ଶ୍ରୀନଗର: ପୋଲିସ ବସ୍ରୁ ୨ କର୍ମଚାରୀଙ୍କ ମୃତଦେହ ଉଦ୍ଧାର । ଜାମ୍ମୁ କାଶ୍ମୀର ଉଦ୍ଧମପୁର ନିକଟରେ ବସ୍ ଭିତରୁ ୨ ପୋଲିସ କର୍ମଚାରୀଙ୍କ ମୃତଦେହ ଉଦ୍ଧାର କରାଯାଇଛି । ପରସ୍ପର ଭିତରେ ଝଗଡ଼ା କରି ଗୁଳିକାଣ୍ଡ ହୋଇଛି । ଗୁଳି ବାଜି ୨ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଛନ୍ତି । ଏକେ-୪୭ ରାଇଫଲ୍ରୁ ଗୁଳି ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
ସୂଚନା ଅନୁସାରେ, ସକାଳ ପ୍ରାୟ ୬.୩୦ ସମୟରେ ଜିଲ୍ଲା ମୁଖ୍ୟାଳୟର କାଳୀ ମାତା ମନ୍ଦିର ବାହାରେ ଥିବା ଏକ ପୋଲିସ୍ ବସ୍ ଭିତରୁ ୨ ପୋଲିସ କର୍ମଚାରୀଙ୍କ ମୃତଦେହ ମିଳିଥିଲା । ସେମାନଙ୍କ ଶରୀରରେ ଗୁଳି ବାଜିଥିଲା । ସୂଚନା ପାଇ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ପୋଷ୍ଟମର୍ଟମ ପାଇଁ ଉଦ୍ଧାମପୁର ଜିଲ୍ଲା ଡାକ୍ତରଖାନାକୁ ପଠାଇ ତଦନ୍ତ ଆରମ୍ଭ କରିଥିଲେ । ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଉଭୟ ପୋଲିସ ପରସ୍ପର ଉପରକୁ ଗୁଳି ଚଳାଇଛନ୍ତି । ସପୋରରୁ ତଲୱାର ଟ୍ରେନିଂ ସେଣ୍ଟର ଯାଉଥିବା ବେଳେ ଏହି ଗୁଳିମାଡ଼ ହୋଇଛି । ଗୁଳିମାଡ ବେଳେ ଏକେ-୪୭ ରାଇଫଲ ବ୍ୟବହାର କରାଯାଇଥିବା ସୂଚନା ମିଳିଛି । ତେବେ ଗୁଳିମାଡରେ ଅନ୍ୟ ଜଣେ ପୋଲିସ କର୍ମଚାରୀ ଆହତ ହୋଇଥିବା ବେଳେ ତୁରନ୍ତ ତାଙ୍କୁ ଚିକିତ୍ସା ନିମନ୍ତେ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏବେ ତାଙ୍କ ଅବସ୍ଥା ଭଲ ଥିବା ନେଇ ସୂଚନା ମିଳିଛି ।
Comments are closed.