ପ୍ରଥମ ଆଦିବାସୀ ରାଷ୍ଟ୍ରପତି ହେବେ ଦ୍ରୈାପଦୀ ମୁର୍ମୁ

ଭୁବନେଶ୍ବର: ପ୍ରଥମ ଆଦିବାସୀ ରାଷ୍ଟ୍ରପତି ହେବେ ଦ୍ରୈାପଦୀ ମୁର୍ମୁ । ଓଡ଼ିଶାର  ମହିଳା ନେତ୍ରୀ ଦ୍ରୈାପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ କରିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଅଭିନନ୍ଦନ ଜଣାଇଛନ୍ତି । ବିଜେଡି ସଭାପତି ନବୀନ କହିଛନ୍ତି “ଦେଶର ସର୍ବୋଚ୍ଚ କାର୍ଯ୍ୟାଳୟ ପାଇଁ ଏନଡିଏର ପ୍ରାର୍ଥୀ ଭାବରେ ଘୋଷଣା କରାଯାଇଥିବାରୁ ଦ୍ରୋପଦୀ ମୁର୍ମୁଙ୍କୁ ଅଭିନନ୍ଦନ।  ପ୍ରଧାନମନ୍ତ୍ରୀ ଯେତେବେଳେ ଏ ବିଷୟରେ ଆଲୋଚନା କରିଥିଲେ ମୁଁ ଆନନ୍ଦିତ ହୋଇଥିଲି । ଏହା ପ୍ରକୃତରେ ଓଡିଶାର ଲୋକଙ୍କ ପାଇଁ ଏକ ଗର୍ବର ମୁହୂର୍ତ୍ତ  ।“

Congratulations Smt #DraupadiMurmu on being announced as candidate of NDA for the country’s highest office. I was delighted when Hon’ble PM @narendramodi ji discussed this with me. It is indeed a proud moment for people of #Odisha.

— Naveen Patnaik (@Naveen_Odisha) June 21, 2022

ଟୁଇଟରେ ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ “ମୁଁ ନିଶ୍ଚିତ ଯେ ଦ୍ରୈାପଦୀ  ମୁର୍ମୁ ଦେଶରେ ମହିଳା ସଶକ୍ତିକରଣ ପାଇଁ ଏକ ଉଜ୍ଜ୍ୱଳ ଉଦାହରଣ ସୃଷ୍ଟି କରିବେ ।“ ବିଜେଡି ସଭାପତିଙ୍କ ଖୁସିକୁ ଦେଖି ଏହା ଜାଣିହେଉଛି ଯେ ଏନଡିଏ ପ୍ରାର୍ଥୀଙ୍କୁ ଯଥା ଶୀଘ୍ର ସମର୍ଥନ ଘୋଷଣା କରିପାରନ୍ତି ନବୀନ । ଏପେଟ ମହିଳା, ପୁଣି ଆଦିବାସୀ ଆଉ ଓଡ଼ିଆ ହୋଇଥିବାରୁ ମୁଖ୍ୟମନ୍ତ୍ରୀ ନିଶ୍ଚୟ ଦ୍ରୈାପଦୀ ମୁର୍ମୁଙ୍କୁ  ବିଜେଡି  ସମର୍ଥନ କରୁଛି ବୋଲି କହିବେ ଏଥିରେ ତିଳେମାତ୍ର ସନ୍ଦେହର ଅବକାଶ ନାହିଁ ।

