ଭୁବନେଶ୍ୱର: ଗତ ତିନି ବର୍ଷ ମଧ୍ୟରେ ରାଜ୍ୟରେ ୯୭୦ ଜଣ ଲୋକ ପାଣିରେ ବୁଡ଼ି ମୃତ୍ୟୁବରଣ କରିଛନ୍ତି। ସୋମବାର ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ବିଧାନସଭାରେ ଏହି ସୂଚନା ଦେଇଛନ୍ତି। ବିଧାନସଭାରେ ବିଧାୟକ ସୌଭିକ ବିଶ୍ୱାଳଙ୍କ ଏକ ପ୍ରଶ୍ନର ଉତ୍ତରରେ ଗୃହରାଷ୍ଟ୍ରମନ୍ତ୍ରୀ ଏହା କହିଛନ୍ତି।
ତୁଷାରକାନ୍ତି ବେହେରା କହିଛନ୍ତି ଯେ ଏହି ସମୟ ମଧ୍ୟରେ ରାଜ୍ୟରେ ମୋଟ ୧ ହଜାର ୬୧୫ ଜଣ ଲୋକ ପାଣିରେ ବୁଡ଼ି ମୃତ୍ୟୁବରଣ କରିଥିଲେ। ସେଥିମଧ୍ୟରୁ ୬୧୩ ଜଣଙ୍କୁ ସଫଳତାର ସହ ଉଦ୍ଧାର କରାଯାଇଥିବା ବେଳେ ୯୭୦ ଜଣ ସେମାନଙ୍କ ଜଳ ସମାଧି ନେଇଛନ୍ତି।
ରାଜ୍ୟ ସରକାର ନେଇଥିବା ସତର୍କତା ସମ୍ପର୍କରେ ବର୍ଣ୍ଣନା କରି ତୁଷାରକାନ୍ତି ବେହେରା କହିଛନ୍ତି, ରାଜ୍ୟ ସରକାର ସାଧାରଣତଃ ପର୍ବପର୍ବାଣୀ ସମୟରେ ବିଶେଷ କରି ବିପଦପୂର୍ଣ୍ଣ ନଦୀ କୂଳ ନିକଟରେ ଅଗ୍ନିଶମ କର୍ମଚାରୀ ଓ ଆନୁଷଙ୍ଗିକ ଉପକରଣ ମୁତୟନ କରିଥାନ୍ତି।
ଗତ ମାର୍ଚ୍ଚ ୮ ତାରିଖରେ ହୋଲି ଖେଳିବା ପରେ ନଦୀ ଓ ପୋଖରୀରେ ଗାଧୋଉଥିବା ବେଳେ ଅଳ୍ପ କେଇ ଘଣ୍ଟା ମଧ୍ୟରେ ବିବାହ କରିବାକୁ ଯାଉଥିବା ଜଣେ ନାବାଳିକା ଓ ଜଣେ ଯୁବକଙ୍କ ସମେତ ଅନ୍ୟୂନ ୭ ଜଣ ପ୍ରାଣ ହରାଇଥିଲେ। ସେହିପରି ବିଭିନ୍ନ ସମୟରେ କଟକ ମହାନଦୀକୁ ଡେଇଁ ପଡି ଅନେକ ଆତ୍ମହତ୍ୟା ପାଇଁ ଉଦ୍ୟମ କରୁଥିବା ଦେଖିବାକୁ ମିଳିଛି।
ଅନ୍ୟପଟେ ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ବିଭାଗ ଉପରେ ଷ୍ଟାଣ୍ଡିଂ କମିଟି ରିପୋର୍ଟ ଅନୁଯାୟୀ, ଗତ ୭ ବର୍ଷ ମଧ୍ୟରେ ରାଜ୍ୟରେ ପ୍ରାୟ ୧୦ ହଜାର ଲୋକ ପାଣିରେ ବୁଡ଼ି ପ୍ରାଣ ହରାଇଥିବା ବେଳେ ଏହା ଓଡ଼ିଶାରେ ମୃତ୍ୟୁର ଅନ୍ୟତମ କାରଣ ପାଲଟିଛି ବୋଲି କୁହାଯାଇଛି। ଗତ ବର୍ଷ ଅନ୍ୟ ଯେକୌଣସି ପ୍ରାକୃତିକ ବିପର୍ଯ୍ଯୟ କିମ୍ବା ରାଜ୍ୟ ନିର୍ଦ୍ଦିଷ୍ଟ ବିପର୍ଯ୍ୟୟ ଅପେକ୍ଷା ପାଣିରେ ବୁଡି ଅଧିକ ଜୀବନ ଯାଇଛି। ୨୦୨୨ରେ ରାଜ୍ୟରେ ୧,୪୭୬ ଜଣ ବ୍ୟକ୍ତି ପାଣିରେ ବୁଡ଼ି ମୃତ୍ୟୁବରଣ କରିଥିବା ବେଳେ ୨୦୧୬ରୁ ୨୦୨୨ ମଧ୍ୟରେ ଏହି ସଂଖ୍ୟା ୯ ହଜାର ୯୮୨ରେ ପହଞ୍ଚିଛି। ଏହି ସମୟ ମଧ୍ୟରେ ଦୈନିକ ହାରାହାରି ଚାରି ଜଣଙ୍କ ଜୀବନ ଯାଇଥିଲା ଯାହା ସଡ଼କ ଦୁର୍ଘଟଣା ପରେ ରାଜ୍ୟରେ ମୃତ୍ୟୁର ଅନ୍ୟତମ କାରଣ ପାଲଟିଛି।