CG Naxal Surrender: ସାତ ମହିଳାଙ୍କ ସମେତ ୨୬ ନକ୍ସଲଙ୍କ ଆତ୍ମସମର୍ପଣ; ମୁଣ୍ଡରେ ଥିଲା ୬୫ ଲକ୍ଷ

ଛତିଶଗଡ: ସୁକମାରେ ୨୬ଜଣ ନକ୍ସଲଙ୍କ ଆତ୍ମସମର୍ପଣ । ଏହି ସମସ୍ତ ନକ୍ସଲବାଦୀ ହିଂସାର ପଥ ପରିତ୍ୟାଗ କରିଛନ୍ତି । ଏହି ଆତ୍ମସମର୍ପଣ କରିଥିବା କ୍ୟାଡରମାନେ PLGA ବାଟାଲିୟନ, ଦକ୍ଷିଣ ବସ୍ତର ଡିଭିଜନ, ମାଡ୍ ଡିଭିଜନ ଏବଂ ଆନ୍ଧ୍ର-ଓଡ଼ିଶା ସୀମା (AOB) ଅଞ୍ଚଳରେ ଦୀର୍ଘ ସମୟ ଧରି ସକ୍ରିୟ ଥିଲେ। ଆତ୍ମସମର୍ପଣ କରିଥିବା ୧୩ ଜଣ ମାଓବାଦୀଙ୍କ ମୁଣ୍ଡ ପାଇଁ ୬୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରାଯାଇଥିଲା। ସୁକମା ପୋଲିସ ଅଧିକ୍ଷକ କିରଣ କହିଛନ୍ତି ଯେ ଆତ୍ମସମର୍ପଣକାରୀଙ୍କ ମଧ୍ୟରେ ସାତ ଜଣ ମହିଳା ଅଛନ୍ତି, ଯେଉଁମାନେ “ପୁନା ମାର୍ଗମ” ପଦକ୍ଷେପ ଅଧୀନରେ ଆତ୍ମସମର୍ପଣ କରିଛନ୍ତି ।

ଛତିଶଗଡ଼ ସରକାରଙ୍କ ପୁନର୍ବାସ ନୀତି-୨୦୨୫ ଅନୁଯାୟୀ ଆତ୍ମସମର୍ପଣକାରୀ ନକ୍ସଲମାନଙ୍କୁ ପ୍ରତ୍ୟେକଙ୍କୁ ୫୦,୦୦୦ ଟଙ୍କା ପ୍ରୋତ୍ସାହନ ରାଶି ମିଳିବ । ଏହା ସହିତ, ସେମାନଙ୍କୁ ଦକ୍ଷତା ବିକାଶ ଏବଂ ଆତ୍ମନିଯୁକ୍ତି ସୁଯୋଗ ସହିତ ଯୋଡ଼ିବା ପାଇଁ ଏକ ପ୍ରକ୍ରିୟା ଆରମ୍ଭ କରାଯିବ, ଯାହା ଦ୍ଵାରା ସେମାନେ ସ୍ୱାବଲମ୍ବୀ ହୋଇପାରିବେ ଏବଂ ସାଧାରଣ ଜୀବନଯାପନ କରିପାରିବେ।

ଏହି ସମ୍ପୂର୍ଣ୍ଣ ଅପରେସନରେ DRG ସୁକମା, ଇଣ୍ଟେରୋଗେସନ ଶାଖା, VIASHA ସୁକମା, RFT ସୁକମା, ଏବଂ CRPF ର 02, 159, 212, 217, 226 ବାଟାଲିୟନ ଏବଂ କୋବ୍ରା 201 ର ଗୁଇନ୍ଦା ଶାଖା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ପୋଲିସ ପ୍ରଶାସନର ବାର୍ତ୍ତା ସ୍ପଷ୍ଟ କରିଥିଲେ ଯେ, ନକ୍ସଲ ସଂଗଠନ ପାଖରେ ଏବେ ସୀମିତ ବିକଳ୍ପ ଅଛି। ସେମାନେ ହିଂସାର ପଥରେ ଚାଲିପାରିବେ ଏବଂ ନିଜର ପତନର ସମ୍ମୁଖୀନ ହୋଇପାରିବେ କିମ୍ବା ଆତ୍ମସମର୍ପଣ ଏବଂ ପୁନର୍ବାସ କାର୍ଯ୍ୟକ୍ରମ ମାଧ୍ୟମରେ ଶାନ୍ତି, ସମ୍ମାନ ଏବଂ ବିକାଶର ପଥ ବାଛିପାରିବେ।