ପୂର୍ବରୁ ବିରୋଧୀଙ୍କୁ ନବୀନ ସମର୍ଥନ ନଦେଇଥିବାରୁ ନବୀନ ଏନଡିଏକୁ ସମର୍ଥନ ଦେବା ଏକ ପ୍ରକାର ନିଶ୍ଚିତ ହେବ । ଏନଡିଏ ରାଷ୍ଟ୍ରପତି ନିର୍ବାଚନ ବେଳେ ଦ୍ରୈାପଦୀଙ୍କ ପାଇଁ ଆଉ  ଯେଉଁ ନିଅଣ୍ଟ ଭୋଟ ଦରକାର ତାହା ନବୀନଙ୍କ ବିଜେଡି ସମର୍ଥନରେ ପୂରଣ ହୋଇପାରିବ । ହାରାହରି ଆଉ ତେର ହଜାର ଭୋଟ ଦରକାର ହେଉଥିବା ବେଳେ ନବୀନଙ୍କ ପାଖରେ 31 ହଜାର ମୂଲ୍ୟରୁ ଅଧିକ ଭୋଟ ରହିଛି । କାରଣ ବିଜେଡିର 114 ବିଧାୟକ ଥିବା ବେଳେ ଗୋଟିଏ ବିଧାୟକଙ୍କ ମୂଲ୍ୟ ହେଉଛି 149 । ସେହିପରି 12 ଲୋକସଭା ସାଂସଦ ଏବଂ 9 ରାଜ୍ୟସଭା ସାଂସଦ ରହିଛନ୍ତି ଯାହାଙ୍କ ଭୋଟ ମୂଲ୍ୟ ଜଣଙ୍କା 700 ରହିଛି । ପୂର୍ବରୁ ସାଂସଦଙ୍କ ଭୋଟ ମୂଲ୍ୟ 708 ଥିଲା ।

ଅବଶ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବେ ରୋମ ଗସ୍ତରେ ଥିବାରୁ ଏନେଇ ମତ ଟୁଇଟ କରିଛନ୍ତି ।  ସେପଟେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ତଥା ଓ୍ବାଇଏସଆରସିପି ସଭାପତି ଜଗନମୋହନ ରେଡି ମଧ୍ୟ ଦ୍ରୈାପଦୀ ମୁର୍ମୁଙ୍କୁ ସମର୍ଥନ ଦେଇପାରନ୍ତି । କାରଣ ବିରୋଧୀଙ୍କ ପ୍ରାର୍ଥୀ ଯଶୋବନ୍ତ ସିହ୍ନାଙ୍କୁ ଏପର୍ଯ୍ୟନ୍ତ ସମର୍ଥନ କରିବା ବିଷୟରେ ସେ କିଛି କହିନାହାଁନ୍ତି । ତେଣୁ ଏନଡିଏ ପ୍ରାର୍ଥୀ ଦ୍ରୈାପଦୀ ମୁର୍ମୁ ଜିତିବା ପ୍ରାୟ ନିଶ୍ଚିନ୍ତ ।

ରାଷ୍ଟ୍ରପତି ନିର୍ବାଚନ ପାଇଁ ଏନଡିଏ ପ୍ରାର୍ଥୀ ଘୋଷଣାକୁ ସମସ୍ତେ ଅପେକ୍ଷା କରିଥିବା ବେଳେ ମୋଦିଙ୍କ ନିଷ୍ପତ୍ତିକୁ ବିଭିନ୍ନ ମହଲରେ ସ୍ବାଗତ କରାଯାଉଛି । ସୋସିଆଲ ମିଡିଆରେ  ଆଦିବାସୀ ମହିଳାଙ୍କୁ ପ୍ରାର୍ଥୀ କରାଯାଇଥିବାରୁ ଏହି ଖବର ଏବେ ଟ୍ରେଣ୍ଡ କରୁଛି  । ସ୍ବାଧୀନତାର 75 ବର୍ଷ ପରେ ଦେଶ ଜଣେ ମହିଳା ଆଦିବାସୀଙ୍କୁ ରାଷ୍ଟ୍ରପତି ଭାବେ ଦେଖିବାକୁ ଯାଉଛି ।

ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା ମଧ୍ୟ କହିଛନ୍ତି ଯେ ରାଷ୍ଟ୍ରପତି ପ୍ରାର୍ଥୀଙ୍କ ପାଇଁ ବିଜେପି ସଂସଦୀୟ ବୋର୍ଡ 20 ଟି ନାମ ଉପରେ ଆଲୋଚନା କରିଥିଲା । ସବୁ ମେଂଟ ଦଳଙ୍କ ସହ ରାଜନାଥ ସିଂହ ଏବଂ ସେ ନିଜେ ଏନେଇ ଆଲୋଚନା କରିଥିଲେ ।  ଏହା ପରେ ପୂର୍ବ ଭାରତରୁ ଜଣେ ଆଦିବାସୀ ମହିଳା ବାଛିବା ପାଇଁ ନିଷ୍ପତ୍ତି ନିଆଯାଇଥିଲା।  ଆଉ ଶେଷରେ ଦ୍ରୈାପଦୀ ମୁର୍ମୁ ଙ୍କୁ ପ୍ରାର୍ଥୀ କରିବା ପାଇଁ ନିଷ୍ପତ୍ତି ହୋଇଥିଲା ।

Smt. Droupadi Murmu Ji has devoted her life to serving society and empowering the poor, downtrodden as well as the marginalised. She has rich administrative experience and had an outstanding gubernatorial tenure. I am confident she will be a great President of our nation.

