ ୧୨୮ ଜଣ ବ୍ୟକ୍ତି ସଂକ୍ରମିତ ହୋଇ ହୋଇଛନ୍ତି । ସେମାନଙ୍କ ମଧ୍ୟରୁ ଜଣେ ବ୍ୟକ୍ତି ପ୍ରାଣ ହରାଇଥିବା ବେଳେ ୩୯ ଜଣ ସୁସ୍ଥ ହୋଇ ଘରକୁ ଫେରିଛନ୍ତି ।