ଗୋଟିଏ ଗଛରେ ୧୨୧ ପ୍ରକାର ଆମ୍ବ

ଶାହରନପୁର( ଉତ୍ତରପ୍ରଦେଶ): ବିଭିନ୍ନ ପ୍ରଜାତିର ଆମ୍ବ ଖାଇଥିବେ। ବର୍ଷକୁ ଏକାଧିକ ଥର ଫଳୁଥିବା ଆମ୍ବଗଛ ବି ଅଛି। ହେଲେ ଗୋଟିଏ ଗଛରେ ଏକାଧିକ ପ୍ରକାର ଆମ୍ବ ଫଳିବା ନିଶ୍ଚିତ ଭାବେ ଅଧିକାଂଶଙ୍କ ପାଇଁ ନୂଆକଥା। ଉତ୍ତରପ୍ରଦେଶର ଶାହରନପୁରର କମ୍ପାନିବାଗ ଅଞ୍ଚଳର ଏହି ଆମ୍ବଗଛ ଏବେ ଲୋକଙ୍କ ଆକର୍ଷଣର କେନ୍ଦ୍ର ପାଲଟିଛି। ଏମିତି ବି ଶାହରନପୁର ଆମ୍ବ ପାଇଁ  ବେଶ ପ୍ରସିଦ୍ଧ। ଏବେ ୧୨୧ ପ୍ରକାର ଆମ୍ବ ଫଳାଉଥିବା ଏହି ୧୫ ବର୍ଷର ଆମ୍ବଗଛକୁ ଦେଖିବା ପାଇଁ ଅନେକ ଲୋକ ଆସୁଛନ୍ତି। ଶାହରନପୁର ଉଦ୍ୟାନକୃଷି ତାଲିମ କେନ୍ଦ୍ରର ଯୁଗ୍ମ ନିର୍ଦ୍ଦେଶକ ଭାନୁପ୍ରକାଶ ରାମଙ୍କ କହିବା ଅନୁସାରେ କିଛି ବର୍ଷ ତେଳେ ଏହି ଆମ୍ବ ଗଛରେ ଏହି ଗବେଷଣା କରାଯାଇଥିଲା। ତତ୍କାଳୀନ ଯୁଗ୍ମନିର୍ଦ୍ଦେଶକ ଏହି ଗଛରେ ୧୨୧ ପ୍ରକାର ଆମ୍ବର ଡାଳ ଯୋଡ଼ିଥିଲେ। ଏବେ ତାହା ସଫଳ ରୂପ ନେଇଛି। ଭିନ୍ନ ଭିନ୍ନ ଡାଳରେ ଭିନ୍ନ ଭିନ୍ନ ପ୍ରକାର ଆମ୍ବ ଫଳୁଛି। ଅନ୍ୟ ଚାଷୀମନେ ମଧ୍ୟ ଏହି କୌଶଳ ଗ୍ରହଣ କରିପାରିବେ ବୋଲି ଭାନୁପ୍ରକାଶ କହିଛନ୍ତି।