— Narendra Modi (@narendramodi) June 21, 2022

ଦ୍ରୈାପଦୀ ମୁର୍ମୁ ଓଡ଼ିଶାର କାଉନସିଲରରୁ ରାଜନୈତିକ ଜୀବନ ଆରମ୍ଭ କରିଥିବା ବେଳେ ଏବେ ଦେଶର ଆଗାମୀ ରାଷ୍ଟ୍ରପତି ହେବାକୁ ଯାଉଛନ୍ତି ।  ଦ୍ରୋପଦୀ ମୁର୍ମୁ 20 ଜୁନ୍ 1958 ରେ ଓଡିଶାର ମୟୂରଭଞ୍ଜ ଜିଲ୍ଲାରେ ଜନ୍ମଗ୍ରହଣ କରିଥିଲେ। ରାଜନୀତି ଜୀବନରେ ସେ ଅନେକ ସଂଘର୍ଷ କରିଥିଲେ । ତେବେ  2000 ରୁ 2004 ମସିହାରେ ସେ ଓଡିଶାର ରାଇରଙ୍ଗପୁର ବିଧାନସଭା ନିର୍ବାଚନମଣ୍ଡଳୀରୁ ବିଧାୟକ ଥାଇ ଭାରତୀୟ ଜନତା ପାର୍ଟି ଏବଂ ବିଜୁ ଜନତା ଦଳ ମିଳିତ ସରକାରରେ ମନ୍ତ୍ରୀ ହୋଇଥିଲେ ।  ବାଣିଜ୍ୟ ଏବଂ ପରିବହନ ମନ୍ତ୍ରୀ ସହ ମତ୍ସ୍ୟ ଓ ପଶୁସମ୍ପଦ ମନ୍ତ୍ରୀ ମଧ୍ୟ ହୋଇଥିଲେ ।

2013 ରେ, ସେ ଦଳର ଏସଟି ମୋର୍ଚ୍ଚାର ଜାତୀୟ କାର୍ଯ୍ୟନିର୍ବାହୀ ସଦସ୍ୟ ପଦବୀକୁ ଉନ୍ନୀତ ହୋଇଥିଲେ।  ସେ ପ୍ରଥମ ମହିଳା ଯିଏକି 2015 ରେ ଝାଡଖଣ୍ଡର ନବମ ରାଜ୍ୟପାଳ ଭାବରେ ଶପଥ ଗ୍ରହଣ କରିଥିଲେ। ସେ ପ୍ରଥମ ମହିଳା ଆଦିବାସୀ ନେତା ଭାବରେ ରାଜ୍ୟପାଳ ଭାବରେ ନିଯୁକ୍ତ ହୋଇଥିଲେ। ନିର୍ବାଚିତ ହେବା ପରେ ଦ୍ରୈାପଦୀ ମୁର୍ମୁ ଭାରତର ପ୍ରଥମ ଆଦିବାସୀ ଏବଂ ଦ୍ୱିତୀୟ ମହିଳା ରାଷ୍ଟ୍ରପତି ହେବେ। ଏହା ବ୍ୟତୀତ ସେ ଓଡିଶାର ପ୍ରଥମ ରାଷ୍ଟ୍ରପତି ମଧ୍ୟ ହେବେ। ପୂ୍ର୍ବରୁ ଭିଭି ଗିରି ମଧ୍ୟ ଓଡ଼ିଶାର ରାଷ୍ଟ୍ରପତି ବନିଥିଲେ ।  ସେ ପ୍ରାୟ ଦୁଇ ଦଶନ୍ଧି ଧରି ରାଜନୀତିରେ ଏବଂ ସାମାଜିକ ସେବାରେ ବିତାଇଛନ୍ତି।