ଭୁବନେଶ୍ବର: ମଙ୍ଗଳବାର ସିଙ୍ଗଲ୍ ୱିଣ୍ଡୋ କ୍ଲିୟରାନ୍ସ ଅଥରିଟି (SLSWCA) ରାଜ୍ୟ ସରକାର ୪,୧୧୧.୮୦ କୋଟି ଟଙ୍କାର ୨୩ଟି ଶିଳ୍ପ ପ୍ରସ୍ତାବକୁ ଅନୁମୋଦନ କରିଛନ୍ତି। ଏହି ପ୍ରକଳ୍ପଗୁଡ଼ିକ ଦ୍ୱାରା ରାଜ୍ୟରେ ପ୍ରାୟ ୯,୯୨୪ଟି ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ । ୧୧ଟି ଜିଲ୍ଲାକୁ କଭର କରି ୨୩ଟି ନିବେଶ ପ୍ରସ୍ତାବକୁ ମଞ୍ଜୁରୀ ମିଳିଛି । ଏହି ଅନୁମୋଦନ ଗୁଡ଼ିକ ଓଡ଼ିଶାର ଶିଳ୍ପ ଇକୋସିଷ୍ଟମକୁ ସୁଦୃଢ଼ କରିବା ଏବଂ ନିଯୁକ୍ତି-କେନ୍ଦ୍ରିକ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଦିଗରେ ଆଉ ଏକ ପ୍ରମୁଖ ମାଇଲଖୁଣ୍ଟ ହେବ ।
ଏହି ପ୍ରକଳ୍ପ ଗୁଡ଼ିକ ୧୧ଟି ଜିଲ୍ଲା ହେଉଛି ବାଲେଶ୍ୱର, ଭଦ୍ରକ, କଟକ, ଦେବଗଡ଼, ଗଞ୍ଜାମ, ଯାଜପୁର, ଖୋର୍ଦ୍ଧା, କୋରାପୁଟ, ପୁରୀ, ସମ୍ବଲପୁର ଏବଂ ସୁନ୍ଦରଗଡ଼ରେ କାର୍ଯ୍ୟକାରୀ କରାଯିବ, ଯାହା ଆଞ୍ଚଳିକ ଭାବରେ ସନ୍ତୁଳିତ ଶିଳ୍ପ ବିକାଶ ଏବଂ ବିସ୍ତାରିତ ନିଯୁକ୍ତି ସୁଯୋଗ ସୁନିଶ୍ଚିତ କରିବ ।
ଅନୁମୋଦିତ ପ୍ରକଳ୍ପ ଗୁଡ଼ିକ ହେଉଛି, ମେକାନିକାଲ୍ ଏବଂ ବୈଦ୍ୟୁତିକ ପୁଞ୍ଜିଗତ ସାମଗ୍ରୀ, ପୋଷାକ ଏବଂ ବୟନଶିଳ୍ପ, ମହାକାଶ ଏବଂ ପ୍ରତିରକ୍ଷା ଉତ୍ପାଦନ, ଜାହାଜ ନିର୍ମାଣ ଏବଂ ଜାହାଜ ମରାମତି, ଔଷଧ, ରାସାୟନିକ ପଦାର୍ଥ, ପ୍ରତିରୋଧକ ସାମଗ୍ରୀ, ଆଲୁମିନିୟମ୍ ଡାଉନଷ୍ଟ୍ରିମ୍ ଶିଳ୍ପ, ଖଣିଜ ଉପକାରିତା, ମେଟାଲ ଡାଉନଷ୍ଟ୍ରିମ୍, ପ୍ଲାଷ୍ଟିକ୍, କାଚ ଉତ୍ପାଦନ, ଲଜିଷ୍ଟିକ୍ସ ଏବଂ ଗୋଦାମ, ଭିତ୍ତିଭୂମି ଏବଂ ପର୍ଯ୍ୟଟନ ।
