IFS ଅଭୟକାନ୍ତ ପାଠକଙ୍କ ଅମାପ ସମ୍ପତ୍ତିର ଖିଅ ଖୋଜିବ ୨୦ ଜଣିଆ ଏସ୍ଆଇଟି

ଭୁବନେଶ୍ୱର: ଆୟଠୁ ଅଧିକ ସମ୍ପତ୍ତି ଠୁଳ କରିବା ଆଇଏଫଏସ୍ ଅଭୟକାନ୍ତ ପାଠକଙ୍କୁ ମହଙ୍ଗା ପଡ଼ିଛି । ଭିଜିଲାନ୍ସ ଗିରଫ ପରେ ଜେଲ ଯାଇଛନ୍ତି । ଚାକିରିରୁ ସସପେଣ୍ଡ ହୋଇଛନ୍ତି । କେଉଁ ସୂତ୍ରରୁ ଆୟ ବହିର୍ଭୁତ ସମ୍ପତ୍ତି ଠୁଳ କରିଥିଲେ ? ତାଙ୍କର ଅମାପ ସମ୍ପତ୍ତିର ଖୋଳତାଡ କରିବ ସ୍ୱତନ୍ତ୍ର ତଦନ୍ତକାରୀ ଦଳ ବା ଏସଆଇଟି । ଭିଜିଲାନ୍ସ ବିଭାଗ ପକ୍ଷରୁ ୨୦ ଜଣିଆ ଏସଆଇଟି ଗଠନ କରାଯାଇଛି ।
ତିନି ଦିନ ଧରି ଅଭୟକାନ୍ତଙ୍କ ଭୁବନେଶ୍ୱରରେ ୫ଟି ସ୍ଥାନ ଓ ମୁମ୍ୱାଇ, ପୁଣେ, ପାଟଣା, ରାଜସ୍ଥାନରେ ୭ଟି ଜାଗାରେ ରେଡ୍ ହୋଇଥିଲା । ୫୦କୋଟିରୁ ଅଧିକ ଟଙ୍କାର ସମ୍ପତ୍ତି ଠାବ ହୋଇଛି । ସେଥିରୁ ୯କୋଟି ୩୫ ଲକ୍ଷରୁ ଅଧିକ ଟଙ୍କା ଆୟ ବହିର୍ଭୁତ ସମ୍ପତ୍ତି । ବିଭିନ୍ନ ଘରୋଇ ବ୍ୟାଙ୍କର କାଉଣ୍ଟର ଓ ଏଟିଏମ ଯୋଗ ପୁଅ ଆକାଶଙ୍କ ଆକାଉଣ୍ଟରେ କୋଟି କୋଟି କ୍ୟାସ୍ ଡିପୋଜିଟ ହୋଇଥିଲା । ସେସବୁ ବ୍ୟାଙ୍କର ଭୂମିକା ତଦନ୍ତ ପରିସରକୁ ଆସିବ ।
ବ୍ୟାଙ୍କ ଡିପୋଜିଟ ବାଦ ସେୟାର ମାର୍କେଟ, ମ୍ୟୁଚୁଆଲ ପଣ୍ଡ କୋଟି କୋଟି ଟଙ୍କା ଖଟାଇଥିବା ଜଣାପଡିଛି । ସେହିପରି ଚାର୍ଟର ପ୍ଲେନ ବୁକିଂ କରିଥିବା ଟ୍ରେଭେଲ ଏଜେନ୍ସୀ ଓ ଏଥିପାଇଁ ଦେଇଥିବା ଅର୍ଥ ଦିଗକୁ ବି ତଦନ୍ତ ପରିସରଭୁକ୍ତ କରିବ ଭିଜିଲାନ୍ସ । ସବୁ ଦିଗକୁ ଦୃଷ୍ଟିରେ ରଖି ଛାନଭିନ କରିବ ଭିଜିଲାନ୍ସ ବିଭାଗର ସ୍ୱତନ୍ତ୍ର ତଦନ୍ତକାରୀ ଟିମ୍ ।