ମିନି-କମ୍ପ୍ୟୁଟର ଭାବେ କାମ କରିବ ସ୍ମାର୍ଟଫୋନ୍, ଜାଣନ୍ତୁ ଟେକ୍‌ନିକ୍

ନୂଆଦିଲ୍ଲୀ: ଆଜିକାଲି ସ୍ମାର୍ଟଫୋନ୍ କେବଳ ଫୋନ୍ କଲ୍ କରିବା କିମ୍ବା ସୋସିଆଲ ମିଡିଆ ଚଳାଇବା ପାଇଁ ସୀମିତ ନାହିଁ। ଏହା ଆମ ପକେଟରେ ରହୁଥିବା ଏକ ମିନି-କମ୍ପ୍ୟୁଟର ପରି ହୋଇଗଲାଣି। ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି, ଆପଣ ନିଜ ଫୋନକୁ ଏକ ରିମୋଟ କଂଟ୍ରୋଲ ଭାବେ ମଧ୍ୟ ବ୍ୟବହାର କରିପାରିବେ। ଅର୍ଥାତ୍, ଟିଭି, ମ୍ୟୁଜିକ ସିଷ୍ଟମ, ଏୟାର କଣ୍ଡିସନର କିମ୍ବା ସ୍ମାର୍ଟ ହୋମ ଡିଭାଇସଗୁଡ଼ିକୁ ଆପଣ କେବଳ ନିଜ ଫୋନ ଦ୍ୱାରା ନିୟନ୍ତ୍ରଣ କରିପାରିବେ। ଆସନ୍ତୁ ଜାଣିବା କେଉଁ କେଉଁ ଉପାୟରେ ଆପଣ ନିଜ ଫୋନକୁ ରିମୋଟ ଭାବେ ବ୍ୟବହାର କରିପାରିବେ।

ଟିଭି ଓ ସେଟ୍-ଟପ୍ ବକ୍ସ ନିୟନ୍ତ୍ରଣ

ବର୍ତ୍ତମାନ ଅଧିକାଂଶ ଆଣ୍ଡ୍ରଏଡ ସ୍ମାର୍ଟଫୋନରେ IR ବ୍ଲାଷ୍ଟର (ଇନଫ୍ରାରେଡ ସେନସର) ଦିଆଯାଇଛି। ଏହାର ସାହାଯ୍ୟରେ ଆପଣ ଟିଭି, ଡିଟିଏଚ କିମ୍ବା ସେଟ୍-ଟପ୍ ବକ୍ସକୁ ସହଜରେ ନିୟନ୍ତ୍ରଣ କରିପାରିବେ। ଏଥିପାଇଁ ଆପଣଙ୍କୁ କେବଳ ଏକ ଇଉନିଭର୍ସାଲ ରିମୋଟ ଆପ୍ ଡାଉନଲୋଡ କରିବାକୁ ପଡ଼ିବ। Xiaomi, Vivo ଏବଂ Huawei ଭଳି ଅନେକ ବ୍ରାଣ୍ଡରେ ଏହି ଫିଚର ପୂର୍ବରୁ ଉପଲବ୍ଧ ହୋଇଥାଏ। ଯଦି ଆପଣଙ୍କ ଫୋନରେ IR ବ୍ଲାଷ୍ଟର ନାହିଁ, ତେବେ ମଧ୍ୟ ଆପଣ Wi-Fi ଭିତ୍ତିକ ସ୍ମାର୍ଟ ଟିଭି ରିମୋଟ ଆପ୍ସ ମାଧ୍ୟମରେ ଟିଭି ନିୟନ୍ତ୍ରଣ କରିପାରିବେ।

ସ୍ମାର୍ଟ ଟିଭି ଓ ଷ୍ଟ୍ରିମିଂ ଡିଭାଇସ ପାଇଁ

ଯଦି ଆପଣଙ୍କ ପାଖରେ Android TV, Amazon Fire Stick, Chromecast କିମ୍ବା Apple TV ଅଛି, ତେବେ ଆପଣଙ୍କ ଫୋନ ତୁରନ୍ତ ଏକ ସ୍ମାର୍ଟ ରିମୋଟରେ ପରିଣତ ହୋଇପାରେ। ଏହି ଆପ୍ସ ମାଧ୍ୟମରେ ଆପଣ ଚ୍ୟାନେଲ ବଦଳାଇପାରିବେ, ଭଲ୍ୟୁମ ନିୟନ୍ତ୍ରଣ କରିପାରିବେ ଏବଂ ସର୍ଚ୍ଚ ମଧ୍ୟ କରିପାରିବେ।

ଏୟାର କଣ୍ଡିସନର ଓ ଅନ୍ୟାନ୍ୟ ଇଲେକ୍ଟ୍ରୋନିକ୍ସ

IR ବ୍ଲାଷ୍ଟର ଥିବା ସ୍ମାର୍ଟଫୋନରେ ଆପଣ କେବଳ ଟିଭି ନୁହେଁ, ବରଂ AC, ପଙ୍ଖା, ପ୍ରୋଜେକ୍ଟର ଏବଂ ସାଉଣ୍ଡ ସିଷ୍ଟମ ଭଳି ଡିଭାଇସଗୁଡ଼ିକୁ ମଧ୍ୟ ଚଲାଇପାରିବେ। ଅନେକ ଆପ୍ସରେ ଆପଣଙ୍କୁ ଡିଭାଇସର ବ୍ରାଣ୍ଡ ବାଛିବାକୁ ପଡ଼ିଥାଏ ଏବଂ ତା’ପରେ ଆପଣଙ୍କ ଫୋନ ସେହି ଡିଭାଇସର ରିମୋଟରେ ପରିଣତ ହୋଇଯାଏ।ମ୍ୟୁଜିକ ସିଷ୍ଟମ ଓ ସ୍ପିକର

ଯଦି ଆପଣ ବ୍ଲୁଟୁଥ ସ୍ପିକର କିମ୍ବା Wi-Fi ସ୍ପିକର ବ୍ୟବହାର କରୁଛନ୍ତି, ତେବେ ସେଗୁଡ଼ିକୁ ମଧ୍ୟ ଫୋନ ଦ୍ୱାରା ସହଜରେ ନିୟନ୍ତ୍ରଣ କରାଯାଇପାରେ। ଉଦାହରଣ ସ୍ୱରୂପ, Sony Music Center, Bose Connect, କିମ୍ବା JBL ଆପ୍ସ ଆପଣଙ୍କ ଫୋନକୁ ସିଧାସଳଖ ମ୍ୟୁଜିକ ସିଷ୍ଟମର ରିମୋଟରେ ପରିଣତ କରିଦିଏ। ଏହା ଦ୍ୱାରା ଆପଣ ପ୍ଲେ/ପଜ, ଭଲ୍ୟୁମ ଏବଂ ଟ୍ରାକ ବଦଳାଇପାରିବେ।