ପୋଷାକ ଓ ବୟନଶିଳ୍ପ: ଖୋର୍ଦ୍ଧାରେ ‘ଜେ.ଜି. ହୋସିଅରୀ ପ୍ରାଇଭେଟ୍ ଲିମିଟେଡ୍’ ୧୦୦ କୋଟି ଟଙ୍କା ନିବେଶରେ ଏକ ପୋଷାକ ନିର୍ମାଣ ୟୁନିଟ୍ ପ୍ରତିଷ୍ଠା କରିବ, ଯାହା ସର୍ବାଧିକ ୨,୩୫୦ ଜଣଙ୍କୁ ନିଯୁକ୍ତି ଦେବ।
ଏରୋସ୍ପେସ୍ ଓ ପ୍ରତିରକ୍ଷା: ଗଞ୍ଜାମରେ ‘ଇନଭେଣ୍ଟଗ୍ରିଡ୍ ଇଣ୍ଡିଆ’ ପକ୍ଷରୁ ୩୦୦ କୋଟି ଟଙ୍କା ବ୍ୟୟରେ ଏକ ଅତ୍ୟାଧୁନିକ ମଲ୍ଟି-ଡ୍ରୋନ୍ ନିର୍ମାଣ କେନ୍ଦ୍ର ସ୍ଥାପନ ହେବ, ଯେଉଁଠାରେ ୧,୦୦୦ ଲୋକ କାମ ପାଇବେ।
ରେଳବାଇ ଓ ଯନ୍ତ୍ରାଂଶ: ଖୋର୍ଦ୍ଧାରେ ‘ନିଫା ଲିମିଟେଡ୍’ ୩୮୪ କୋଟି ଟଙ୍କା ବିନିଯୋଗରେ ରେଳବାଇ ଯନ୍ତ୍ରାଂଶ ନିର୍ମାଣ ୟୁନିଟ୍ ପ୍ରତିଷ୍ଠା କରିବ।
ସାମୁଦ୍ରିକ ଶିଳ୍ପ: ଭଦ୍ରକରେ ୩୩୯.୪୦ କୋଟି ଟଙ୍କା ବ୍ୟୟରେ ଜାହାଜ ନିର୍ମାଣ ଓ ମରାମତି କେନ୍ଦ୍ର ସ୍ଥାପନ ପାଇଁ ‘ନର୍ଦ୍ଦନ୍ ଏକ୍ସପ୍ରେସ୍ ଇନଫ୍ରା’କୁ ଅନୁମତି ମିଳିଛି।
ଖଣି ଓ ଧାତୁ: ସୁନ୍ଦରଗଡ଼ରେ ‘କଳିଙ୍ଗ ମେଟାଲିକ୍ସ’ ଏବଂ ‘ରଶ୍ମି ମେଟାଲର୍ଜିକାଲ୍’ ପକ୍ଷରୁ ବୃହତ ଲୌହ ପିଣ୍ଡ ପ୍ରକ୍ରିୟାକରଣ ପ୍ଲାଣ୍ଟ ସ୍ଥାପନ ହେବ।
ପର୍ଯ୍ୟଟନ ଓ ଆତିଥ୍ୟ: ଖୋର୍ଦ୍ଧା, ପୁରୀ ଏବଂ ସମ୍ବଲପୁରରେ ଏକାଧିକ ୪-ଷ୍ଟାର୍ ଓ ୫-ଷ୍ଟାର୍ ହୋଟେଲ ପ୍ରତିଷ୍ଠାକୁ ମଞ୍ଜୁରୀ ମିଳିଛି, ଯାହା ପର୍ଯ୍ୟଟନ କ୍ଷେତ୍ରରେ ୧,୦୦୦ ରୁ ଅଧିକ ନିଯୁକ୍ତି ସୃଷ୍ଟି କରିବ। ପୁରୀରେ ମଞ୍ଜିରା ହୋଟେଲ୍ସ ଆଣ୍ଡ୍ ରିସୋର୍ଟସ୍ ୨୦୦ କୋଟି ଟଙ୍କାରେ ଏକ ପଞ୍ଚତାରକା ହୋଟେଲ୍ ଏବଂ ପଣ୍ଡା ରିସୋର୍ଟସ୍ ଲିମିଟେଡ୍ ୭୦ କୋଟି ଟଙ୍କାରେ ଏକ ଚାରି-ତାରକା ହୋଟେଲ୍ ନିର୍ମାଣ କରିବେ। ଶଙ୍କରୀଦେବୀ ଏଣ୍ଟରପ୍ରାଇଜେସ୍ ପକ୍ଷରୁ ସମ୍ବଲପୁରରେ ୬୪.୧୦ କୋଟି ଟଙ୍କା ନିବେଶରେ ଏକ ଚାରି-ତାରକା ହୋଟେଲ୍ ନିର୍ମାଣ କରାଯିବ।