ମୁମ୍ବାଇ: ବଲିଉଡ୍ରେ ଅନେକ ଦିନରୁ ‘ରାମାୟଣ’ ଉପରେ ଏକ ଫିଲ୍ମ ତିଆରି ହେଉଥିବା ଶୁଣିବାକୁ ମିଳୁଛି । ଫିଲ୍ମ ନିର୍ମାତା ନିତେଶ ତିୱାରୀ ‘ରାମାୟଣ’କୁ ବଡ଼ ପରଦାରେ ଦର୍ଶକଙ୍କ ପାଖରେ ପହଞ୍ଚାଇବା ପାଇଁ ଯୋଜନା କରିଛନ୍ତି । ଏହି ‘ରାମାୟଣ’ର ମୁଖ୍ୟ ଚରିତ୍ର ରାମ ଓ ସୀତାଙ୍କ ଭୂମିକାରେ ଅଭିନେତା ରଣବୀର କପୁର ଓ ସାଇ ପଲ୍ଲବୀ ନଜର ଆସିବେ । ଏହା ସହ ରାବଣ ଚରିତ୍ରରେ ନଜର ଆସିବେ କେଜିଏଫ ଷ୍ଟାର ୟଶ ।
ପୂର୍ବରୁ ୟଶ ‘ରାମାୟଣ’ରେ ରାବଣ ଚରିତ୍ର କରିବେ ନାହିଁ ବୋଲି ଚର୍ଚ୍ଚା ହେଉଥିଲା । କେଜିଏଫର ତୃତୀୟ ଭାଗ କରିବା ପାଇଁ ସେ ମନା କରୁଥିବା ନେଇ କୁହାଯାଉଥିବା ବେଳେ ଏବେ ସେ ରାବଣ ଚରିତ୍ର ପାଇଁ ହଁ ମାରିିଛନ୍ତି । ଦୁଇଟି ଫିଲ୍ମ ପାଇଁ ସେ ସମୟ ବାହାର କରିବେ ଏବଂ ରାବଣ ଚରିତ୍ର ପାଇଁ ତାଙ୍କ ଲୁକକୁ ସମ୍ପୂର୍ଣ୍ଣ ଭାବେ ବଦଳାଯିବ ବୋଲି କୁହାଯାଉଛି । ଏତେ ପରିଶ୍ରମ ପାଇଁ ୟଶ ଅଧିକ ପାରିଶ୍ରମିକ ଦାବି କରିଥିବା ଜଣାପଡ଼ିଛି । ଚର୍ଚ୍ଚା ହେଉଛି ଯେ, ରାମାୟଣ ପାଇଁ ୟଶ ୧୫୦କୋଟି ଟଙ୍କା ପାରିଶ୍ରମିକ ନେବେ ।
ତେବେ ୟଶ ଯେତେ ଅଧିକ ଦିନ କାମ କରିବେ ସେ ହିସାବରେ ତାଙ୍କ ପାରିଶ୍ରମିକ ଆହୁରି ଅଧିକ ବଢ଼ିପାରେ ବୋଲି କୁହାଯାଉଛି । ଏହା ସହ ଫିଲ୍ମ ହାତକୁ ନେବା ପରେ ୟଶ ଏବେ ନିଜର ଲୁକକୁ ଆହୁରି ଚମତ୍କାର କରିବା ପାଇଁ ଜିମରେ ବ୍ୟାୟାମ କରିବା ଆରମ୍ଭ କରିଛନ୍ତି ବୋଲି ଚର୍ଚ୍ଚା ହେଉଛି ।
Comments are closed.