ନୂଆଦିଲ୍ଲୀ: ସଂସଦ ଉପରେ ଆତଙ୍କବାଦୀ ଆକ୍ରମଣ ଘଟଣାକୁ ଆଜି ୧୯ ବର୍ଷ ପୁରିଛି । ୨୦୦୧ ମସିହା ଆଜିର ଦିନରେ ଗଣତନ୍ତ୍ର ମନ୍ଦିର ଉପରେ ହୋଇଥିଲା ହମଲା । ଲସ୍କର-ଏ-ତୋଇବା ଓ ଜୈସ-ଏ-ମହମ୍ମଦ ସଂଗଠନର ୫ ଆତ୍ମଘାତୀ ଆତଙ୍କବାଦୀ ସଂସଦ ଭବନରେ ପ୍ରବେଶ କରିଥିଲେ । ସେତେବେଳେ ଲୋକସଭା ଅଧିବେଶନ ଚାଲିଥିଲା ।
ଛଦ୍ମବେଶରେ ପ୍ରବେଶ କରି ଗୁଳି ଚଳାଇଥିଲେ ଆତଙ୍କବାଦୀ । ସୁରକ୍ଷାକର୍ମୀଙ୍କ ପାଲଟା ଆକ୍ରମଣରେ ସମସ୍ତ ଆତଙ୍କବାଦୀ ନିହତ ହୋଇଥିଲେ । ଆତଙ୍କବାଦୀଙ୍କ ଆକ୍ରମଣରେ ଦିଲ୍ଲୀ ପୋଲିସର ପାଞ୍ଚ ଜଣ ସୁରକ୍ଷାକର୍ମୀ, ସିଆରପିଏଫର ଜଣେ ମହିଳା କନଷ୍ଟେବଳ, ଦୁଇ ଜଣ ସିକ୍ୟୁରିଟି ଆସିଷ୍ଟାଣ୍ଟଙ୍କ ସମେତ ୯ ଜଣ ସହିଦ ହୋଇଥିଲେ । ଜଣେ ମାଳି ଓ ଫଟୋ ସାମ୍ବାଦିକ ବି ପ୍ରାଣ ହରାଇଥିଲେ ।
ସଂସଦ ଭବନ ଆକ୍ରମଣରେ ସହିଦଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଟ୍ୱିଟ୍ କରି ପ୍ରଧାନମନ୍ତ୍ରୀ ଲେଖିଛନ୍ତି, ୨୦୦୧ରେ ଆଜିର ଦିନରେ ଆମ ସଂସଦ ଉପରେ ଆକ୍ରମଣ ହୋଇଥିଲା । ଏହି ଭୟଙ୍କର ଆକ୍ରମଣକୁ ଆମେ କେବେ ବି ଭୁଲିପାରିବୁ ନାହିଁ । ସଂସଦର ସୁରକ୍ଷା ପାଇଁ ବୀର ଯବାନଙ୍କ ଅଦମ୍ୟ ବୀରତ୍ୱ ଓ ବଳିଦାନକୁ ଦେଶ ମନେ ପକାଉଛି । ଭାରତ ସେହି ବୀର ଯବାନଙ୍କ ନିକଟରେ ସର୍ବଦା କୃତଜ୍ଞ ।
We will never forget the cowardly attack on our Parliament on this day in 2001. We recall the valour and sacrifice of those who lost their lives protecting our Parliament. India will always be thankful to them.
— Narendra Modi (@narendramodi) December 13, 2020