ଗଞ୍ଜାମରେ କରୋନା ନେଇଛି ୩୦ ମୁଣ୍ଡ, ସାତ ଦିନରେ କେବଳ ୧୭

ଗଞ୍ଜାମ: ଜିଲ୍ଲାରେ ପ୍ରତିଦିନ ମୁଣ୍ଡ ନେଉଛି କରୋନା । ଜୁଲାଇରେ ବଢୁଛି ସଂକ୍ରମଣ । ତାସହ ମୃତ୍ୟୁ ସଂଖ୍ୟା ବି ବଢୁଛି । ଜିଲ୍ଲାରେ ଏଯାଏଁ ୩୦ ମୁଣ୍ଡ ନେଲାଣି ପ୍ରାଣଘାତୀ ଭାଇରସ୍ । କିନ୍ତୁ ଚିନ୍ତାଜନକ ପ୍ରସଙ୍ଗ ହେଉଛି ଏଯାଏଁ ଯେତିକି ମଲେଣି ତାଭିତରୁ କେବଳ ୧୭ ଜଣ ଚଳିତ ମାସରେ (ଜୁଲାଇ) ପ୍ରାଣ ହରାଇଛନ୍ତି । ଅର୍ଥାତ ମୋଟ୍ ମୃତ୍ୟୁ ସଂଖ୍ୟାର ୫୬ ପ୍ରତିଶତ ଆକ୍ରାନ୍ତ କେବଳ ଜୁଲାଇ ୧ରୁ ଆଜି ଭିତରେ ମୃତ୍ୟୁବରଣ କରିଛନ୍ତି ।

୩ ହଜାର ପାର କଲା ପଜିଟିଭ୍ କେସ୍
କରୋନା କେସରେ ତିନି ହଜାର ପାର କରିଛି ଗଞ୍ଜାମ ଜିଲ୍ଲା । ମୋଟ୍ ପଜିଟିଭ ସଂଖ୍ୟା ୩ ହଜାର ୯୬କୁ ବୃଦ୍ଧି ପାଇଛି । ରାଜ୍ୟରେ ସର୍ବାଧିକ ଭୂତାଣୁ ସଂକ୍ରମିତ ଜିଲ୍ଲାର ଶୀର୍ଷ ସ୍ଥାନରେ ରହିଛି ଗଞ୍ଜାମ । ଜୁଲାଇ ମାସରେ କେବଳ ୧ ହଜାର ୬୨୪ଟି ନୂଆ ପଜିଟିଭ କେସ୍ ବାହାରିଛି ।
କରୋନା ଚେନ୍ ଭାଙ୍ଗିବାକୁ ଆଜିଠୁ ସ୍କ୍ରିନିଂ
ଜିଲ୍ଲାରେ ସଂକ୍ରମଣ ବଢୁଥିବାରୁ ଟେନସନ୍ ବଢ଼ିଛି । କରୋନା ଚେନ୍ ଭାଙ୍ଗିବାକୁ ଡୋର୍ ଟୁ ଡୋର୍ ଯାଇ ଲୋକଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଉଛି । ଆଜିଠାରୁ ସମସ୍ତ ମ୍ୟୁନିସିପାଲିଟି, ବ୍ରହ୍ମପୁର ମହାନଗର ନିଗମ ଓ ବ୍ଲକ ହେଡ କ୍ୱାର୍ଟରରେ ଘର ଘର ବୁଲି ସ୍କ୍ରିନିଂ କରାଯାଉଛି । ଏଥିପାଇଁ ଜିଲ୍ଲାର ସହରାଞ୍ଚଳକୁ ଆସନ୍ତା ୧୩ ତାରିଖ ଯାଏଁ ସଟଡାଉନ ରଖାଯାଇଛି ।